Read lumasaaba Khuurakikha 46 Bible Online

Khuurakikha 46 - lumasaaba bible

Khuurakikha 46

¹Yakobo waabuusilisa bibiindu byeewe byoosi byeesi aaba nabyo, waatsya woola i Berisheba. Nga woolele ibweene iyo, wawaanayo tsisaayilo isi Wele mweene isi paapa weewe Isaaka esaayatsaka.

²Mu shilo sheene isho, Wele waamubonekhela mu khubonekhelwa, waamulaanga lisiina ari, “Yakobo! Yakobo!” Yakobo naye waafukila ari, “Iseese niyooyu.”

³Wele waamulomela ari, “Ise ndi Wele, Wele isi paapa woowo esaayatsaka. Ukharya khuutsya i Misiri ta. Ibweene iyo, ikhabalaayise lisaaye lyoowo, likyele linaambo liboofu naabi.

⁴Ise kane intsye i Misiri atweela ni nawe, ne mbuka ikhoole, ikhaakobose babetsukhulu boowo khu liswa lino. Yusufu umweene akhaabewo nga utsya khufwa, akhumine tsimoni tsoowo.”

⁵Lwanyuma Yakobo waarakikha lukyeendo lweewe khukhwaama i Berisheba. Basooleli beewe baamusuta niye, ni babaana baabwe bakyeekhe, atweela ni baakyelama baabwe mu bikaari byeesi Faraawo aarumanisa khuubayila i Misiri.

⁶Baatsya ni bibyaayo byaabwe, atweela ni bye buyiindifu byaabwe byoosi byeesi baafuna nga bali i Kanaani. Aryo Yakobo waatsya ni lisaaye lyeewe lyoosi,

⁷nga mulimo basooleli beewe, babetsukhulu beewe, bakhaana beewe, ni babetsukhulu beewe bakhaana.

⁸Ari kano niko kamasiina ke babaandu babaaba be muungo mwa Yakobo, babaatsya ni naye i Misiri. Mu bano mwabamwo Rewubeni, umusooleli weewe umukhulu.

⁹Basooleli ba Rewubeni baaba nibo: Hanoki, Palu, Hezuroni, ni Karimi.

¹⁰Basooleli ba Simeoni baaba nibo: Yemuweli, Yamini, Ohadi, Yakini, Zohari, ni Shaulu uwaba umusooleli uw'omukhasi umu Kanaani.

¹¹Basooleli ba Levi baaba nibo: Gerishoni, Kohasi, ni Merari.

¹²Basooleli ba Yuda baaba nibo: Eri, Onani, Shela, Perezi, ni Zera. (Ne shonyene ndi Eri ni Onani baafwa nga bali mu shibala sha Kanaani.) Basooleli ba Perezi baaba nibo Hezironi ni Hamulu.

¹³Basooleli ba Isakaari baaba nibo: Tola, Puwa, Yashubu, ni Shimuroni.

¹⁴Basooleli ba Zebuluni baaba nibo: Seredi, Eloni ni Yahileeli.

¹⁵Bano nibo basooleli beesi Leya aasaala ni Yakobo nga bashiili i Padani Aramu, nga mulimo n'umukhaana Dina. Lisaaye lyeewe mu mukhasi Leya, atweela boola babaandu kamakhumi kasesaba na bataru (63).

¹⁶Basooleli ba Gadi baaba nibo bano: Zefoni, Hagi, Eziboni, Eri, Arodi, ni Areli.

¹⁷Basooleli ba Asheri ni bano: Imuna, Ishiva, Ishivi, Beriya, atweela n'umukooko waabwe Sera. Beriya naye aasaala basooleli bano: Heberi ni Malukiyeli.

¹⁸Bano boosi baaba lisaaye lya Yakobo mu mukhasi Zilupa, nga niye umukhaana umukulwa isi Labani aawa Leya khuuba umwakaanisi weewe.

¹⁹Umukhasi Rakeli aasaalila Yakobo basooleli babili, nga nibo bano: Yusufu ni Benyamini.

²⁰Mu shibala she Misiri, Yusufu aasaala basooleli babili nga nibo: Manase ni Efurayimu, nga abasaala mu mukhasi Asenasi, uwaba umukhaana wa Potifera, umusaayi we Heliyopolisi.

²¹Nabo basooleli ba Benyamini baaba nibo bano: Bela, Bekeri, Ashibeli, Gera, Naamani, Ehi, Roshi, Mupimu, Hupimu, ni Aridi.

²²Bano baaba likhumi na bane nga nibo lisaaye lyeesi Yakobo aafuna mu mukhasi Rakeli.

²³Dani aaba n'umusooleli weewe Hushimu.

²⁴Basooleli ba Nafutali baaba nibo bano: Yahizeli, Guni, Yezeri, ni Shilemu.

²⁵Bano baaba musaafu, nga nibo lisaaye lyeesi Yakobo aafuna mu mukhasi Bila, nga umukhaana umukulwa isi Labani aawa umukhaana weewe Rakeli, khuuba umwakaanisi weewe.

²⁶Babaandu boosi atweela babaaba lisaaye lya Yakobo lilyeene babaatsya i Misiri, baaba kamakhumi kasesaba na basesaba (66), nga waakhurakho bakhasi be basooleli beewe ta.

²⁷Babaana ba Yusufu babili baasaalikhila mu Misiri. Nga waatubaasilekho babeene abo, atweela lisaaye lya Yakobo lyoosi boola babaandu kamakhumi musaafu (70).

²⁸Lwanyuma Yakobo waarumana iburaangisi weewe Yuda khuutsya isi Yusufu, atsye amuloombe abaakanane i Gosheni. Nabo ni boola i Gosheni,

²⁹Yusufu waaŋoonaŋoona likaari lyeewe khuutsya i Gosheni, akaanane ni paapa weewe Yakobo. Baryo nga baakanaane, Yusufu waakwa paapa weewe mu shifuba, waalila kamasika khuumala imbuka ndeeyikho.

³⁰Lwanyuma Yakobo waalomela Yusufu ari, “Ari inyala naafwa na khufwa! Lwekhuuba ari naakhuboonekho, naamanyile ndi uli umulamu.”

³¹Lwanyuma lwa bino byoosi, Yusufu waalomela babaandaaye, atweela ni baalebe be muungo mwa paapa weewe ari, “Ari naakha khuutsya imboolele Faraawo ndi babaandaayase, ni baalebe be mu ntsu ya paapa wase boosi, abe babaamenya mu Kanaani, ari beetsile.

³²Ise kane imuboolele ndi, inywe muli babaayi be kamasheese ni tsimbusi, ate muli ni bibyaayo bibiindi. Imuboolele indi, mweetsile ni nabyo byoosi, nga mulimo kamasheese ni tsimbusi, ni tsikhaafu, ni bibyaayo bibiindi.

³³Nashiryo nga Faraawo waabalaangile, ne waabareeba ari, ‘Kumulimo kweenywe mulimo shiina?’

³⁴Inywe mumwiilamwo muri, ‘Ifwe khuli babaayi be bibyaayo, buulamu bweefwe bwoosi, nga baakuuka beefwe ni baakholatsaka.’ Ni lwe lomo iyo, kane abafukiilise inywe khuumenya i Gosheni.” Yusufu aaloma shino lwekhuuba abe ba Misiri sibakana baaba babesanwa be babaandu babaali babaayi be kamasheese ta.