Read lumasaaba Khuurakikha 47 Bible Online

Khuurakikha 47 - lumasaaba bible

Khuurakikha 47

¹Aryo Yusufu waatsya isi Faraawo, waamuboolela ari, “Paapa wase ni babaandaayase beetsile khukhwaama mu shibala sha Kanaani. Beetsile ni kamasheese kaabwe, ni tsikhaafu atweela na buli shiindu shoosi sheesi bali nasho. Beetsile boolile mu shisiintsa she Gosheni.”

²Nga ashiili khuutsyayo ta, aanyoowa waaroboramo babaandaaye baraano waatsya ni nabo, waabayila isi Faraawo.

³Kila Faraawo abareeba ari, “Kumulimo kweenywe mulimo shiina?” Nabo baamwiilamwo bari, “Musakhulu, ifwe babaakaanisi boowo khuli babaayi be kamasheese, nga baakuuka beefwe boosi ni baaba.”

⁴Baalooselakho baamulomela bari, “Khweetsile khuumenyakho mu shibala shino, lwekhuuba mu shibala she Kanaani iliyo intsala ingali naabi, ni bibyaayo byeefwe sibilikho ni bunyaasi ta. Shikila khukhuloomba khuri ukhufukiilile ifwe babaakaanisi boowo, khumenyekho mu shisiintsa sha Gosheni.”

⁵Faraawo waalomela Yusufu ari, “Shili shiilayi khuubona ndi paapa woowo ni babaandaayo boolile ano.

⁶Ne bona shibala she Misiri shoosi shili mu bunyala bwoowo, n'ubayile bamenye mu shisiintsa she shibala shino shishifuura buulayi. Ne nambaasa ndi batsye bamenye i Gosheni, nga nisho shiifwo shishiminyisayo buulayi. Ne siinga ibawo batweela khu nibo babaali babaayi baalayi, ubayile babe nga balolelela bibyaayo byase nase.”

⁷Lwanyuma Yusufu waareera paapawe Yakobo isi Faraawo, waamumwokesa. Nga isho shaweele shiryo, Yakobo waaloombela Faraawo tsikhabi.

⁸Faraawo waamureeba ari, “Iwe aluno woolesa kimiiko kyeenga kye buukhulu?”

⁹Yakobo waamwilamwo ari, “Kimiiko kyase kye bukyeendaani ari kyaayola kimiiko shitoondo shitweela ni kamakhumi kataru (130). Kimiiko ikyo kyaayimbeela kimisiro luundi kye biwaangafu. Nikyo sikyoolana ni kimiiko kyeesi baakuuka baase baahangala, nga bakyeendaana ta.”

¹⁰Lwanyuma Yakobo waaloombela Faraawo tsikhabi tsitsakamayo, waarurawo waatsya.

¹¹Aryo Yusufu waawuliilisa byeesi Faraawo aamulomela, waayila paapa weewe ni babaandaaye, waabawa bye buyiindifu mu shisiintsa shishifuura buulayi mu shibala isho she Misiri, mu shisiintsa she Ramusesi.

¹²Yusufu waawa paapa weewe, ni babaandaaye, ni babaandu be muungo mwa paapa weewe, khuusiintsiila khu bukali bwe babaana, biilyo bibibamala boosi.

¹³Intsala yalya naabi, shaakila yaataambawo biilyo buli aandu oosi. Babaandu be mu Misiri ni be mu Kanaani, bataambataamba naabi lwe ntsala iyo.

¹⁴Baryo babaandu ni beetsa khuukulaka bilyo, Yusufu waaba nga abuusa tsinusu tsoosi khukhwaama khu baandu be Misiri ni be mu Kanaani, waatsiyila mu lubili lwa Faraawo.

¹⁵Babaandu boosi tsinusu tsaabawakho, shikila ba Misiri beetsa isi Yusufu baamulomela bari, “N'ukhuwe biilyo! Ukana ifwe khufwe nga iwe waaloleleele busa? Tsinusu tsoosi tsaakhuweelekho.”

¹⁶Kila Yusufu abeelamwo ari, “Ni mutsye mureere bibyaayo byeenywe, siinga muba nga simuli ni tsinusu ta, ise kane imbawe biilyo.”

¹⁷Khukhwaamila abweene awo, babaandu baatsya baareera bibyaayo byaabwe isi Yusufu, naye waabawa biilyo, nga akulaanisamwo ni tsiŋwaaŋwa, kamasheese, tsimbusi, tsikhaafu, ni tsisikilya. Mu mwiiko ukwo kwoosi, waaba nga akulaanisamwo biilyo ni bibyaayo byeesi baareera.

¹⁸Mu mwiiko kukweelakho babaandu beetsa luundi isi Yusufu, baamulomela bari, “Musakhulu, ifwe singene khwiibisabise khuri khuli buulayi ta! Tsinusu tsoosi tsaakhuweelekho, ari bona ni bibyaayo nabyo byoosi bili mu makhono koowo. Ari mbaawo sheesi khuramile nasho sheesi khunyala khwaakhwookesa ta, khuurusakho kimibili kyeefwe ni liiswa lyeefwe.

¹⁹Ukhakhulekha khwaahela nga waaloleleele busa uryo ta! Khuloomba khuri ukhukule ifwe fabeene atweela ni liiswa lyeefwe lyeene, ukhuwemo biilyo. Ifwe kane khwikyele baakulwa ba Faraawo, niye ayile ni liiswa lyeefwe lyeene. N'ukhuwe bumiitso, khunyalise khuuba baalamu, ni liiswa lyeene lilekhe khuba awo busa ta.”

²⁰Aryo Yusufu waakula liiswa lyoosi lye mu Misiri khulwa Faraawo. Lwekhuuba babaandu be mu Misiri boosi, buli mutweela aakulisa liiswa lyeewe lwe intsala iyaba imbi naabi. Liryo liiswa lyoosi lyeekyela lya Faraawo.

²¹Musaambo iyo, Yusufu weekyelisa buli mutweela khuuba umukulwa wa Faraawo, khukhwaama mu shisiintsa she Misiri shitweela khuutsya mu shiindi.

²²Liiswa lilyarama lyeesi aakhaakula ta, nilyo lilyaba lye basaayi, lwekhuuba nibo baafunatsaka bibibamala khukhwaama wa Faraawo. Isho nisho shishakila baalekha khukulisa liiswa lyaabwe ta.

²³Lwanyuma Yusufu waalomela babaandu ari, “Ari mwaamanyile buulayi muri ise naabakulile inywe mwabeene, atweela ni liiswa lyeenywe khulwa Faraawo. Bona indikhuubawa bumiitso mutsye mubyaale mu mikuunda.

²⁴Ne nga imbuka iye likyesa yoolile, muli ni khuureera shisiintsa shitweela she kharaano isi Faraawo. Inywe mwabeene mwiramisile bibiramile khuuba biilyo byeenywe ni be muungo mweenywe.”

²⁵Nabo babaandu baamwiilamwo bari, “Iwe waawonesile buulamu bweefwe, waabeele umulayi isi khuli, nashiryo musakhulu, ifwe kane khube baakulwa ba Faraawo.”

²⁶Aryo Yusufu waarusa likaambila khuutsya mu Misiri mwoosi, liliwaamba khu shisiintsa shitweela she kharaano she bibikyesebwa byoosi khuuba sha Faraawo. Likaambila lino lishiiliyo khukhwoolesa ni shaleelo shino. Khuurusakho liiswa lye basaayi lyonyene nilyo lilikhali mu bunyala bwa Faraawo ta.

²⁷Babaandu ba Isiraeli baaba nga bamenya mu shisiintsa sha Gosheni, ibweene iyo baaba bayiindifu naabi, naluundi basaalana, lisaaye lyaaba liboofu naabi.

²⁸Yakobo waamenya mu Misiri khuumala kimiiko likhumi na musaafu, khukhwoolesa ni oolesa kimiiko kye buukhulu shitoondo shitweela ni kamakhumi kane na musaafu (147).

²⁹Ne imbuka yeewe iye khuufwa ni yoola, Isiraeli walaanga umusooleli weewe Yusufu waamulomela ari, “Iwe siinga uba nga ungana ise, ikhuloomba ure kumukhono[38] kwoowo mu maraango kaase untsitsubile uri kane untsokesanise shiisa ni bubwiyikinwa. Intsitsubile uri singene usiikhe ise mu Misiri muno ta.

³⁰Ne nikane imbe nga naafwiile, ukhaasute kumulaambo kwase khukhwaama ano mu Misiri, umbile usiikhe isi baasiikha baakuuka baase.” Yusufu waamwiilamwo ari, “Ise kane ikhole nga n'ulomile.”

³¹Yakobo waalooselakho ari, “Ingana ukholele ise shishitsubo, khukhwookesanisa uri ukhaasikhole.” Yusufu waakhola shishitsubo isho, Yakobo weenamisa kumurwe kweewe, imurwe we bulili bweewe waasiima.