Read lumasaaba Khuurakikha 48 Bible Online

Khuurakikha 48 - lumasaaba bible

Khuurakikha 48

¹Lwanyuma nga imbuka yaabirirewo, yabawo umuundu uwatsya waaboolela Yusufu ari paapa weewe mutsiina naabi. Aryo Yusufu wenyukhilamo waatsya khuumubona, nga ali atweela ni basooleli beewe Manase ni Efurayimu.

²Nga Yusufu woolileyo, baatsya baaboolela Yakobo bari, “Umusooleli woowo Yusufu weetsile khuukhubona.” Yakobo weekumisa, wenyukha wekhala khu bulili bweewe.

³Kila Yakobo alomela Yusufu ari, “Wele Umunyali wa byoosi, aambonekhela ise i Luzi, mu shibala sha Kanaani, waamba tsikhabi,

⁴nga anomela ari, ‘Indi khuutsya khuukhuwa babaana baakali, imbalaayise lisaaye lyoowo, likyele kamanaambo kamakali. Naluundi, indi khuutsya khuukhuwa iwe liiswa lino khuuba lilyoowo ni babaandu be muungo mwoowo.’ ”

⁵Yakobo waalooselakho shishiindi ari, “Yusufu, babaana boowo besiinde babili abo Efurayimu ni Manase, beesi wasaalila ano mu Misiri, nga ise ishiili khukhwoola ano, bali babaase, nga Rewubeni ni Simeoni ni bali.

⁶Ne lwanyuma babaana besiinde babaandi beesi ulisaala lwanyuma, baliiba baboowo. Ni busikha bweesi nibo balifuna, balibufuna khuubirira mu baandaayabwe Efurayimu ni Manase.

⁷She kumutaambo kumukali maayi woowo Rakeli, aafwa nga indi khu lukyeendo khuukobola khukhwaama i Padani mu shibala sha Kanaani, shishikhali aleeyi ni Efurasi ta. Ise namusiikha aambi ni kumukhoosi kukuutsya i Efurasi, (nga nisho Beselehemu).”

⁸Ne Yakobo n'abona babaana besiinde ba Yusufu, waareeba ari, “Babaana bano nibo ba naanu?”

⁹Yusufu welamo ari, “Bano bali babaana baase beesi Wele ambeelele ano mu Misiri.” Yakobo waalomela Yusufu ari, “Basyeende ano isi indi imbawe tsikhabi.”

¹⁰Ne tsimoni tsa Yakobo abe tsilikho luukhaleesi lwe kamakoro, nga sitsibona buulayi ta. Aryo Yusufu waasyeenda babaana abo isi Yakobo, waabakwa mu shifuba, waabakhupa khu saya.

¹¹Yakobo waalomela Yusufu ari, “Abe ise sinayambaasakho ndi indilayo khuukhubonakho ta. Ne bona ari Wele waanyalisisile ise khuubonakho ni babaana boowo.”

¹²Lwanyuma Yusufu waarusayo babaana tsana khukhwaama khu paapawe Yakobo, waakyelawo weenamisa kumurwe kweewe aasi khwiloba iburaangisi wa paapa weewe.

¹³Nga waamalile aryo, wenyukha waayila babaana beewe tsana isi Yakobo. Waayila umukyeekhe nga niye Efurayimu, waamura khu luwaande lunyeletsi lwa Yakobo, ne Manase niye waamura khu luwaande lwe kumukhono kweewe kumulayi.

¹⁴Ne Yakobo waayila kumukhono kweewe kumulayi waakura khu murwe kwa Efurayimu, abe yakhaba nga niye abe umukyeekhe, ni mukhono kweewe kumunyeletsi waakura khu murwe kwa Manase, uwaba nga niye umukhulu.

¹⁵Lwanyuma waaloombela Yusufu tsikhabi nga aloma ari, “Khali Wele isi kuuka wase Iburayimu ni paapa wase Isaaka besaayatsaka aweele babaana bano tsikhabi, umweene uyo niye ubeelatsakile ni nase buulamu bwase bwoosi, khukhwoolesa shaleelo shino,

¹⁶ni malayika weewe uwuniindatsakile ise, khali aweele babaana bano tsikhabi! Inoomba ndi khali lisiina lyase, ni lisiina lya Iburayimu, ni lya Isaaka, kelooseele khuubirira mu baana bano! Inoomba ndi khali Wele abaweele babaana baakali, baba ni lisaaye liikali lilyeene limalatana khu shibala!”

¹⁷Yusufu waakhalala naabi lweesho sheesi paapawe aakhola she khuura kumukhono kumulayi khu Efurayimu, kila atsya waarusa kumukhono ukwo khukhwaama khu murwe kwa Efurayimu, waakura khu murwe kwa Manase.

¹⁸Kila alomela paapawe Yakobo ari, “Paapa, waakhukhola buulayi ta. Umwaana umukhulu niy'ooyu, niye isi uba urakho kumukhono kwoowo kumulayi khu murwe kweewe.”

¹⁹Ne paapawe waaloba, nga aloma ari, “Ise naamanyile sheesi indi khuukhola, samweene naamanyile. Lisaaye lya Manase kane libe liikali, kane babe babaandu be kamaani. Ne waandaaye umukyeekhe yuno, kane abe amufuurakho niye, ni lisaaye lyeewe kane lyaamemo kamanaambo kamakali naabi.”

²⁰Musaambo iyo, waaba nga abawa tsikhabi khu shifukhu isho, nga aloma ari, “Babaandu ba Isiraeli kane baraambisatsake kamasiina keenywe ni baliba nga baloomba tsikhabi. Bakhaakaraambisatsake nga baloma bari, ‘Khali Wele akhuweele iwe tsikhabi nga n'aawa Efurayimu ni Manase.’ ” Aryo musaambo iyo, Yakobo waaraangisa Efurayimu iburaangisi wa Manase.

²¹Lwanyuma lweebyo byoosi, Yakobo waalomela Yusufu ari, “Nga n'umbona uri, ise ari indi aambi khuufwa. Ne Wele kane abatsake ni nawe, khukhwoolesa n'akhaakhwiiseyo mu shibala she baakuuka boowo.

²²Ise indi khuukhuwa iwe shibala she tsingoongo she liiloba liilayi, ne akhuba isi babaandaayo ta. Indi khuukhuwa iwe shisiintsa shishifuurakho she babaandaayo, sheesi nanuula khukhwaama khu ba Amori, nga inaambisa buyiingo ni bufumo.”