Read lumasaaba Khuurakikha 49 Bible Online

Khuurakikha 49 - lumasaaba bible

Khuurakikha 49

¹Lwanyuma lwa byoosi Yakobo walaanga atweela basooleli beewe, waabalomela ari, Ni mwiitse atweela baana baase, ni mwiitse nio ise inyalise khuubaboolela inywe biilomo bibikane bibabekho mu biseela bye buraangisi.

²Ni mwibuuse atweela mwiitse murekeerese, inywe baana ba Yakobo, muwuliilise buulayi isi paapa weenywe Yakobo aloma.

³Rewubeni, iwe uli umusooleli wase umukiboole, iwe niye kamaani kaase, khaabonelo khakhaanyoowa khe kamaani kaase, iwe ufuurisa boosi mu lukoosi, naluundi ufuurisa boosi mu bunyala.

⁴Iwe uli busa nga kameetsi kakaatasile, uryo singene ube ufuura ta, lwekhuuba iwe waaniina khu shitaanda sha paapa woowo, waakona n'umukhasi wase, waatsya khu bulili bwase waabwoonakisa.

⁵Simeoni ni Levi bali waandaaye na waandaaye. Nibo baraambisa tsiindima tsaabwe khuureera bituluungu.

⁶Ise singene ni tubaase mu nganikha yaabwe ta, namwe ni tubaase mu lubusano lwaabwe ta, lwekhuuba baakhoonyaka babaandu mu lirima liikali naabi, khu lwe bibyambaaso byaabwe biibi, baafuniaakaka bikyele bye tsiyeeyi.

⁷Ari indi khuutsuba lirima lyaabwe ilyo, lwekhuuba lili liibi naabi, ni khuutunduuma khwaabwe khuurafu naabi ukhwo! Indyo kane imbasalanise mu shibala sha Isiraeli shoosi.

⁸Yuda iwe, babaandaayo bakhaakhubwiyilise naabi, kane ukokatsake baasiku boowo mu milo. Ni babaandaayo bakheenamisatsake kimirwe kyaabwe aasi nga bakhuwa iwe shiriifwa.

⁹Yuda iwe uli busa nga italanyi, niyo imala khukhwiira isaanyi yayo, yaamala yeelayo mwifuluma lyayo. Yeelayo yeyalisa busa aasi yaakona. Uli busa nga italanyi ikhasi indafu, mbaawo shishinyala shaakiriisariisa ta.

¹⁰Yuda akhaawaambatsake imiimbo iye buunyala, ni miimbo iye buunyala nyene iyo ikhaaramatsake mu mukhono kwe babetsukhulu beewe, khukhwoolesa n'iliitsa yoole mu makhono k'omwitsukhulu weewe umutuufu. Ni babaandu be kamanaambo koosi balimureerera biiwaanwa nga bamuwa shiriifwa she khuumuwulilatsaka.

¹¹Yuda akhaabowatsake busa tsisikilya tseewe khu mizabibu kikifuurayo buulayi, nga asiingila tsingubo tseewe mu viini ifuurayo buulayi, ifwaane busa nga kameetsi.

¹²Ni tsimoni tseewe tsibeseme lwe viini isi akhaanywatsake, ni kameeno keewe kakhose naabi lwe khuunywa naabi kamabeele.

¹³Zebuluni niye akhaamenyatsake khu ndulo khwe nyaantsa. Shisheene isho shikhaabe shiifwo she lukoosi isi tsimeeri tsikhaawolele. Lulwaakha lweewe lukhaatsye lwoole i Sidoni.

¹⁴Isakaari niye ali busa nga isikilya iye kamaani, ifukiilila baakityuukhisa busa busiro tsimbeka tsoombi.

¹⁵Ne n'abona ari shiifwo she khuuwolelamwo shili shiilayi, ni liiswa nga ni lili lilikhoyesa, enama aasi khuusuta bisutwa, shaakila wekyela uraamba nga umukulwa.

¹⁶Dani niye akhaabe umukayi we babaandu beewe, nga niye n'ali mutweela khu baandu ba Isiraeli.

¹⁷Dani akhaabe busa nga indemu iyibisile khu ndulo khwe kumukhoosi, nga indemu iye buutwa khu ntsila, iluma shibutusi she ŋwaaŋwa, ni nooyo ukikyeendelakho awaanukha, wekhupa aasi.

¹⁸O Umukasya weefwe, ise iniindilila khukhwiitsa khwoowo, wiitse ukhuwonese ifwe.

¹⁹Gadi niye baanuuli bakhaamwibwakale, ne niye akhaashuukhe busa ari abebwaakale nibo.

²⁰Asheri akhaalye biilyo bye kumuŋaawo kumukali naabi, akhaafune biilyo bibyaakhila umuyiinga.

²¹Nafutali ali busa nga ikhisi indekhuule, ireera biilomo biilayi.

²²Yusufu ali nga kuusaala kumusabibu, kuusaala kumusabibu kukwaana kamatuunda nga kuli aambi ni sebele, tsisakya tsakwo tsiniinila khu litikiiyi.

²³Baasiku beewe bamwibwakala nga bali ni bufumo, baamutimisa nga bali ni buyiingo atweela ni bufumo.

²⁴Ne niye arama nga wahaandalale buulayi, ni kamakhono keewe kaba ke kamaani, lwe buunyala bwa Wele wa Yakobo Umunyali wa byoosi, naluundi lw'Omwaayi we kamasheese, umuliindi wa Isiraeli.

²⁵Buyeeti bwoowo bwaama isi Wele, isi paapa woowo esaayatsaka, bwaama isi Wele Umunyali wa byoosi. Wele akhaakhuwe iwe tsikhabi khukhwaama mu ngaaki, ni tsikhabi tsitsiindi khukhwaamila aasi mwiloba, ni tsikhabi tse khuuba ni lisaaye liikali, ni bibyaayo biikali.

²⁶Tsikhabi tseesi paapa woowo akhuwa tsili tse lisuno naabi khuufuurakho bibiindu biilayi bibyaama mu njiinji tse khaalekho. Khayo tsikhabi tsino tsoosi tsiikhe khu murwe kwa Yusufu, tsikhabi tsino tsiikhale khu bweeni bwoowo, lwekhuuba waarobolebwa khuuba uraangilila babaandaayo boosi.

²⁷Benyamini niye ali nga Khaatsuutse khaarafu naabi, khakhaawuuna kumutikhinyi khaahesa baasiku baakho, ni angoloobe khaakabananisamwo bye buyiindifu byaabwe.

²⁸Bino nibyo biikuuka likhumi na bibili bye babaandu ba Yakobo, naluundi bino nibyo biilomo bye tsikhabi byeesi paapa waabwe aabakanikhakho, nga awa buli mutweela khu nibo tsikhabi tsitsimwaakhila.

²⁹Lwanyuma kila Yakobo awa basooleli beewe biilakilo bino ari, “Imbuka yase ari yoolile intsya khufwa. Ingana mutsye muusiikhe ise aambi ni ba paapa baase mwifuluma, liliili mu mukuunda kwa Efuroni umu Hiti.

³⁰Mwifuluma liliili i Makipela, aambi ni Mamure, shishiili mu Kanaani. Iburayimu aakula liifuluma khukhwaama khu Efuroni umu Hiti, atweela ni kumukuunda kweene kwoosi.

³¹Mu bweene umwo, nimwo mweesi baasiikha Iburayimu atweela n'umukyelama weewe Sara. Naluundi mu bweene umwo nimwo mweesi Isaaka n'umukyelama weewe Rebeka baasiikhibwa. Ni nase nasiikha Leya mu bweene umwo.

³²Lifuluma ilyo ni kumukuunda kweesi lilimwo, byakulibwa khukhwaama khu ba Hiti.”

³³Nga Yakobo waamalile khuukanikha biilomo ibyo isi basooleli beewe, weeyalisa khu bulili bweewe waafwa na khufwa.