Read lumasaaba Khuurakikha 5 Bible Online

Khuurakikha 5 - lumasaaba bible

Khuurakikha 5

¹Luno nilwo luruungo lwe babetsukhulu ba Adamu. Wele n'abuumba umuundu, aamubuumba mu shifwaani shisheewe shisheene.

²Wele aababuumba umuseetsa n'umukhasi, lwanyuma waabawa tsikhabi, waabalaanga ari babaandu baalamu.

³Nga Adamu wahaangaale woolesile kimiiko shitoondo shitweela ni kamakhumi kataru (130) kye buukhulu, waafuna umwaana umusiinde, uwaba afwaananila ilala nga niye umweene, waamutwiikha lisiina ari Seezi.

⁴Lwanyuma lwooyo, Adamu aawangala woolesa kimiiko bitoondo shinaane (800). Adamu aasaalayo babaana babaandi besiinde ni bekhaana,

⁵lwanyuma waafwa nga waayolesa kye buukhulu bitoondo syeenda ni kamakhumi kataru (930).

⁶Nga Seezi woolesile kye buukhulu shitoondo shitweela na kiraano (105), waafuna umwaana umusiinde, waamutwiikha ari Enoshi.

⁷Lwanyuma lwooyo, Seezi aawaangala woolesa kye buukhulu bitoondo shinaane na musaafu (807). Seezi aasaalayo babaana babaandi besiinde ni bekhaana.

⁸Lwanyuma waafwa nga waayolesa kye buukhulu bitoondo syeenda ni likhumi na kibili (912).

⁹Nga Enosi woolesile kye buukhulu kamakhumi syeenda (90), waafuna umwaana umusiinde, waamutwiikha lisiina ari Kenani.

¹⁰Lwanyuma lwooyo, aawaangala woolesa kye buukhulu bitoondo shinaane ni likhumi na kiraano (815). Enosi aasaalayo babaana babaandi besiinde ni bekhaana.

¹¹Lwanyuma waafwa nga waayolesa kye buukhulu bitoondo syeenda na kiraano (905).

¹²Nga Kenani woolesile kye buukhulu kamakhumi musaafu (70), waafunayo umwaana umusiinde, waamutwiikha lisiina ari Mahalaleli.

¹³Lwanyuma lwooyo, aawaangala woolesa kye buukhulu bitoondo shinaane ni kamakhumi kane (840). Kenani aasaalayo babaana babaandi besiinde ni bekhaana.

¹⁴Lwanyuma waafwa nga waayolesa kye buukhulu bitoondo syeenda ni likhumi (910).

¹⁵Nga Mahalaleli woolesile kye buukhulu kamakhumi kasesaba na kiraano (65), waafunayo umwaana umusiinde, waamutwiikha lisiina ari Yaredi.

¹⁶Lwanyuma lwooyo, aawaangala woolesa kye buukhulu bitoondo shinaane ni kamakhumi kataru (830). Mahalaleli aasaalayo babaana babaandi besiinde ni bekhaana.

¹⁷Lwanyuma waafwa nga waayolesa kye buukhulu bitoondo shinaane ni kamakhumi syeenda na kiraano (895).

¹⁸Nga Yaredi woolesile kye buukhulu shitoondo shitweela ni kamakhumi kasesaba na kibili (162), waafunayo umwaana umusiinde, waamutwiikha lisiina ari Enoka. Yaredi aasaalayo babaana babaandi besiinde ni be khaana

¹⁹Lwanyuma lwooyo aawaangala woolesa kye buukhulu bitoondo shinaane (800). Yaredi aasaalayo babaana babaandi besiinde ni bekhaana

²⁰lwanyuma waafwa nga woolesile kye buukhulu bitoondo syeenda ni kamakhumi kasesaba na kibili (962).

²¹Nga Enoka woolesile kye buukhulu kamakhumi kasesaba na kiraano (65), waafunayo umwaana umusiinde, waamutwiikha lisiina ari Mesusela.

²²Lwanyuma lwooyo, Enoka aawaangala woolesa kye buukhulu bitoondo bitaru (300), nga ali mu butweela naabi ni Wele. Enoka aasaalayo babaana babaandi besiinde ni bekhaana.

²³Kimiiko kyoosi kyeesi Enoka aawaangala atweela kyoola bitoondo bitaru ni kamakhumi kasesaba na kiraano (365).

²⁴Enoka aamala buulamu bweewe bwoosi nga ali mu butweela naabi ni Wele, lwanyuma waakoraanawo busa, lwekhuuba Wele aamuyila.

²⁵Mesusela nga woolesile kye buukhulu shitoondo shitweela ni kamakhumi shinaane na musaafu (187), waafunayo umwaana umusiinde waamutwiikha lisiina ari Lameka.

²⁶Lwanyuma lwooyo aawaangala woolesa kye buukhulu bitoondo musaafu ni kamakhumi shinaane na kibili (782). Mesusela aasaalayo babaana babaandi besiinde ni bekhaana.

²⁷Lwanyuma waafwa nga woolesile kye buukhulu bitoondo syeenda ni kamakhumi kasesaba na syeenda (969).

²⁸Lameka nga woolesile kye buukhulu shitoondo shitweela ni kamakhumi shinaane na kibili (182), waafunayo umwaana umusiinde.

²⁹Lameka waaloma ari, “Kane imutwiikhe lisiina ndi Nowa, lwekhuuba niye anakhuwosawosakho mu khurekana khuukali khweesi khubiramwo nga khuraamba lwe shitsubo sheesi Umukasya aatsuba liloba.”

³⁰Lameka aawaangala woolesa kye buukhulu bitoondo biraano ni kamakhumi syeenda na kiraano (595). Lameka aasaalayo babaana babaandi besiinde ni bekhaana.

³¹Lwanyuma waafwa nga woolesile kye buukhulu bitoondo musaafu ni kamakhumi musaafu na musaafu (777).

³²Nowa nga woolesile kye buukhulu bitoondo biraano (500), waafunayo babaana besiinde bataru nga nibo Shemu, Hamu, ni Yafesi.