Read lumasaaba Khuurakikha 6 Bible Online

Khuurakikha 6 - lumasaaba bible

Khuurakikha 6

¹Babaandu nga ni beloosela khuuyiimba khu shibala, ni babaana bekhaana baaba nga basaalikha mu bukali,

²basooleli be ba wele baabona nga bakhaana bano bali baamiliwu naabi, kila beekha khu shibala khuuyilaka abo beesi baasiima.

³Kila Umukasya aloma ari, “Ise singene indekhe kumuukha kwase kwe buulamu khuumenya mu baandu biilo ni biilo ta, lwekhuuba nibo bali babaandu buundu. Ari buuleeyi bwe biifukhu by'omuundu kane byoole busa kimiiko shitoondo shitweela ni kamakhumi kabili (120).”

⁴Mu biifukhu ibyo, ni lwanyuma lwayo, aabawo ba Nefilimu khu shibala, babasaalikhana lwanyuma lwe basooleli be ba wele ni bakhaana be babaandu khuuyilana. Kino kyaba kimisaani kye kamaani kye mu biseela ibyo, nga nikyo kili kimisaani kikyamanyikhana naabi.

⁵Umukasya waabona nga buubi bwe babaandu bwelooseele luukali khu shibala, naluundi nga buli shiindu shoosi sheesi baaba bambaasa mu myoyo kyaabwe, shabatsaka shiibi shonyene buli mbuka.

⁶Nashiryo Umukasya kumutaambo kwaamuwaamba, weesonesa lwashiina aabuumba umuundu waamura khu shibala. Lwe kumutaambo kumukali ukwo,

⁷kila aloma ari, “Ari intsya khuhesa babaandu boosi, beesi ise samweene nabuumba naara khu shibala, bawewo. Indi khuutsya khuhesa na bisolo byeene, ni bibyalaamila aasi, ni binywiinywi byoosi. Lwekhuuba ise nisonesa lwashiina nabibuumba.”

⁸Ne Nowa yenyene niye isi Umukasya ekhoyela.

⁹Luno nilwo luukano luluwaamba khu Nowa. Nowa yenyene niye uwaba umusaani umukwalaafu mu muboolo kweewe khu shibala. Niye aamenyatsaka mu butweela ni Wele.

¹⁰Nowa yuno aaba ni basooleli bataru, nga nibo Shemu, Hamu ni Yafesi.

¹¹Wele waabona nga shibala shetsuule naabi buumoyaani, ni bituluungu nga byaasalanila buli aandu oosi khu shibala.

¹²Wele waalola khu shibala, waabona shetsuule buubi bwonyene, ni byeesi babaandu boosi bakhola nga biibi byonyene.

¹³Kila Wele alomela Nowa ari, “Ise naakhaliilewo ilala khuuhesa shibala ni babaandu boosi babaashilikho. Lwekhuuba shibala shetsuule buubi bwonyene khulwaabwe. Nashiryo intsya khubahesa nibo atweela ni shibala sheene shoosi.

¹⁴Ari iwe ni wiyombekheleyo wamweene likhoŋolo, nga uraambisa tsimbaawo tsindayi tse kuusaala goferi, mukari mwalyo uremo biseenge, ne mukari mweene ni khu ngaaki umaalekho ni patii.

¹⁵Khola likhoŋolo lino lyoolese tsimita shitoondo shitweela ni kamakhumi kataru na tsitaru (133) buuleeyi, tsimita kabili na tsibili buubalaayi, ni tsimita likhumi na tsitaru (13) khuuniina mu ngaaki.

¹⁶Khu ngaaki khwalyo wombekhekho shisuli, ulekhekho khabaanga khakhoolesa tsi sentimita kamakhumi kane na tsine (44) akari e shisuli ni mu mbafu mwalyo. Kane ulyoombekhe nga uramo tsinuungo tsitaru, urekho kumulyaango mu ndulo.

¹⁷Indi khuutsya khusiindikha khuusalasala khwe kameetsi, kamalaatane khu shibala shoosi, kahese buli shiindu shoosi shishiilimo kumuukha kwe buulamu. Buli shiindu shoosi khu shibala shitsya khuhela.

¹⁸Ne ise kane ikhole indakaano yase ni nawe, ni nawe uryo ukhenjile mu likhoŋolo atweela n'umukhasi woowo, ni basooleli boowo, atweela ni bakhasi baabwe.

¹⁹Iwe uli ni khukhwiinjisa mu likhoŋolo biilamu bibili bibili, shiseetsa ni shikhasi, nio binyale khuuramawo nga bili biilamu atweela ni nawe.

²⁰Bili ni khuuba binywiinywi bibili bibili bya buli saambo, bisolo nabyo bibili bibili nabyo bya buli saambo, ni neebyo bibyalaamila aasi bibili bibili bya buli saambo. Bino byoosi kane bibe ni nawe nio bibe biilamu.

²¹Naluundi ubuungeyo biilyo bibiliibwa bya buli saambo yoosi, bibyoowo, ni bibyabyo.”

²²Aryo Nowa waakhola bibiindu byoosi nga Wele n'amulakila.