Read lumasaaba Khuurakikha 9 Bible Online

Khuurakikha 9 - lumasaaba bible

Khuurakikha 9

¹Nga bino byaweele, kila Umukasya awa Nowa ni basooleli beewe tsikhabi nga aloma ari, “Ni musaalane, mubalaahe, mwitsule khu shibala shoosi.

²Bisolo byoosi bye khu shibala ni binywiinywi byoosi, ni bibyalaamila aasi byoosi, atweela ni tsinyeeni tseene, kane bibaryaatsake inywe babaandu. Bino byoosi ise naabireere aasi eenywe.

³Buli shitweela khu biindu bino byoosi, naabibaweele khuuba she khuulya, khuutubaasa khu bilime byoosi bye mu shibala, khuuba biilyo byeenywe.

⁴“Buulamu buli mu mafuki, nashiryo mukhalya inyama nga ishiilimwo kamafuki ta.

⁵Siinga ibawo umuundu umalawo buulamu bw'owashe, uwiirire uyo kane aweebwe shitaambiso. Ni isolo yoosi ikane imalewo buulamu bw'omuundu, inyene iyo kane injiwe shitaambiso.

⁶Umuundu yeesi ukane akhoonye umuundu washeewe, naye aakha khukhwiiribwa n'umuundu ukuundi, lwekhuuba buli muundu yeesi aabuumbibwa mu shifwaani sha Wele.

⁷“Ne ingana iwe usaale babaana baakali, ni nabo basaalane luukali babalaahe, babalaahe khu shibala shoosi.”

⁸Lwanyuma Wele waalomela Nowa atweela ni basooleli beewe ari,

⁹“Shaleelo shino, indikhuukhola indakaano yase ni nawe, naluundi indi khuukikhola ni babetsukhulu boowo boosi babaliilawo lwanyuma lwoowo.

¹⁰Indakaano yino iyililamwo ni biilamu byoosi bibiili atweela ni nawe, nga nibyo binywiinywi byoosi, ni bibyaayo, ni tsisolo tse mwirome tsoosi, bisolo byoosi bibyarura khukhwaama mwikhoŋolo ni nawe.

¹¹Ari ni biilomo bino, indikhuukhola indakaano yase ni nawe, nga iloma iri: Siilibawo luundi kameetsi kakaaliitsa khu shibala kahese biilamu luundi ta, namwe ndi silibawo luundi kameetsi khuuhesa shibala ta.”

¹²Indi luundi Wele waaloma ari, “Indikhuurawo khaabonelo khe ndakaano isi ise ndi khuukhola ni nawe, atweela ni biilamu byoosi bibiili ni nawe, khulwe kimiboolo kikiitsa mu moni:

¹³Indikhuurawo luufutu lwase mu namufweeli. Luufutu luno kane lubatsake khaabonelo khe ndakaano akari aase ni shibala.

¹⁴Buli lweesi kane indeeratsakile namufweeli khu shibala, ni luufutu lwaabonekha mu namufweeli uyo,

¹⁵ise kane ishebulilatsake indakaano yase akari aase ni nanywe, atweela ni biilamu bya buli saambo yoosi. Kameetsi sikaliilayo keetsule luundi khuuhesa biilamu byoosi ta.

¹⁶Buli lweesi kane luufutu lubonekhatsakile mu namufweeli, ikhaalulolatsakekho ishebulile indakaano ikhaliwawo ta akari aase, ni biilamu byoosi bibiili khu shibala.”

¹⁷Kila Wele alomela Nowa ari, “Khano khali khaabonelo khe ndakaano isi ise ikholile akari aase ni bibiindu biilamu byoosi bibiili khu shibala.”

¹⁸Basooleli ba Nowa babaarura khukhwaama mwikhoŋolo baaba nibo Shemu, Hamu, ni Yafesi. (Lwanyuma Hamu niye uwaba paapa wa Kanani.)

¹⁹Bano nibo babaaba basooleli bataru ba Nowa, babaasaala lisaaye lye babaandu khu shibala shoosi.

²⁰Nowa aaba umusaani umulimi, niye uwanyoowela ilala khuubyaala kumukuunda kwe kimizabibu.

²¹Shifukhu shitweela aanywa iviini, waameela waakona mu lisari lyeewe nga ali bukhuna busa.

²²Ne Hamu, uwaba paapa wa Kanaani ni enjila mu lisari, waabona paapawe bukhuna, weelayo ibulafu waaboolela babandaaye baabili.

²³Ne Shemu ni Yafesi baayila ingubo, baatsya nga baakiwaambiile inyuma khu mabeka khwaabwe. Baakyeenda baatsya mu lisari nga batsiila kumukoongo, baabiimba paapa waabwe, nga baakhubonakho buukhuna bweewe ta.

²⁴Ne Nowa n'asisimukha nga bumeesi bwaamuweelekho, naluundi nga waamanyile sheesi umusooleli weewe umukyeekhe Hamu aamukhola,

²⁵waaloma ari, “Ari indi khuutsuba Kanaani! Niye kane abatsake umukulwa uwe aasi mu bakulwa, abatsake umukulwa uwe babandaaye.”

²⁶Weelayo waaloma luundi ari, “Inoomba Umukasya Wele wase awe Shemu tsikhabi ne akhole Kanaani ekyele umukulwa weewe.

²⁷Naluundi inoomba ndi khali Wele abalaayisile liiswa lya Yafesi naabi, akila babetsukhulu ba Yafesi bamenya mu shisiintsa sha Shemu, akhola Kanaani khuuba umukulwa waabwe.”

²⁸Lwanyuma lwe kameetsi, Nowa aawangala woolesa kimiiko bitoondo bitaru ni kamakhumi karaano (350).

²⁹Kimiiko kyeewe kyoosi atweela olesa kimiiko bitoondo syeenda ni kamakhumi karaano (950), lwanyuma lwayo waafwa.