Read lumasaaba 2 Samweli 11 Bible Online

2 Samweli 11 - lumasaaba bible

2 Samweli 11

¹Nga imbuka iye mu mwiiko isi abe bayiinga batsiilatsakilakho mu busoolo yoolile, Dawudi waarumana Yowabu ni liiye lyeewe khuutsya khwibwakala. Ne Dawudi umweene waarama mu Yerusalemu. Baatsya baafuntsakilila ba Amoni, bebotokhelela shiriimba Raba.

²Lutweela angoloobe, nga Dawudi alinyukhile khukhwaama mwiilo, waatsya khukeendakho khu ngaaki khwe lubili lweewe. Ni aalola aasi, waabona umukhasi umumiliwu naabi, nga ali ingo w'omuseetsa weewe, alikho esiinga.

³Dawudi waalakila ari bareeberese bibiwaamba khu mukhasi uyo. Kila ni baamala baamuboolela bari, “Umukhasi uyo bari Basisheba, umukhaana uwa Eliyamu, ne nga ali umukhasi uwa Uriya, umu Hiti.”

⁴Dawudi waarumanisa baatsya baamureera mu lubili lweewe. Kila Dawudi etubaasa ni naye. (Umukhasi yuno yaba nio aliimalile khukhwaama i masaaba.) Lwanyuma weelayo ingo weewe.

⁵Nga imbuka yaabirirewo, umukhasi yuno waashifumbula ari ali shisoombo. Shikila asiindikhila Dawudi buurume nga buloma buri, “Naayakaanila!”

⁶Kila Dawudi asiindikhila Yowabu buurume nga buloma buri, “Siindikha Uriya, umu Hiti etsekho ino.” Nashiryo Yowabu waasiindikha Uriya khuutsya isi Dawudi.

⁷Nga Uriya woolile, Dawudi waamureeba oba abe Yowabu, ni liiye, ni babaandu boosi bali buulayi.

⁸Lwanyuma Dawudi waalomela Uriya ari, “Tsya ingo woowo, wisiinge.” Uriya waarura waatsya, ne umuyiinga waamwoongesakho shiwaanwa she biilyo bye she shiilo.

⁹Ne Uriya waalekha khutsya ingo weewe ta, akhali waatsya waakona ibulafu we shilibwa shishingila mu lubili lw'omuyiinga, isi babaliinda umuyiinga bakona.

¹⁰Dawudi n'awulila ari Uriya s'atsiile ingo weewe ta, waamulomela ari, “Waamile mu lukyeendo luleeyi luryo, shiina kila ukhatsya waakonela ingo woowo?”

¹¹Uriya weelamo ari, “Isanduuku y'Omukasya, ni liiye lya ba Isiraeli ni Yuda, bili iyo mwiiswa mu bisari. Ikhaba Yowabu umuraangirisi we kamahe naye ali mwiiswa. Ise inyala ndyeena naatsya muntsu yase naalya, naanywa, netubaasa n'umukhasi wase, nga ibyo bili biryo? Ise ikhwitsubila ndi, ise sinyala naakhola shishiindu nga isho shiryo ta.”

¹²Kila Dawudi alomela Uriya ari, “Lwe shaleelo luno n'urame ano mu Yerusalemu, kumukaamba nio wileyo mu busoolo.” Nashiryo khu shifukhu isho, Uriya waarama mu Yerusalemu. Khu shifukhu shisheelakho,

¹³Dawudi waamulaanga ari baliile she shiilo atweela. Uriya waalya naluundi waanywa naabi, waakila waameela, nashiryo waalekha khutsya ingo weewe ta. Waatsya isi babaliinda umuyiinga, waakona khu lusaamba lweewe. Waalekha khutsya ingo weewe ta.

¹⁴Ni bwasha kumutishinyi, Dawudi waarona ibaluwa, waakiwa Uriya, ari akiyilile Yowabu.

¹⁵Ibaluwa abe iloma iri, “Siindikha Uriya mu busoolo ibweeni, isi busoolo bululumiile ilala. Lwanyuma uruseyo basilikhale, mumulekhe bamukhupe, afwe.”

¹⁶Imbuka ni yoola, Yowabu n'aatsya khukhwibwakala shiriimba Raba, waasiindikha Uriya khuutsya mu shifwo mweesi abe baasiku babaaminyisa bunyindalifu ni khuusoolana, beemikhile.

¹⁷Basilikhale abe babaali khuutseeta shiriimba ni baarura khuusoolana, beerakho batweela khu basilikhale ba Dawudi. Ikhaba Uriya, umu Hiti naye waafwiilamo.

¹⁸Lwanyuma Yowabu waasiindikhila Dawudi buurume bubuwaamba khu busoolo nga ni bwaba.

¹⁹Waaboolela umuundu isi aarumana ari uloma uri, “Nga waamalile khuuboolela umuyiinga ibyo byoosi bibiwaamba khu busoolo,

²⁰ne nga lirima lyaamuwaambile waareebire ari, ‘Shiina kila basilikhale besyeendile aambi ni shiilibwa she shiriimba? Simumanyile muri kane babalase ni buyiingo khukhwaama khu matikiiyi khu ngaaki ta?

²¹ Inywe simushebulila isaambo isi Abimeleki, umwaana wa Gidioni aafwamo ta? Shino shakholebwela i Sebesi isi umukhasi mutweela aakholowela lusisi khukhwaama khu ngaaki we liitikiiyi lyaamukhoonya ta? Shiina kila mwisyeendile aambi ni liitikiiyi?’ Iwe kane umwiilemo uri, ‘Ikhaba umwakaanisi woowo Uriya, umu Hiti, naye waafwiile.’ ”

²²Nashiryo umurume uyo waatsya isi Dawudi, waamuboolela ibyo byoosi byeesi Yowabu aamurumana khuuloma.

²³Umurume waalooselakho ari, “Baasiku banyooyile bakhufuura ifwe kamaani, baakhutimisa khukhwoolesa mu keewa. Ne khwaakelawo khwaabatimisa khukhwoolesa khu shilibwa she shiriimba.

²⁴Kila be buyiingo balasa khukhwaama khu litikiiyi khu ngaaki. Waakila beera batweela khu basilikhale boowo baafwa. Ikhaba Uriya, umu Hiti, naye waafwiililemo.”

²⁵Dawudi waalomela umurume khukhwiilayo aboolele Yowabu ari, “Isho shishikholikhile, shikhakhumalamo iwe kamaani ta. S'unyala waamanya naanu unafwiila mu busoolo ta. Khayo areeremo ilala kamaani mu khwibwakala, awaambe shiriimba.”

²⁶Nga Basisheba waawuliile ari umuseetsa weewe wafwiile, waalila luukali naabi.

²⁷Nga bye khuusiikha ni biindi byaaweele, Dawudi waarumanisa baatsya baamureerera Basisheba, khuuba mu lubili, weekela umukhasi weewe. Lwanyuma waamusaalila umwaana. Ne shishiindu sheesi Dawudi aakhola, shaalekha khusangaasa Umukasya ta.