Read lumasaaba 2 Samweli 12 Bible Online

2 Samweli 12 - lumasaaba bible

2 Samweli 12

¹Lwanyuma Umukasya waasiindikha umuŋoosi Nasani, khuutsya isi Dawudi khuumuyilila buurume, bubwaba mu saambo iye luukano, nga buloma buri: “Yabawo babaandu babili mu shiriimba shitweela, nga mutweela umuyiinda, ne ukuundi umutaambi.

²Umusaani umuyiinda abe ali ni kamasheese kamakali ni tsikhaafu tsingali,

³ne umutaambi uyo abe ali ni khasheese khasubeeni khatweela khonyene, kheesi abe akula waabaya. Umweene waakhatsoyisa, nga khatsowela atweela ni babaana beewe. Abe ikhaba khuulya, khaliila mu sowaani yeewe, ni khuunywa kameetsi, khanyweela mu shikopo sheewe. Ikhaba mu shilo, abe khamukona aambi, nga khali busa nga mutweela khu baana beewe.

⁴Ari, khu shifukhu shitweela, aabawo umuundu uweetsa khuukeniyila umusaani umuyiinda. Ne umuyiinda yuno waalekha khukana khuubukula lisheese namwe ikhaafu, khukhwaama mu byaayo bibyeewe khuuteekhela umukeni abe uwiitsile khuumubona ta. Akhali waatsya waabukula khakheese kh'omusaani umutaambi uyo, waakhateekhela umukeni, waakhalya.”

⁵Dawudi n'awulila shino, lirima lyaamuwaamba naabi, kila alomela Nasani ari, “Ise niitsuba mu moni tsy'Omukasya ndi, umuundu ukholile shishiindu isho, akhila khukhwiiribwa!

⁶Naluundi khuuba ndi s'okesanisile shiisa isi umutaambi uyo ta, kane aliyile umutaambi bibiindu bibyoolamo kamasheese ako kane.”

⁷Kila Nasani alomela Dawudi ari, “Iwe niye umuundu isi indikho inomakho! Umukasya Wele we ba Isiraeli waalomele ari, ‘Dawudi, ise nakhurobora iwe, naakhuwakha kamafura khuuba umuyiinga uwa Isiraeli yoosi. Naluundi naakhuwonisa iwe khukhwaama mu meeno ka Saulo.

⁸Ise neloosela naakhuwaambisa intsu iya Saulo ni bakhasi beewe, khuuba baboowo; nakhuwa lisaaye lya Isiraeli ni lya Yuda. Abe noola ibyo byaba bikyeekhe, khali ise ikhulooselekho bituumakho awo.

⁹Shiina kila ulekelesile biilomo byeesi Umukasya amala khuukhuleekela iwe, wakhola shishoonako nga shino shiri? Iwe werire Uriya, umu Hiti, nga umusiindikha mu ba Amoni, uri nio uyile umukhasi weewe.

¹⁰Ni nashiryo khukhwaama ari, nga n'undekelesile ise, waayila Basisheba umukhasi uwa Uriya, umu Hiti, mu ntsu yoowo singane mubemo lukoosi ta.’

¹¹Umukasya waalomele ari, ‘Umuundu khukhwaama muntsu yoowo inyene, kane akhureerere iwe buuleme bukali. Kane ise imbukule bakhasi boowo babeene, imbawe babaandu babaandi, babekyelise bakhasi baabwe, nga buli mutweela abona.

¹²Iwe sheesi ukholile, ukholeele mu shimoonyo; ne ise kane ikholele shino abulafu busa, ba Isiraeli boosi babone.’ ”

¹³Dawudi waalomela Nasani ari, “Ise naakholile shishoonako isi Umukasya.” Nasani waamwilamo ari, “Umukasya, waakhwiyakhiile, singane ufwe ta.

¹⁴Ne akhali indi, musaambo isi ukholile shishiindu shino shaaba nga ulekelesa Umukasya, umwaana utsya khusaalikha uyo, kane afwe.”

¹⁵Lwanyuma Nasani waakobolayo ingo weewe. Umukasya waakila umwaana isi Basisheba aasaala, walwaala waaba buubi naabi.

¹⁶Nashiryo Dawudi wekoontselela naabi Umukasya khulw'omwaana uyo. Dawudi waabuya intsala, naluundi waatsya waakona amukhe busa akhali bulili ta, shiilo shoosi, khulw'omwaana.

¹⁷Baaraangirisi be mu buyiinga bweewe beetsa baamwibotokhelela, nga bamuwoyawoya bari enyukhe; ne waaloba ikhaba ni khuulya biilyo ni nabo.

¹⁸Umwaana walwaalila biifukhu bisesaba, uri khu she kumusaafu, waafwa. Ne baaraangirisi be mu buyiinga baarya naabi khuuboolela Dawudi, nga beelomela bonyene bari, “Ne ikhaba isi umwaana abeeleele nga ashiili umulamu, abe umuyiinga s'akanikha ni nafwe ta. Ari khumuboolela khuryeena khuri umwaana wafwiile? Anyala wekhola umweene buubi.”

¹⁹Ne Dawudi n'abona nga babaakaanisi beewe balikho bamoonyanila, waamanya ari umwaana wafwiile. Waabareeba ari, “Umwaana waafwiile?” Baaamwilamo bari, “Waafwiile.”

²⁰Lwanyuma Dawudi wenyukha khukhwaama aasi, wesiinga, weyakha kamafura, waashuusa bikwaaro byeewe, waatsya mu lisari ly'Omukasya, wesaaya Umukasya. Kila arura atsya muntsu yeewe, baamuwa biilyo, waalya.

²¹Kila baraangirisi be mu buyiinga bweewe bamureeba bari, “Shiina kila ulikho wibirisa mu saambo iyo? Nga umwaana ashiili umulamu, iwe wabuyile intsala, naluundi waalila kamasika kamakali. Ne umwaana n'amalile khuufwa, iwe wenyukha aasi, waalya biilyo.”

²²Dawudi waabeelamo ari, “Shikila nabuyile intsala, naluundi naalila kamasika nga umwaana ashiili umulamu, ise abe nambaasile ndi, winyoola Umukasya kane amaambile shiisa, umwaana aramewo nga ashiili umulamu.

²³Ne ari nga n'amalile khuufwa, shiina kila imbuya intsala? Ise inyala naamukobosa luundi khuuba umulamu? Nase nga nafwiile, ikhaamunyoole iyo, ne niye s'anyala waakobola weetsa isi ise ta.”

²⁴Dawudi waaliilisa umukhasi weewe Basisheba, lwanyuma beela atweela, waakaanila, waasaala umwaana ukuundi umusiinde, baamutwiikha lisina bari Solomoni. Umukasya waakana naabi Solomoni.

²⁵Umukasya waarumana buurume isi Dawudi khuubirira mu muŋoosi Nasani, nga buloma buri, “Umukasya kane alaange umwaana uyo ari, Yedidiya[3].”

²⁶Nga bishiili biryo, abe Yowabu ni liiye ashiili mu shibala she ba Amoni, nga ebwakala shiriimba Raba, khukhwoolesa ni aawaamba lubili lw'omuyiinga.

²⁷Kila Yowabu asiindikhila Dawudi buurume bubuuloma buri, “Ise nebwakaala Raba, noolisile ni khuuwaamba kuutikiiyi kukwamamo kameetsi keesi baraambisa mu shiriimba.

²⁸Nashiryo busaasa liiye lyoosi atweela, wibotokhelele shiriimba, ushiwaambe. Khulwekhuuba ise ni kane ishiwaambe, kane bashilaange bari shishase.”

²⁹Nashiryo Dawudi waabusaasa liiye liliramire, baatsya bebwakala Raba, baashisoolanisa, khukhwoolesa ni baashiwaamba.

³⁰Dawudi waabukula ikuutwa khukhwaama khu Milikomu, shibuumbe sha wele waabwe. Ikuutwa yino abe busiro yoolisa tsikilo kamakhumi kataru na tsiraano, nga ilimo ni libaale lye buukusi bwe angaaki. Yino yaaba mu bunyala bwa Dawudi, naluundi waanuula bibiindu bikhali bitweela ta, khukhwaama mu busoolo.

³¹Dawudi waalakila babaandu abe babaali mu Amoni, ari baraambise tsiyaywa ni biibya bibiindi, batikulule kutikiiyi kwe shiriimba. Waakhola nisho shitweela khu biriimba bibiindi bye ba Amoni. Lwanyuma, Dawudi ni basilikhale beewe baakobolayo ingo.