Read lumasaaba 2 Samweli 13 Bible Online

2 Samweli 13 - lumasaaba bible

2 Samweli 13

¹Dawudi abe ali n'umwaana umukhaana umumiliwu naabi, nga bamulaanga bari Tamari. Wandaaye weewe umusaani abe bari Abisalomu. Bano abe bali ni waandayaabwe ukuundi bari Amunoni, nga ali uwa maayi waabwe ukuundi. Imbuka ni yabirawo, Amunoni wekoomba Tamari.

²Ne Tamari yuno abe umukhaana indungubaasi, nashiryo abe mbaawo isaambo isi Amunoni anyala waamukholakho shishiindu shoosi ta. Shino shataambisa naabi Amunoni, woola ni khulwaala.

³Ne abe Amunoni ali ni musaale weewe bari Yonadabu, abe uli umwaana uwa Shimeya, wandaaye uwa Dawudi. Yonadabu abe wamanya khuukhola tsimbomelo.

⁴Shimeya yuno waareeba Amunoni ari, “Shiina shishiili khuukhutaambisa? Iwe uli umwaana uw'omuyiinga, shiina kila wikhalalisa buli lwaaweela?” Amunoni waamuboolela ari, “Ise nikoomba Tamari, umukooko uwa Abisalomu.”

⁵Yonadabu waamulomela ari, “Iwe yikholisa busa uri ulikho ulwaala, ukone mu bulili. Kane uri paapa woowo eetsa khuukhubona, umusabe uri arumanise Tamari, eetse ateekhele biilyo muntsu yoowo, nga wamweene ubona, nio unyalise khuubilya.”

⁶Nashiryo Amunoni waakona aasi, wekholisa ari alikho alwaala. Umuyiinga n'eetsa khuumubona, Amunoni waamuloomba ari, “Indikho inoomba indi, khali umukooko wase Tamari etsile andeekhelakho biilyo, nga samweene imbona, nio antsakaanisa indye.”

⁷Dawudi waarumanisa balaanga Tamari khukhwaama ingo. Kila Dawudi amulomela ari, “N'utsye muntsu iya wandaayo Amunoni, umuteekhelekho biilyo.”

⁸Tamari waatsya muntsu iya yaaya weewe Amunoni, waamunyoola nga waakonile mu bulili. Umukhaana waakaanda buufu, waateekha nga Amunoni waamuloleleele.

⁹Waabukula biilyo waamureera khu sowaani, ne Amunoni waaloba khuubilya. Kila Amunoni aloma ari, “Loma baraambi boosi barurewo, batsye antsye.” Nashiryo baabaloma boosi baarura antsye.

¹⁰Nga boosi baatsiile, kila Amunoni alomela Tamari ari, “Indeerere biilyo mu shiseenge mwase, umbe indye.” Tamari waasuta biilyo ibyo waabiyila mu shiseenge sha wandaaye weewe, Amunoni.

¹¹Ne n'aba nga amwakaanisa biilyo, Amunoni waakulukha waamuwaamba, waamulomela ari, “Yiitsa mu bulili, indi khuukana khukhwitubaasa ni nawe.”

¹²Umukhaana waamwilamo ari, “Yaaya wase, ukhamaamba ni kamaani ta! Shishiindu shishifwaana shiri, seshifukiilisibwa mu Isiraeli ta. Shino shili she busilu naluundi shiswaatsa naabi!

¹³Ari ni khuswaala ukhwo khwoosi, ise inakhola indyeena? Ne ikhaba iwe wamweene, kane bakhuyile nga umusilu ukhaswaala ta, mu Isiraeli mwoosi! Naakhwikoontseleele, loomba umuyiinga, kane akhufukiilise umbile ise imbe umukhasi woowo.”

¹⁴Ne Amunoni waalekha khukana arekeerese abe byeesi umukhaana alikho aloma ta! Khukhwaama niye n'aba ni kamaani khuuminyisa umukhaana, waamuwaamba ni kamaani, waakona ni naye.

¹⁵Lwanyuma ni abweene, Amunoni waaba nga s'akanakho ni khuubona khu Tamari luundi ta. Waaba nga waamubiiyiile naabi, ni khuuminyisakho abe khuukana khweesi aamukanila. Kila amulomela ari, “Rura ano, utsye.”

¹⁶Ne Tamari waamulomela ari, “Ukhaandimisa uri n'urure ano utsye ta! Isho shiminyisakho buubi, ni shishiindu sheesi umalile khukhuuntsolisakho.” Ne Amunoni waalekha khukana khuurekeeresa ibyo ta.

¹⁷Walaanga umusoleeli abe uuli umwakaanisi weewe, waamulomela ari, “Rusa ibulafu umukhasi uyu, wikalewo lulwiitsi.”

¹⁸Tamari aaba abe wakwaarire shikwaaro shileeyi, nga shilikho ni kimikhono kimileeyi, nga abe bakhaana b'omuyiinga babaashiili tsindungubaasi ni bakwaara. Umwakaanisi uyo waarusa Tamari ibulafu, wekalawo lulwiitsi.

¹⁹Tamari wonuula shikwaaro sheesi aaba waakwaarire, naluundi waamwataka likoshe mu murwe, waara kamakhono keewe khu murwe, waatsya nga akuukuula ni kamaani.

²⁰Kila Abisalomu areeba Tamari ari, “Amunoni niye ukhukholile khusiiwe shishiindu shishifwaana nga isho? Mukooko, iwe n'usile busa, ukhaloma ta, khukhwaama n'ali wandaaye woowo. Ukheyembelela ta.” Nashiryo, Tamari waamenya muntsu iya Abisalomu, ne nga ali mu mutaambo.

²¹Umuyiinga Dawudi n'awulila bibiindu bibyakholikha khu Tamari, lirima lyaamuwaamba naabi.

²²Ne Abisalomu waalekha khwookesanisakho Amunoni ari iliwo shishiindu shoosi shiibi shishakholikhile ta. Ikhaba nga abe waabiyila Amunoni khulwe isho sheesi aakhola khu Tamari, umukooko weewe.

²³Lwanyuma lwe kimiiko kibili, baaraambi ba Abisalomu abe bali i Bayaali Hazori, shishiili aambi ni shiriimba Efurayimu, balikho babeka bubwooya khukhwaama khu masheese.[4] Kila Abisalomu alaanga basoleeli b'omuyiinga boosi khuubawo.

²⁴Kila Abisalomu atsya isi umuyiinga amuloomba ari, “Bona baraambi baase balikho babeka kamakheese, ni wiitse ni baraangirisi babaali ni nawe, khutsye khubewo.”

²⁵Ne Dawudi waamwilamo ari, “Mwaana wase, ifwe fweesi ni khutsya ni nawe, kane khukhulyekho bibiindu biikali.” Abisalomu mbo akhakakho, ne Dawudi waalobela ilala. Shitweela busa Dawudi waamukanisa biilayi.

²⁶Kila Abisalomu aloma ari, “Abe noola iwe siwanyalisile ta, inoomba indi khayo yaaya wase, Amunoni, eetse abewo.” Dawudi waareeba ari, “Ne shiina kila ukana abewo?”

²⁷Ne Abisalomu waamwikoontselela naabi, khukhwoolesa umuyiinga n'afukiilisa Abisalomu atsye ni babandaaye boosi.

²⁸Abisalomu waalomela baraambi beewe ari, “Mwaayilisa Amunoni, nga mwaaboone muri waameelile, naluundi nga naalomile indi mwiire, muli ni khuumwiira. Mukharya ta, khulwekhuuba ise samweene niye ubalakile inywe. Nashiryo muli ni khuuba banyindaalifu.”

²⁹Nashiryo baraambi ba Abisalomu beera Amunoni, nga abe n'amalile khuubaboolela. Basoleeli b'omuyiinga babaaramire, buli mutweela wekaama khu sikilya yeewe, baatima baatsya.

³⁰Bano ni baaba nga bashiili khu ntsila beelayo i Yerusalemu, kamakhuuwa koolela Dawudi kari, “Abisalomu weerire basoleeli b'omuyiinga boosi, mbaawo namutweela uwonile ta.”

³¹Kila umuyiinga enyukha khu shitsoloŋo she buyiinga wonuula bikwaaro byeewe, wekhala aasi mwifukhuulu. Ikhaba babaakaanisi beewe abe babaamwiimikhilewo, nabo bonuula biikwaaro byaabwe.

³²Ne Yonadabu, umwaana uwa Shimeya uwaba wandaaye uwa Dawudi, weetsa waaboolela Dawudi ari, “Umuyiinga, sibali bari beerire basoleeli boowo boosi ta. Abisalomu alakiile beera Amunoni yenyene, khulwekhuuba abe niye waakhalawo khaale khukhwaama khu shifukhu khweesi Amunoni aawaambila Tamari, wetubaasa ni naye.

³³Nashiryo, umuyiinga ukheyembelela uri basoleeli boowo boosi baafwiile ta; akhali Amunoni yenyene niye ufwiile.”

³⁴Ne Abisalomu waabutile indimo watsiile. Bari umusilikhale abe uliinda ibulafu enyusa tsiimoni, waabona babaandu baakali babeene, nga baama khu lukuuto lulwaama i Horonayimu, khu luwaande lwe lukiingi.

³⁵Kila Yonadabu alomela umuyiinga ari, “Uwe lukoosi, bona basoleeli boowo boolile; bali ano. Shili busa nga ise n'ikhuboleele.”

³⁶Nga nio aliimalile khuuloma aryo, basoleeli b'omuyiinga boola ingo. Abe balikho balilila angaaki, nashiryo umuyiinga ni babaakaanisi beewe nabo baarakikha khuulila.

³⁷Abisalomu waabuta tsiindimo waatsya isi Talumaayi, umwaana wa Amihudi, umuyiinga we Geshuru. Kila Dawudi alila khulwa Amunoni, umwaana weewe khuumala imbuka indeeyi.

³⁸Abisalomu nga waabutile tsiindimo waatsiile i Geshuru, waamalayo kimiiko kitaru.

³⁹Dawudi waalila naabi khulw'omwaana weewe Amunoni, ni kumwoyo kweewe kwaaakana naabi atsye ebwakale Geshuru, ari awaambe Abisalomu. Ne imbuka ni yoola, Dawudi kumutaambo kw'omwaana weewe kwaawa, waalekha ni khuukana khuyila liiye khuwaamba Abisalomu ta.