Read lumasaaba 2 Samweli 14 Bible Online

2 Samweli 14 - lumasaaba bible

2 Samweli 14

¹Yowabu abe waamanyile buulayi bubweene ari, Dawudi s'anyala waakamisa khukhwaambaasa khu Abisalomu ta.

²Kila arumanisa umuundu khuutsya i Tekowa, areere umukhasi abe umukesi umenya ibweene iyo. Waalomela umukhasi uyo ari, “Yikholisa busa, ube nga ufiliilwe, nga uli mu mutaambo, ukwaare bikwaaro bye khu masika, naluundi ukheyakha kamafura waamiliha ta. Yibirisa nga umukhasi ubeele mu masika khuumala bifukhu biikali.

³Lwanyuma ari utsye isi umuyiinga ulome byeesi ise inakhuboolela.” Nashiryo Yowabu waaboolela umukhasi uyo bye khuuloma.

⁴Umukhasi tsana uwaama i Tekowa uyo, waatsya isi umuyiinga, waamwisamo shiriifwa nga enama kumurwe aasi, nga aloma ari, “Uwe lukoosi, neetsile ndi unjeete!”

⁵Umuyiinga waamureeba ari, “Uli na buwaangafu shiina?” Umukhasi weelamo ari, “Ise ndi namulekhwa, umuseetsa wase waafwa.

⁶Ise naba ni babaana basoleeli babili, ne lutweela baalomanila mwiiswa nga mbaawo umuundu uliwo ta. Yataambaawo umuundu ubakaya, nashiryo mutweela waakhupa uwashe, waamukhoonya.

⁷Ari be shikuuka boosi benyukhile aasi, balikho baanomela ise bari imbawaambise umusoleeli uwakhoonya uwashe nabo bamukhoonye, khukhwilihaasa khuufwa khw'owashe. Ne ilomo inyene isi balikho, niyo indi bakana beere uwaramawo, nio umuseetsa wase ataambe ulooselakho lisaaye lyeewe, naluundi nio bayile liiswa liiliwo.”

⁸Dawudi weelamo umukhasi uyo ari, “N'uwileyo ingo woowo. Kane ise ikhalewo khu biwaamba khu musaango kwoowo.”

⁹Umukhasi tsana welamo umuyiinga ari, “Khayo ise nambaase ndi khuukhalawo ukhwo singane khukhwaamilemo iwe bihangafu ta. Ne abe noola khwaamilemo bihangafu, kumusaango khali kubeele kukwase ni be shikuuka shase, sikuba kukwoowo ta.”

¹⁰Umuyiinga waalomela umukhasi tsana ari, “Noola umuundu yeesi, akhutaambisa, mureere isi ise ndi! S'akheelekho luundi ashikhole ta.”

¹¹Umukhasi waalomela umuyiinga ari, “Ise naakhwikoontseleele, ni untsitsubile mu lisina ly'Omukasya, Wele woowo uri, mbaawo umuundu ukane eere umwaana wase, mu khwiliyaasa ta.” Umuyiinga waamwilamo ari, “Ise ikhwitsubila mu lisina ly'Omukasya indi, mbaawo umuundu ukane atiile khu mwaana woowo ta!”

¹²Lwanyuma umukhasi uyo waalomela umuyiinga ari, “Umuyiinga, ise inoomba indi ufukiilise inomeyo khalomo khatweela.” Umuyiinga waamwiilamo ari, “N'ulome.”

¹³Umukhasi waaloma ari, “Umuyiinga, iwe ulikho ukhola shishiindu sheesi babaandu ba Isiraeli bakhakana ta. Iwe nga siwakobosele umwaana woowo ingo, shimanyisa indi mu khukhala kumusaango kuno, iwe wekhaliile wamweene kumusaango.

¹⁴Ifwe fweesi khuli ni khuufwa khuwewo, khube busa nga kameetsi keesi batsukhile mwiiloba. Ne Wele s'arusawo buulamu bweefwe ta. Akhali indi, niye aweentsa kimikhoosi kye khukobosa abo babaamururirekho.”

¹⁵Uwe lukoosi, ise niitsile ano khuukhuboolela iwe shihangafu shase, khulwekhuuba abe neyembeleele naabi, khu lwesho shishiinyala shangwakho. Ise ikhalilewo khukhwiitsa isi iwe, khulwekhuuba imanyile indi iwe unyala waanjeeta.

¹⁶Ilala, ise imanyile ndi kane iwe urekeerese byeesi ise inoma, naluundi uwonese umwaana wase khukhwaama kh'ubo babaakana khuukhubukula ifwe liiloba lyeesi Wele aakhuwa.

¹⁷Ise ari siindi ni khukhwiyembelela khwoositsana ta, khukhwaama nga iwe n'umalile khuukhalawo. Iwe uli busa nga malayika wa Wele, waamanya khuukhalawo akari e shilayi ni shiibi. Khali Umukasya Wele woowo akhuliindile.

¹⁸Kila Dawudi alomela umukhasi tsana ari, “Indi khuukana khuukhureeba shireebo. Ukhabisakho shishiindu shoosi ta.” Umukhasi welamo ari, “Uwe lukoosi, n'ureebe.”

¹⁹Dawudi waamureeba ari, “Yowabu niye ukhulomeele iwe khukhwiitsa khuuloma bibiindu bino?” Umukhasi weelamo ari, “Uwe lukoosi, ise nitsuba mu moni tsyoowo ndi, mbaawo umuundu unyala khuubisa bituufu khukhwaama khus'iwe ta. Muŋali, Yowabu niye uwunomeele ise khuuloma ndyo; niye uwundekeele ise bye khuuloma.

²⁰Yowabu akholile shino nga akana iwe uloleelele bibiindu musaambo ikiindi busa. Ne iwe uli ni kamakesi busa nga ka malayika wa Wele, iwe umanya bibiindu byoosi bibiikholikha khu shibala.”

²¹Kila umuyiinga akanikha isi Yowabu ari, “Ari waaboone uri ise naamalile khuukhalawo khaale. Nashiryo, tsya ukobose Abisalomu.”

²²Yowabu weesamo umuyiinga shiriifwa, nga enamisa kumurwe kweewe aasi, waasiima umuyiinga. Lwanyuma Yowabu waaloma ari, “Umuyiinga, lwe shaleelo ise naamanyile ndi iwe waayisiima, khulwekhuuba iwe waalakiile sheesi ise inoombile.”

²³Lwanyuma lw'ebyo, Yowabu wenyukha waatsya i Geshuri, waakobosa Abisalomu i Yerusalemu.

²⁴Ne ni boola, umuyiinga waalakila ari Abisalomu amenye muntsu iyeewe buraawa busa, akheetsa isi ali ta. Nashiryo Abisalomu waamenya muntsu iye buraawa, waalekha khuutsyakho isi umuyiinga ta.

²⁵Mu Isiraeli mwoosi, abe mbaamo umuundu uwamiliha naluundi uwatsowa buulayi nga Abisalomu ta. Khukhwaamila khu murwe, khukhwoolesa khu lwaala lwe shikele, abe s'aalikho buubi bwoosi ta.

²⁶Abe buli kumwiiko, akhalakho litsuune lyeewe kumuluundi mutweela. Abe nga balipimile khu kilo, abe lituumisa tsikilo tsibili busiro.

²⁷Abisalomu aasaala basoleeli bataru, n'umukhaana mutweela isi atwiikha ari Tamari. Umukhaana uyo abe umumiliwu naabi.

²⁸Abisalomu waamenya mu Yerusalemu kimiiko kibili, nga s'abonakho paapawe, Dawudi ta.

²⁹Lwanyuma waakana ari abirire mu Yowabu. Nashiryo, lutweela waarumanisa ari bamulaangile Yowabu, ne waalekha khukhwiitsa ta. Waarumanisa kumuluundi kukuukhola khabili, shitweela busa waalekha khukhwiitsa ta.

³⁰Ikhumaliilisa Abisalomu waalomela babaakaanisi beewe ari, “Bona kumukuunda kwa Yowabu kwe biilimwa bali, kuloondelela khu kwase. Tsya mukwooshe.” Baatsya baakwoosha.

³¹Kila Yowabu enyukha atsya isi Abisalomu ingo weewe waamureeba ari, “Shiina kila babaakaanisi boowo booshile kumukuunda kwase kwa seyiri?”

³²Abisalomu weelamo Yowabu ari, “Ise isiindikhile baarume khuukhulaanga ndi wiitse ano, ikhurumane isi umuyiinga, umureebe khulwashiina andakiile ise khuukobola khukhwaama i Geshuri. Abe shiminyisakho ise khuuba ibweene iyo, khuufuurisa khuuba ano. Indi khuukana khuutsya khuubona umuyiinga anariha; noola aloma ari ise ndi ni kumusaango, ni antsire.”

³³Lwanyuma Yowabu waatsya isi umuyiinga waamuboolela. Umuyiinga waalaanga Abisalomu khuutsya isi ali. Nga woolileyo, Abisalomu weenamisa kumurwe kweewe khukhwoolesa khwiiloba, nga esamo umuyiinga shiriifwa. Umuyiinga weenyukha waatsya waakwa Abisalomu mu shifuba.