Read lumasaaba 2 Samweli 15 Bible Online

2 Samweli 15 - lumasaaba bible

2 Samweli 15

¹Lwanyuma lw'ebyo, Abisalomu waarakikha khuukendaatsaka mu shiriimba nga wekhaale mu shikaari sheesi tsiŋwaaŋwa tsikhweesa. Abe ibweeni weewe ibayo basilikhale kamakhumi karaano, babaamuŋooŋoonela intsila.

²Ari abe buli shifukhu, Abisalomu enyukha kumutishinyi, waatsya wemikha khu shilibwa shishingila mu shiriimba. Abe n'abona umuundu yeesi nga atsya isi umuyiinga khuuwaaba kumusaango, abe Abisalomu amulaanga waamureeba ari, “Iwe waama mu shiriimba shiina?” Abe uyo ni elamo ari, “Ise ndi iwe mu shikuuka nabulebe, khukhwaama mu Isiraeli,”

³abe Abisalomu aloma ari, “Iwe uli mutuufu mu musaango kuno, naluundi shaakhiile iwe ufuure. Ne she khabi imbi, umuyiinga siwaaroborakho umuundu yeesi unyala waarekeeresa kimisaango kyeenywe ta.

⁴Abe ise naabakho busa umukayi we mu shibala shino indi, abe khali ikhalile kumusango kwa buli mutweela uwiitsa isi ise.”

⁵Abe umuundu yeesi nesyeenda aambi isi Abisalomu khuumwisamo lukoosi nga amwinamila, Abisalomu abe ayila kumukhono, waamukwa mu shifuba.

⁶Iyo isaambo isi Abisalomu aabirisamo buli mutweela uwaba waamile mu Isiraeli khuuyila kumusaango isi umuyiinga. Mu mbuka ifwiiti iri, babaandu boosi be mu Isiraeli baaba nga bakana Abisalomu khuuminyisa Dawudi.

⁷Lwanyuma lwe kimiiko kine, Abisalomu waalomela umuyiinga ari, “Ifukiilise intsye i Heburoni, intsye nolelese isho sheesi netsubila Umukasya, indi ikhaashikhole.”

⁸Khulwekhuuba ni naba nga ishiimenya i Geshuri mu Aramu, ise naloma ndi, “Nga Umukasya waantsisileyo ise mu Yerusalemu, ikhaatsye i Heburoni, imwisaaye.”

⁹Dawudi waamufukiilila khuutsya, ni nashiryo Abisalomu wenyukha waatsya i Heburoni.

¹⁰Ne Abisalomu waasiindikha babaandu mu shimoonyo busa khuutsya mu bikuuka bye mu Isiraeli byoosi, nga bababoolela bari, “Nga ni muwulila busa muri ikhoombi nga ifuura, muli ni khuulaangilila muri, ‘Abisalomu ali umuyiinga, uwula nga ekhala i Heburoni!’ ”

¹¹Khukhwaama i Yerusalemu, Abisalomu waatsya ni bakeni baalaange, bitoondo bibili (200). Ne bano baatsiilaawo busa, nga sibaamanyilekho shoosi ta.

¹²Ari Abisalomu n'aba nga alikho awaanayo tsisaayilo, kila arumanisa ari batsye bamulaangile Ahisofeli, uwe Gilo. Abe yuno niye umuwi uwe kamakhula isi Dawudi. Babaandu baatsya nga beloosela busa khukhwitubaasa khu Abisalomu, shaakila luwomelo lwaatsya nga lubalaaha.

¹³Kila yabawo umuundu uwatsya isi Dawudi, waamuboolela ari, “Babaandu boosi mu Isiraeli, ari bali khu luwaande lwa Abisalomu.”

¹⁴Ni abweene awo, Dawudi waalomela baraangirisi be mu buyiinga bweewe abe babaali ni naye ari, “Khayo khurure ano khutsye. Khulwekhuuba ni khulekha khutsya ari ta, Abisalomu anyala waakhuwaambilisila ifwe ano. Khola wangu, akhakhunyoola ifwe ano ta, busa anakhwiira anakhumalawo ifwe fweesi, ni babaali mu shiriimba.”

¹⁵Kila baraambi b'omuyiinga bamwiilamo bari, “Uwe lukoosi, ifwe khuli baberekefu khukhola buli sheesi iwe ukhulakila.”

¹⁶Nashiryo umuyiinga ni be muungo mweewe boosi baarura baatsya. Ne umuyiinga waalekhakho likhumi khu bakhasi beewe be bulafu, ari baliinde mu ntsu.

¹⁷Umuyiinga ni babaandu beesi aaba ni naabo boosi ni boola khu ntsu isembayo, khu ndulo khwe shirimba, beemikha abweene awo.

¹⁸Babaandu boosi baabira khu muyiinga benyoowa ibweeni, nga khulikho ni basilikhale ba busheele ni basilikhale babaamuliinda niye. Lituuli lilyaseembayo abe lilimo basilikhale bitoondo bisesaba (600), babaaloonda khu muyiinga khukhwaama i Gasi.

¹⁹Kila umuyiinga alomela Itayi, nga yuno niye uwaba umuraangirisi uwe liiye lilyaba lye babaakhaaba ba Isiraeli ta, ne nga bali khu luwaande lwa Dawudi, ari, “Ne iwe uli umwiitswa naluundi umumuli, ulikho utsya waheena ni nafwe? Iwe yiilayo witubaase khu muyiinga umushaakha.

²⁰Iwe nio weetsile aambi busa uri, ari unoondakho utsya waheena, ate nga ise sinaamanyile ni isi indi khuutsya ta? N'uwaambe basilikhale boowo mwiileyo; Umukasya abawe tsikhabi, abawaambile shiisa, naluundi abokesanise khuukana khukhuukhawawo ta.”

²¹Ne Itayi welamo umuyiinga ari, “Uwe lukoosi, mu moni tsy'Omukasya, ni mu moni tsitsyoowo wamweene, ise ikhuboolela indi buli oosi isi kane utsye, oba ufwa, oba uba umulamu, kane ise imbe ni nawe.”

²²Kila Dawudi alomela Itayi ari, “Kale bira khutsye.” Nashiryo Itayi, uwaama i Gite, waatsya atweela ni basilikhale beewe, ni be tsiingo tsyaabwe.

²³Babaandu be mu shibala umwo boosi baaba nga balikho balila naabi, nga baaboone Dawudi ni babaandu balikho batsya. Umuyiinga waakhalisa Litila lye Kiduroni, bawaamba kumukhoosi kukuutsya mu mubiimbi.

²⁴Basaayi Zadoki ni Abiyasaari, nabo baaba baliwo. Aabawo ni babaandu batweela khukhwaama mu shikuuka sha Levi, nga baasutile Isanduuku iye Indakaano. Baakira aasi khukhwoolesa nga buli mutweela waabirire, nio baakisuta luundi.

²⁵Kila umuyiinga alomela Zadoki ari, “Suta Isanduuku y'Omukasya mwiileyo mu Yerusalemu. Abe noola Umukasya waakanile, kane umweene angobose ise, inyalise khuukibonakho, atweela ni lisari lyayo.

²⁶Ne abe noola Umukasya waalomile ari seshinyalikha ta, ise ni yooyu, khayo sheesi niye akana shikholikhe.”

²⁷Umuyiinga waalomela Zadoki naye ari, “Iwe uli umuŋoosi namwe s'uuli umuŋoosi ta? Nashiryo iwe ni Abiyasaari ni mwiileyo mu shiriimba, mu lukoosi. N'utsye ni Ahimayazi, umusoleeli woowo, ni Yonasani, umusoleeli uwa Abiyasaari.

²⁸Ise kane imbe naliindiile mu mubiimbi isi khwaambukhila luluutsi, khukhwoolesa ni kane imbulile sheesi inywe muunomela.”

²⁹Nashiryo Zadoki ni Abiyasaari baasuta Isanduuku iya Wele, beelayo i Yerusalemu, baarama ibweene iyo.

³⁰Ne Dawudi waaniina Lukiingi Oliveti, nga ali mu bikele busa, naluundi nga alikho alila, webiimbiliile khu murwe, khulwe kumutaambo. Babaandu babaaba ni naye boosi abe nabo bebiimbiliile kimirwe, balikho balila.

³¹Aabawo umuundu uwaboolela Dawudi ari, “Ahisofeli alikho ayeetakho Abisalomu mu luwomelo luno.” Dawudi waaloma ari, “Umukasya, ise inoomba ndi, khali ushuusile kamakhula keesi Ahisofeli alikho awaanayo isi Abisalomu, kekyela busilu.”

³²Nga Dawudi wolele khu lukiingi khu ngaaki, isi besaayila Wele, Hushayi uwe mu shikuuka she ba Arakite, waamwiitsayo. Abe shikwaaro sha Hushayi shonuukhile, naluundi nga ali ni liloba mu murwe.

³³Dawudi waamulomela ari, “Iwe n'uutsya ni nafwe, unakila khukyeende mbola.

³⁴Ne iwe ni wilayo mu shiriimba, ulomele Abisalomu uri khukhwaama iwe n'ubeele umwakaanisi uwa paapa weewe, kane ube umwakaanisi weewe naye. Shino shikhunyalisile iwe khukhwoonakisa kamakhula keesi Ahisofeli alikho araambisa.

³⁵Basaayi Zadoki ni Abiyasaari kane babe ibweene iyo ni nawe. Buli sheesi iwe uwulila khukhwaama khu muyiinga, boolela basaayi Zadoki ni Abiyasaari.

³⁶Ni babaana baabwe, Ahimayazi uwa Zadoki, ni Yonasani uwa Abiyasaari, baliyo. Rumana babeene abo khukhuumboolela ise buli sheesi iwe uwulila.”

³⁷Nashiryo Hushayi umusaale uwa Dawudi, welayo mu Yerusalemu, woolela khu mbuka niyo indweela isi abe Abisalomu alikho engililamo.