Read lumasaaba 2 Samweli 16 Bible Online

2 Samweli 16 - lumasaaba bible

2 Samweli 16

¹Nga Dawudi waamalilekho lukiingi, waarakikhile khukhwiikhilila luwaande lwa taayi, Ziba umwakaanisi wa Mefibosesi, weetsa khuumwakaanana. Abe Ziba ali ni tsisikilya tsibili nga tsyaasutile bibiindu: kimikaati bitoondo bibili (200), bisasi bye kimisabibu kimyoomu shitoondo shitweela, bisasi shitoondo shitweela bye kimifiki, n'imuka iy'eviini.

²Kila umuyiinga areeba Ziba ari, “Bino byoosi ubiyila wahena?” Ziba welamo ari, “Tsisikilya tsino tseetsile tsiri nio be muungo mw'omuyiinga bekhalekho, tsibasute. Bye khuulya bye basilikhale ni babaaramire, n'iviini bali ni khuunywa khulwe khuuluwa nga bali mu mubiimbi.”

³Kila umuyiinga amureeba ari, “Ne Mefibosesi ali wahena?” Ziba waamwilamo ari, “Waaramire mu Yerusalemu, nga ambaasa ari, ba Isiraeli kane bamwikese niye khuuba umuyiinga, nga asikhila kuuka weewe, Saulo.”

⁴Dawudi waalomela Ziba ari, “Bibiindu byoosi abe bibiili bya Mefibosesi, ari bili bibyoowo.” Ziba waaloma ari, “Uwe lukoosi, isi indi umwakaanisi woowo. Khayo niyikine indi, byeesi ise ikhola kane bikhusangaase iwe.”

⁵Nga Dawudi woolile mu shiriimba she Bahurimu, aabawo umusaani bari Shimeyi, umwaana wa Gera, nga ali uwe mu shikuuka sha Saulo, uweetsa waarakikha khuutsuba Dawudi.

⁶Waakholowa kamabaale isi Dawudi, atweela ni basilikhale beewe, ni babaandu boosi beesi aaba ni nabo. Muno mwabamo ni basilikhale abe babaaliinda umuyiinga.

⁷Shimeyi waawotselela Dawudi nga aloma ari, “Iwe uli umwiiri, rura ano utsye! Iwe s'ulimo ni kumukaso ta!

⁸Umukasya alikho akhukholakho bino nga elihaasa ibyo byeesi iwe wamala khaale khuukhola khu baandu be inda iya Saulo. Iwe weeba busa buyiinga bweewe, ne ari Umukasya waabuweele Abisalomu, umwaana uwoowo. Bihangafu bino byoosi byaakhukwiilekho khulwekhuuba iwe uli umwiiri!”

⁹Abishayi waaloma ari, “Umuyiinga, khasaani ikha khali busa imbwa ifwiile! Anyala aryeena waatsuba umuyiinga? Khayo ise intsye ikhakhalekho kumurwe.”

¹⁰Ne Dawudi welamo ari, “Abishayi, iwe ni Yowabu bino bikhabawaambakho ta. Noola Shimeyi alikho antsuba ise khulwekhuuba Umukasya waamulomeele ari n'uutsube Dawudi, iwe niye naanu khumulomela uri akamise?”

¹¹Kila Dawudi alomela Abishayi ni basilikhale beewe boosi beesi aaba ni nabo ari, “Bona, umwaana uwase umweene ali khuuweentsa khukhuuntsira ise. Ne yina umusaani yuno uwaama mu shikuuka sha Benyamini? Mulekhe abe, atsube nga n'akana. Winyoola Umukasya waamulakiile khukhuuntsuba ise.

¹²Manya kane Umukasya abone khuutaambisibwa khweesi ise ndimo shaleelo, asaasile khulwe khukhuuntsuba khuno, amaambile ise shiisa, akholele bibiindu biilayi.”

¹³Nashiryo Dawudi ni beesi aaba ni nabo, belooselayo beekha boola khu lukuuto. Ne Shimeyi waatsya nga ali khu ndulo khwe lukiingi abaloondakho, nga atsuba, abakholowa kamabaale ni lifukhuulu.

¹⁴Dawudi ni beesi aaba ni nabo, boola khu luutsi Yorudaani nga baaluwile naabi. Nashiryo bekhala aasi, baawumulamo.

¹⁵Nga ibyo bishiili biryo, Abisalomu, Ahisofeli, ni babaandi beesi baaba nabo, abe boolile mu Yerusalemu.

¹⁶Kila Hushayi umusaale uwa Dawudi atsya isi Abisalomu aloma ari, “Umuyiinga upewo khabili! Umuyiinga upewo khabili!”

¹⁷Ne Abisalomu waareeba Hushayi ari, “Iyo niyo isaambo isi wokesanamo bubwiyikinwa bwoowo, isi musaale woowo Dawudi? Shiina kila ukhatsiile ni naye?”

¹⁸Hushayi welamo ari, “Umukasya ni babaandu be mu Isiraeli bakhuroboore iwe khuuba umuyiinga. Ise mbaawo isi intsya ta. Indi ni khuurama ano imbe umwakaanisi w'oyo isi baroboore.

¹⁹Naluundi, kane ise imbe umwakaanisi uwa naanu, n'ikhaba umwakaanisi w'omwaana weewe, nga ni naba umwakaanisi uwa paapa weewe?”

²⁰Lwanyuma Abisalomu waareeba Ahisofeli ari, “Iwe khuwe ifwe khu makesi. Khukhole khuryeena?”

²¹Ahisofeli waalomela Abisalomu ari, “Paapa woowo Dawudi, alekhelewo batweela khu bakhasi beewe be bulafu, khuuliinda lubili. Tsya witubaase na buli mutweela khu bakhasi abo. Kane buli mutweela mu Isiraeli amanye ari iwe wafwotsoole paapa woowo mu lubuula. Shino kane shikhwikese iwe ni beesi uli ni nabo, khuba be kamaani kamakali.”

²²Kila Abisalomu alakila baarawo lisari khu ngaaki khwe lubili, nashiryo babaandu boosi baabona nga ni etubaasa ni bakhasi be bulafu ba paapa weewe.

²³Abe makiboole Ahisofeli awa kamakhula kamalayi naabi, abe kali busa nga kakaamile isi Wele. Nashiryo abe Dawudi ni Abisalomu batsiila khu makhula ka Ahisofeli.