Read lumasaaba 2 Samweli 17 Bible Online

2 Samweli 17 - lumasaaba bible

2 Samweli 17

¹Lwanyuma Ahisofeli waalomela Abisalomu ari, “Khayo ise imaambe basilikhale kumukaanda mutweela ni bikana bibili (12,000), intsye niibwakale Dawudi lwe shaleelo luno.

²Kane khumubuukhe busa nga waaluyile naluundi nga waaweelemo kamaani. Khulwe khuuyuyukhana khuukali, kane babaandu boosi beesi ali ni nabo batitukhe batsye. Ise sikane niirekho umuundu ukuundi yeesi ta, akhali umuyiinga yenyene.

³Khukhwaama niye n'aali yenyene isi ulikho uweentsa, lwanyuma lwe khumwiira, kane ise ingobose babaandu boosi ingo, ibe busa nga umweeha ni elayo isi umuseetsa weewe. Musaambo yino, singane ibewo khuusoolana ta.”

⁴Kamakhula ka Ahisofeli kano kasangaasa Abisalomu, ni baraangirisi be mu Isiraeli boosi.

⁵Kila Abisalomu aloma ari, “Ni mulaange Hushayi, umu Arakite, khuwulile sheesi naye aloma.”

⁶Hushayi ni oola, Abisalomu waamuboolela ibyo byeesi abe Ahisofeli alomile. Kila areeba Hushayi ari, “Khukhole nga niye n'alomile, namwe abe iwe uloma uri shiina?”

⁷Kila Hushayi aloma ari, “Kumuluundi kuno kamakhula keesi Ahisofeli aweele, sikali kamalayi ta.

⁸Abisalomu, iwe waashimanyile uri paapa woowo Dawudi, ni basilikhale beesi ali ni nabo, bali babaandu baarafu naluundi banyindaalifu naabi. Aluno ari bali ni khuuba nga baarafwiile nga ingwe isi barusilekho tsinyana. Akhuba isho shonyene ta, iwe sushimanya nga paapa woowo ali ni bumanyilifu bukali naabi mu bye busoolo. Shilo shino s'anyala waakona atweela ni basilikhale babaaramire ta.

⁹Ikhaba aluno ari, ali ni khuuba nga waahentsile isi ebisa, oba mu lifuluma, namwe mu shifwo shishiindi shoosi. Buli muundu yeesi ukane awulile ari batweela khu basilikhale boowo beeribwile, kane bambaase bari liiye lyoowo lyoosi lyaaweelewo.

¹⁰Nio lwanyuma ikhaba abo babaali baanyindaalifu nga italanyi, nabo babe ni khuurya. Be mu Isiraeli boosi baamanya buulayi bubweene bari paapa woowo ali umusoolani uwe angaaki, naluundi basilikhale beewe bali baalayi naabi mu busoolo.

¹¹Kamakhula keesi ise ikhuwa, kali kari, khali iwe ubusaasile basilikhale boosi mu Isiraeli, khukhwaamila ilala mu shiriimba Dani, shishiili ingaaki, khukhwoolesa khu shiriimba Basisheba, shishiili ibikele. Liiye lino kane libe liikali naabi, nga bali busa nga kumuyekhe khu ndulo khwe inyaantsa. Nio lwanyuma iwe wamweene ubaraangirire khuutsya mu busoolo.

¹²Lwanyuma khutsye khusoolanise Dawudi buli oosi isi kane khumunyoole. Kane khumubuukhe busa nga liime ni likwa khu bunyaasi. Kane khumwiire niye umweene atweela ni basilikhale beewe.

¹³Ni baba bari baatitukhile bengiile mu shiriimba sheesi bebotokhelesa ni litikiiyi, kane khutikulule litikiiyi ilyo, khulimalile aasi. Singane khulekhe ikhaba khabaale na khatweela khe liitikiiyi nga kheemikhile khu ngaaki ta.”

¹⁴Kila Abisalomu ni basilikhale ba Isiraeli boosi baloma bari, “Kamakhula keesi Hushayi areerire kamalayi khuuminyisa keesi Ahisofeli akhuweele.” Khulwekhuuba abe Umukasya waakhalilewo ari, kane balobe kamakhula khukhwaama wa Ahisofeli, nio akile Umukasya areerere Abisalomu bihangafu.

¹⁵Lwanyuma Hushayi waatsya isi basaayi, Zadoki ni Abiyasaari, waabalomela, waababoolela kamakhula keesi abe Ahisofeli aawa Abisalomu ni baraangirisi be mu Isiraeli; waababoolela ni kamakhula keesi niye umweene aawayo.

¹⁶Waabalomela ari basiindikhe umuundu atsye waangu aboolele Dawudi bibiindu bino, nio shiilo isho alekhe khukona aambi ni luluutsi mu mubiimbi ta. Ne akhali akhalise atsye shaangelekha, nio akile niye umweene ni babaandu beesi ali ni nabo balekhe khukhwiiribwa ta.

¹⁷Ari Yonasani ni Ahimayazi abe baliindiile mu shifwo shishilaangibwa Rogeli. Abe busheele iliwo umuraambi umukhaana abe utsyatsaka n'ababoolela nio nabo ni batsya ni baboolela Dawudi. Khulwekhuuba abe sibali ni khukhwingila mu shiriimba ta.

¹⁸Ne she khabi imbi, yabayo umusoleeli mutweela uwabona waatsya waaboolela Abisalomu. Nashiryo babili bano benyukha awo baatsya wangu, khukhwoolisa ni boola kh'untsu iy'omusaani mutweela i Bahurimu, nga ali n'isebele isi bayaba khu lwaanyi lweewe. Babili bano beekha musebele umwo.

¹⁹Kila umukhasi uw'omusaani uwe ango awo, abukula shishiindu abiimba khu sebele tsana khu ngaaki, waanikhilakho biilimwa. Yaalekha khubawo uwashimanya ta.

²⁰Basilikhale ba Abisalomu ni boola aango awo, baareeba umukhasi uyo bari, “Ahimayazi ni Yonasani batsiliile khuli eena?” Umukhasi uyo weelamo ari, “Bakhalisile luluutsi baatsya.” Nashiryo basilikhale baatsya khubaweentsa. Ne ni baalekha khubanyoola ta, basilikhale tsana beelayo mu Yerusalemu.

²¹Nga basilikhale baamalile khukhwiilayo, babili abo baarura m'usebele, baatsya baaboolela umuyiinga Dawudi kamakhuuwa keesi baaba ni nako. Baalomela Dawudi bari, “Yinyukha wangu mukhalise luluutsi mutsye!” Kila bamuboolela kamakhula keesi Ahisofeli aawaanayo.

²²Kila Dawudi enyukha wangu, atweela ni babaandu beesi niye abe ni bano, bakhalisa luluutsi batsya shangelekha. Bwatsya khusha kumutishinyi, nga abe mbaawo na mutweela ukhakhalisile luluutsi Yorudaani ta.

²³Ahisofeli n'abona ari Abisalomu ni baraangirisi be mu Isiraeli sibali khuuloondelela kamakhula keewe ta, wekhala khu sikilya yeewe, waatsya, welayo ingo weewe mu shiriimba she i Gilo. Waaboolela be muntsu mweewe ni baraambi beewe, ibyo byeesi bali ni khuukhola, lwanyuma weeramo kumukosi wekoka. Baamusiikha mu biliindwa bye bakuuka beewe.

²⁴Lwanyuma Dawudi waatsya mu shiriimba she i Mahanayimu. Ne khana Abisalomu ni liiye lye ba Isiraeli, abe balikho bakhalisa luluutsi Yorudaani.

²⁵Abisalomu wawaamba Amasa waamwikesa khuuba niye umuraangirisi uwe kamahe, mu shifwo sha Yowabu. Amasa abe ali umusoleeli uw'omusaani bari Isira, nga ali umu Ishimaeli. Maayi wa Amasa abe baamulaanga bari Abigayili, umukhaana uwa Nahashi. Nahashi abe ali umukooko uwa Zeruya, maayi uwa Yowabu.

²⁶Liiye lye ba Isiraeli lyaatsya lyebuusila mu shibala she ba Gileyadi.

²⁷Nga Dawudi woolile mu shiriimba Mahanayimu, aabawo babaamureera bye khuulya. Baaba nibo: Shobi, umwaana uwa Nahashi, khukhwaama i Raba, nga bali ba Amoni; ni Makiri, umwaana uwa Amiyeli uwaama i Lodebari; ni Barazilayi, khukhwaama i Rogelimu, nga ali umu Gileyadi.

²⁸Byeesi baamureerera mwabamo tsisaamba tse khuukonakho, bye khukhwibiimba, bipwakhuli, tsisoongwe tsye kameetsi, iŋaano, baali, buufu, nabukubo umwooshe, kamakaanda,

²⁹bubuushi, kamabeele ke mu muka, kamasheese, ni kamabeele kamabwowu. Baabayilila bibiindu bino khulwekhuuba baamanya bari Dawudi ni basilikhale beewe intsala ilikho ibalya, naluundi abe baaluyile, khulwe khuuba mu mubiimbi.