Read lumasaaba 2 Samweli 19 Bible Online

2 Samweli 19 - lumasaaba bible

2 Samweli 19

¹Lwanyuma aabawo uwaboolela Yowabu ari, “Umuyiinga alikho alila, bari khulwekhuuba Abisalomu wafwiile.”

²Nashiryo khu shiifukhu isho, ikhaba nga abe liiye lya Dawudi lyaafuurire mu busoolo, shayuukha shaaba she kumutaambo isi liiye lyoosi. Khulwekhuuba abe bawuliile bari umuyiinga alikho alila khulwe khuufwa khwa Abisalomu.

³Basilikhale bakobola mu shiriimba nga bamolokha busa, uri abe beesi bafuurire mu busoolo.

⁴Dawudi waabiimba kamakhono keewe mu moni, waalila ni likono lye angaaki, nga aloma ari, “Abisalomu, umwaana wase! Abisalomu, umwaana wase!”

⁵Lwanyuma Yowabu waatsya muntsu, waalomela umuyiinga Dawudi ari, “Lwe shaleelo iwe waakilile basilikhale boowo boosi babeele ni khuswaala! Basilikhale bano khu shifukhu she shaleelo, bawonesele buulamu bwoowo, ni bwe babaana boowo, ni bwe baakhasi boowo.

⁶Iwe wokesanisile uri ukana abo babaakhakhukana iwe ta, waabiyila abo babaakhukana iwe. Khulwekhuuba sheesi iwe ukholile shaleelo, shookesanisile baraangirisi be liiye ni basilikhale boosi shiri, iwe siwinaanayo khu buulamu bwaabwe na khafwiiti khari ta. Abisalomu aba uli umulamu, ne ifwe fweesi khuba khukhufwiile, khali shaleelo iwe uli umusangaafu.

⁷Ni nashiryo, ari yinyukha urure ibulafu, utsye usiime basilikhale khulwe isho sheesi bakholile. Ise ikhwitsubila mu moni tsy'Omukasya indi singa ulekha khubasiima ta, isi busheela kumutikhinyi, mbaawo umusilikhale na mutweela ukane abe khu luwaande lwoowo ta. Ikhaba nga wabatsakakho ni bihangafu mu buulamu bwoowo, ne shino kane shibe nisho shishifuurisa khuuba shiibi khuukhukholikha khusi iwe mu buulamu bwoowo.”

⁸Kila umuyiinga enyukha khu ngaaki, atsya mu shilibwa she mu shiriimba, ekhala aasi. Babaandu boosi ni baawulila bari umuyiinga wekhaale mu shilibwa she shiriimba, bamwiitsayo. Ibyo biba biryo, abe buli mutweela khu basilikhale ba Isiraeli, waatitukhile waatsiile ingo weewe.

⁹Kila babaandu mu Isiraeli bakhaandisana bonyene nga baloma bari, “Umuyiinga Dawudi aakhuyeeta ifwe, waakhurusakho ba Filisitiya ni baasiku babaandi, abe babaakhuminikhilisa ifwe. Ne bona Dawudi aatitukhile waarura mu shibala sheewe khulwa Abisalomu.

¹⁰Bona ari, Abisalomu isi ifwe khwarobora khuuba umuyiinga weefwe, waafwiliile mu busoolo. Ne ari shiina kila khukhakobosa Dawudi waaba umuyiinga weefwe?”

¹¹Umuyiinga Dawudi n'awulila abe byeesi balikho bakhaandisanilakho, waasiindikha buurume isi basaayi Zadoki ni Abiyasaari, nga buloma buri, “Tsya mureebe baraangirisi be mu Yuda muri, ‘Shiina kila inywe muli mwenyene babaashiili khukhalawo she khukhuungobosa ise mu Yerusalemu nga umuyiinga ta, ate nga ba Isiraeli baamalile khaale khuukhalawo bari niileyo?

¹²Inywe ni nase khuli be nda indweela, muli baalebe baase babeene! Shiina kila inywe mwenyene muli babaaramire khukhuuntsikyelisa ise umuyiinga?’

¹³Naluundi tsya muboolele Amasa muri, ‘Iwe uli umulebe wase umweene. Ni nashiryo ise inakhwikesa iwe umuraangirisi uwe kamahe koosi. Ikhwitsubila isho, naluundi Wele ali niye umujulisi wase.’ ”

¹⁴Nga waakanikhile aryo, waanyalisa khuwooyawooya kimyooyo kye babaandu be mu Yuda boosi. Kila bamusiindikhila buurume nga buloma buri, “Iwe n'ukobole ino, ni basilikhale boowo boosi.”

¹⁵Nashiryo Dawudi waakwa khu ntsila nga akobolayo i Yerusalemu. Nga waatsiile woolile khu luutsi Yorudaani, waakaanana babaandu be mu Yuda. Abe baabusaane mu shiriimba Gilugaali, nga bakana bakhalise luluutsi Yorudaani ni naye.

¹⁶Mu baandu abo mwabamo Shimeyi uwaama i Bahurimu, nga ali umwaana uwa Gera, uwe mu shikuuka sha Benyamini. Weekha waangu ni babaandu be mu Yuda, khuutsya khukhwakaanila umuyiinga Dawudi.

¹⁷Abe ali atweela ni babaandu baboola shikana shitweela (1,000) khukhwaama mu shikuuka sha Benyamini. Abweene awo, Ziba uwaba abe nga ali umuraangirisi uwe babaakaanisa muungo mwa Solomoni, waatsya waangu, weekha khu luutsi Yorudaani, khuutsya khukhwakaanila Dawudi. Abe ali atweela ni babaana beewe likhumi na baraano, ni babaakaanisi kamakhumi kabili.

¹⁸Baambukha luluutsi baatsya baakaanila Dawudi ni be muungo mweewe, ni baaraambi beewe, naluundi baakhola ibyo byeesi Dawudi abe akana bakhole. Nga umuyiinga ali aambi khuukhalisa luluutsi, Shimeyi umwaana uwa Gera, waamwiimikha ibweeni, weesamo umuyiinga shiriifwa nga enamisa kumurwe aasi khukhwoolesa n'akutiila khu liloba.

¹⁹Waalomela umuyiinga ari, “Uwe lukoosi, ukhaakhalalila ise, namwe waakhebulila byeesi ise nakhola khu shifukhu khweesi iwe warurira mu Yerusalemu ta. N'ubilekhe bibe.

²⁰Ise naamanyile indi nakhola shishiindu shiibi. Ni nashiryo, bona lwe shaleelo, ise niye unyooyile khukhwaama mu lisaaye lya Yusufu lyoosi, khukhwiitsa khukhwakaanila iwe.”

²¹Ne Abishayi umusoleeli uwa Zeruya, waawotselela nga alomela angaaki ari, “Bali ni khukhwiira Shimeyi, khulwekhuuba niye mu mbuka iyo aatsya nga atsuba umuyiinga, uyo isi Umukasya aamala khaale khuurobora!”

²²Kila Dawudi aloma ari, “Abishayi, iwe ni wandaayo Yowabu, ise imbakhole inywe indyeena? Inywe nibo babaali ni khukhuumboolela ise, abo babaakholile bibiindu biibi? Lwe shaleelo ise baantsikesile umuyiinga uwa Isiraeli, mbaawo umuundu yeesi uuli ni khukhwiiribwa ta!”

²³Kila umuyiinga etsubila Shimeyi ari, “Mbaawo ukane akhwiire ta.”

²⁴Mefibosesi umwiitsukhulu uwa Saulo, naye weekha, waatsya khukhwakaanila Dawudi. Abe siwasiingilekho bikele ta; naluundi abe siwabekakho bunwaanwa, namwe waasiingakho bikwaaro byeewe khukhwaama nga abe Dawudi n'arura mu Yerusalemu waatsya ta.

²⁵Nga n'atsya khuumwakaanila, umuyiinga waamureeba ari, “Shiina kila ukheetsa khutsya fweesi?”

²⁶Mefibosesi weelamo ari, “Uwe lukoosi, nga n'umanyile, ise naalemala bikele. Nashiryo ise nalomela umwakaanisi wase ndi khayo nikhale khu sikilya ukisame khutsye, naye waafukiilisa. Naloma ndi ise siinyala khuusama isikilya ta, nashiryo naarama. Umuraambi waamombesa busa,

²⁷waatsya waandekha ise. Ne khukhwaama iwe n'uli uwe kamakhula nga ka malayika uwa Wele, iwe n'uukhole sheesi umanyile uri shikanibwa.

²⁸Khulwekhuuba iwe uba uwakana, khali weera babaandu be inda iya kuuka wase boosi, ikhaba ise samweene. Ne bona iwe waamba ise shiriifwa, naalya ni nawe khu shikabilo shitweela. Ne aba ise ikhukanakho khusi iwe shiina shishiindi, umuyiinga?”

²⁹Dawudi waamwiilamo ari, “Ukhakanikha biikali ta. Ise naakhalilewo khuubakaabanisa iwe ni Ziba liiswa lilyaba lya Saulo.”

³⁰Ne Mefibosesi weelamo umuyiinga ari, “Umuyiinga, khukhwaama iwe n'ukoboole ingo nga uli mulamu, khayo Ziba ayile lyoosi.”

³¹Ari, Barazilayi umu Gileyadi nga aama i Rogelimu, waatsya ni Dawudi khukhwoolesa ni boola khu luutsi Yorudaani. Waaroongisa Dawudi khukhwoolesa n'akhalisa luluutsi.

³²Barazilayi abe ali umusaani umuhangafu, nga olesa kimiiko kamakhumi shinaane kye buukhulu. Abe ali umusaani umuyiinda naabi, naluundi niye uwawatsaka Dawudi bye khuulya, imbuka isi aamala nga ali i Mahanayimu.

³³Dawudi waalomela Barazilayi ari, “Khalisa luluutsi khutsye i Yerusalemu ni nawe. Kane ise ikhuliinde iwe buulayi.”

³⁴Ne Barazilayi waalomela umuyiinga ari, “Ise naakorire, bona naaramisire kimiiko mikyeekhe kiri, ne khuutsya mu Yerusalemu n'umuyiinga intsya khukhola shiina?

³⁵Bona ise ari indi ni kimiiko kamakhumi shinaane kimibuufu, inyala yaabawo shishiindu shishinyala khukhuusangaasa ise luundi? Biilyo namwe bye khuunywa, ise sibishiŋaayila ta. Ise ari sinyala naawulila ikhaba nga babaandu balikho beemba kimyeenya ta. Umuyiinga, ise khuutsya ni nawe, ikhuwa buusiro bwa busa.

³⁶Ise kane ikhalise luluutsi Yorudaani ni nawe, ikhuroongisekho imbuka ngeekhe iri, naakame awo. Iwe ukhaluwa khukhuukholela ise bibiindu biilayi ta.

³⁷Ise ikhuloomba ndi iwe n'ufukiilile ise niileyo mu shiriimba mweesi isaalikha, nio nga naafwiile, baasiikhe ise khu ŋani tsya paapa ni maayi. Ne akhali ndi n'uutsye n'umwaana wase Kimuhamu, umubirise nga umwaana uwoowo.”

³⁸Umuyiinga waamwilamo ari, “Ise kane ntsye ni Kimuhamu, intsye imukholele isho shoosi sheesi kane iwe ukane uri imukholele. Ikhaba iwe wamweene, noola ibawo sheesi ukana ise ukhukholele, kane ishikhole.”

³⁹Lwanyuma babaandu boosi baambukha Yorudaani, ne umuyiinga waanyoowa khuurama shangelekha, waasibula Barazilayi, nga amukwa mu shifuba. Waaloomba ari khali Wele aweele Barizilayi tsikhabi, aryo Barizilayi welayo ingo weewe.

⁴⁰Umuyiinga waakhalisa luluutsi waatsya i Giligali, nga ali ni Kimuhamu, ni babaandu be mu Yuda boosi, ni shisiintsa she babaandu be mu Isiraeli. Bano boosi baatsya nga baroongisa umuyiinga.

⁴¹Lwanyuma babaandu khukhwaama mu Isiraeli baatsya isi umuyiinga baamureeba bari, “Shiina kila babaandu be mu Yuda bakhumolamolisile busa iwe ni be mu ntsu yoowo, ni basilikhale boowo, mwaakhalisa Yorudaani?”

⁴²Babaandu be mu Yuda baabeelamo bari, “Inywe isho shikhabakhalasa ta. Ifwe khukholile isho, khulwekhuuba umuyiinga ali umulebe weefwe umweene. Mbaawo sheesi khumurusilekho, namwe sheesi akhuweele ifwe khulwe khukhola isho ta.”

⁴³Kila babaandu be mu Isiraeli babeelamo bari, “Dawudi ali uweefwe khuubaminyisa inywe, khulwekhuuba ifwe khuli ni bikuuka likhumi. Khulwashiina kila inywe mukhulekelesa ifwe muryo? Ifwe nibo babaanyoowa khuuloma khuri khutsya khukobosa umuyiinga.” Ne babaandu be mu Yuda baakanikha tsilomo tsintsoki naabi khuuminyisa be mu Isiraeli.