Read lumasaaba 2 Samweli 2 Bible Online

2 Samweli 2 - lumasaaba bible

2 Samweli 2

¹Lwanyuma lwa bino, Dawudi wereeba isi Umukasya ari, “Ise niileyo mu shitweela khu biriimba bye mu Yuda, ishibwakale ishiwaambe?” Umukasya waamulomela ari, “Ni wiileyo.” Kila Dawudi ereeba luundi isi Umukasya ari, “Intsye mu shiriimba shiina?” Umukasya waamwilamo ari, “N'uutsye mu Heburoni.”

²Nashiryo Dawudi wawaamba baakhasi beewe babili, nga nibo Ahinomu ni Abigayili, waatsya ni nabo i Heburoni. Ahinomu abe aama i Yezureeli, ne Abigayili abe ali namulekhwa wa Nabali, uwaba aama i Karumeli.

³Dawudi waatsya ni basilikhale beewe, ni be tsiingo tsyaabwe, khuutsya khuumenya mu byaalo bibiili aambi ni Heburoni.

⁴Be lisaaye lya Yuda baatsya isi Dawudi i Heburoni, baamutsukhakho kamafura khu murwe, baamwikesa niye khuuba umuyiinga waabwe. Kila baboolela Dawudi bari, “Babaandu babaama i Yabesi, shishiili mu Gileyadi, nibo babaasiikhile Saulo.”

⁵Kila Dawudi asiindikhila babaandu abo buurume nga buloma buri, “Khali Umukasya abaweele inywe tsiikhabi! Khulwekhuuba nga ni mwasikhiile Saulo umuyiinga weenywe, mwokesanisile khuukana khuukali.

⁶Ise inoomba ndi khali Umukasya abokesanisile inywe khuukana khuukali ni bubweela! Ni nase kane imbakholele inywe biilayi, khulwekhuuba inywe mwaakholile shishiindu shiilayi naabi.

⁷Saulo waafwiile, ne be shikuuka sha Yuda baantsikesile ise khuuba umuyiinga waabwe. Nashiryo ni mube banyindalifu, mukharya ta.”

⁸Abuneri, umwaana uwa Neri, abe niye umuraangirisi we liiye lya Saulo. Bino biba biryo, abe Abuneri tsana wawaambile Isibosesi, umwaana uwa Saulo, waamuyilile i Mahanayimu,

⁹waamwikesile umuyiinga uwe bisiintsa bino: Gileyadi, ni Ashuri, ni Yezureeli, ni Efurayimu, ni Benyamini, ni Isiraeli yoosi.

¹⁰Mu mbuka iyo abe Isibosesi oolesa kimiiko kye buukhulu, kamakhumi kane na kibili. Waaba umuyiinga khuumala kimiiko kibili. Ne be shikuuka sha Yuda baaloondelela Dawudi nga niye umuyiinga waabwe.

¹¹Dawudi waaba umuyiinga uwa Yuda khuumala kimiiko musaafu ni kimyeesi kisesaba.

¹²Shifukhu shitweela, Abuneri umwaana uwa Neri, atweela ni basilikhale ba Isibosesi, baama i Mahanayimu, baatsya i Gibiyoni.

¹³Nga baakholile baryo, Yowabu umwaana uwa Zeruya, ni liiye lya Dawudi, baatsya baabakaanana khu litibo liliili i Gibiyoni. Kila Abuneri ni liiye lyeewe beekhala aasi khu luwaande lutweela lwe litibo, ne Yowabu naye ni liiye lyeewe bekhala aasi khu luwaande luluundi.

¹⁴Kila Abuneri akanikha isi Yowabu nga akuukuula ari, “Khayo batweela khu basilikhale beefwe babaafuura buulayi, benyukhe bakhakanemo kamaani khubone!” Yowabu waaloma ari, “Ni beenyukhe.”

¹⁵Nashiryo khukhwaama mu liiye lya Isibosesi, babaama mu shikuuka sha Benyamini benyukha likhumi na babili; ni khukhwaama mu liiye lya Dawudi nabo likhumi na babili.

¹⁶Kila buli mutweela akulukhila uwasheewe, buli mutweela waawuna uwasheewe lurima mu mbafu, boosi baafwiila abweene awo. Isho nisho shishikila shiifwo isho shishiili mu Gibiyoni, bashilaanga bari Khelekati Khatsurimu[1].

¹⁷Khaangukho, buli mutweela wenyukha khu ngaaki, busoolo bwaawunya imuka. Ne basilikhale ba Dawudi baawula liiye lya Abuneri lilyabamo ba Isiraeli.

¹⁸Mu busoolo umwo, mwabamo babaana ba Zeruya bataru, nga nibo: Yowabu, Abishayi, ni Asaheli. Abe nga Asaheli warerekho shikyele, atima nga ikhisi!

¹⁹Nashiryo nga Abuneri waatitukhile tsiindimo, Asaheli waamuloondakho, akhali khuunyukanyuka eyi ni neeyi ta.

²⁰Abuneri n'eshebukha waabona Asaheli waamwimbiyisile, waareeba ari, “Asaheli, iwe niye uwandimisile ise?” Asaheli welamo ari, “Niye ise.”

²¹Abuneri waamulomela ari, “Nyukanyuka, kane ubone umusilikhale ushiili umusoleeli, umutimise, umuwaambe umwiire, uyile bibiindu byeesi ayaayile” Ne Asaheli niye waarama nga waamwoomeelekho ta ta ta ta.

²²Kila Abuneri alomela Asaheli luundi ari, “Nga iwe siwaakamisile khukhuundimisa ta, ise inakhukhoonya! Ise ni wandaayo Yowabu, sikhulolana mu moni luundi ta.”

²³Ne Asaheli waamwoomelakho ilala. Nashiryo Abuneri waamwikuba ingeyo iye lifumo muunda, yaarurira khu mukoongo, waakwa aasi waafwa. Buli mutweela uwabona Asaheli nga waakwiile aasi waafwiile, eemawo waasila busa.

²⁴Ne Yowabu ni Abishayi nabo baatimisa Abuneri. Nga antsye bulikho bwiilabula, boola khu khakiingi khakhaalaangibwa khari Ama, khakhaali aambi ni Giya, shishiili khu mukhoosi kukuutsya mu mubiimbi kwe Gibiyoni.

²⁵Kila Abuneri abusaasa liiye lye shikuuka sha Benyamini atweela khu ngaaki khwe khakiingi, nga balikho beerekekhela busoolo.

²⁶Abuneri waakanikha isi Yowabu nga alaangilila luukali lweene ari, “Kane khusoolane ni khwirana khuri khukhwoolisa liina? Iwe suumanya uri ifwe khulikho khwireerera bihangafu ta? Kane liiye lyoowo litimise baalebe baabwe babeene, khukhwoolesa liina?”

²⁷Yowabu naye waamwiilamo ni likono liikali lyeene ari, “Ikhwitsubila mu moni tsya Wele umulamu ndi, ulekha khuuloma ilomo iyo, khali liiye lyase litimisile baalebe baabwe khukhwoolesa kumukaamba kumutishinyi!”

²⁸Nashiryo Yowabu waafuura ikhoombi, waakila basilikhale beewe baalekhela awo khuutimisa ba Isiraeli. Ni abweene awo, busoolo bwaakama.

²⁹Abuneri ni basilikhale beewe baakhuumba khuubirira mu litila lye luluutsi Yorudaani, shiilo isho shoosi. Baakhalisa luluutsi bakeenda kumutikhinyi kwoosi, khukhwoolesa ni baakobolayo boola i Mahanayimu.

³⁰Khaangukho nga Yowabu waakoboole khukhwaama khuutimisa Abuneri, waabusaasa liiye lya Dawudi atweela, waabala buukali bwe basilikhale. Nga waarusilekho Asaheli, abe basilikhale likhumi na syeenda nibo babaakhalikho ta.

³¹Ne liiye lya Dawudi abe lyeerire basilikhale ba Abuneri baboola bitoondo bitaru ni kamakhumi kasesaba (360), nga baama mu shikuuka sha Benyamini.

³²Yowabu ni liiye lyeewe baasuta kumulaambo kwa Asaheli, baakuyila baakusiikha i Beselehemu, mu biliindwa bye bakuuka beewe. Lwanyuma Yowabu ni liiye lyeewe baakeenda shiilo shoosi, boola mu Heburoni nga antsye busha.