Read lumasaaba 2 Samweli 21 Bible Online

2 Samweli 21 - lumasaaba bible

2 Samweli 21

¹Mu mbuka isi Dawudi aabeela nga ali umuyiinga, intsala yakwawo khuumala kimiiko kitaru, nga kiloondekhana busa. Nashiryo Dawudi waaloomba isi Umukasya, ari amuyeete. Umukasya waamwilamo waamuboolela ari, “Saulo ni be muntsu yeewe, bali ni kumusango kwe bubwiiri, khulwekhuuba Saulo aakhoonya babaandu be mu Gibiyoni.”

²Ba Gibiyoni abe sibali ba Isiraeli ta; abe bali be lisaaye lya Amori. Ba Isiraeli abe baabasuubisa bari sibakhaabeere ta, ne Saulo waakhakakho waabeera khulwekhuuba abe akana ba Isiraeli ni ba Yuda bayile liiswa lyoosi. Nashiryo Dawudi walaanga ba Gibiyoni, waakanikha ni nabo.

³Waabareeba ari, “Inywe mukana ise imbakholele shiina? Inywe mukana ise imbaliyile inywe shiina, nio akile muwe lisaaye ly'Omukasya tsiikhabi?”

⁴Ba Gibiyoni baamwiilamo bari, “Abe baakhakhuwa ifwe ifweeza ni zaabu khukhwaama muungo mwa Saulo, ibyo sibimala ta. Ne khu luwaande luluundi, ifwe sikhuli ni bunyala khukhwiira umuundu yeesi mu Isiraeli ta.” Dawudi waabareeba luundi ari, “Inywe abe mukana imbakhoolele shiina?”

⁵Kila bamwiilamo bari, “Saulo aakhakakho naabi ari akhwiire ifwe khuwewo mu Isiraeli.

⁶Khuwe ifwe babaandu musaafu be lisaaye lyeewe, khutsye khubasuunge mu moni tsy'Omukasya, khu lukiingi lw'Omukasya mu Gibiyoni.” Dawudi welamo ari, “Kane imbawe babaandu abo, nga ni mulomele.”

⁷Ne Dawudi waalekha khuwaanayo Mefibosesi umwaana uwa Yonasani ta, khulwekhuuba abe niye waamala khusuubisa Yonasani, nga abirira mu Mukasya, ari kane aliindatsake Mefibosesi.

⁸Saulo ni Rizipa, umukhaana uwa Aya, baaba ni basoleeli babili, nga nibo Arimoni ni Mefibosesi. Dawudi wawaamba babili abo, waalooselakho basoleeli baraano ba Merabu, umwaana umukhaana uwa Saulo, beesi aasaala ni Adiriyeli. Adiriyeli yuno abe ali umwaana uwa Barazilayi, umu Mehola.

⁹Wawaamba babaandu abo waabawa ba Gibiyoni, baatsya baabasuungila khu lukiingi, mu moni tsy'Omukasya, boosi baafwa. Baabasuunga khu shifukhu shishinyoowa she likesa, nga ne bananikha khuukesa seyiri.

¹⁰Lwanyuma Rizipa, namulekhwa uwa Saulo, waabukula isaawu iye bukoongwe, waakyaala aasi khu lwaanda, isi kimilaambo ikyo kyaba. Shino aashikhola nga ekhalawo khuuliinda, ari kumuusi binywiinywi bikhalya kimilaambo ta, namwe mu shilo tsisolo tsikhakilya ta. Waamenya awo khukhwaama nga likesa linanikha, khukhwoolesa ni lyawa.

¹¹Nga tsilomo tsyooleele Dawudi tsiri Rizipa, namulekhwa wa Saulo alikho akhola shishiindu isho,

¹²Dawudi waatsya i Yabesi Gileyadi, waasuta kamakuumba ka Saulo ni Yonasani, abe keesi ba Filisitiya baamala khaale khusuunga mu shiriimba she Besi Shani, lwanyuma lwe khukhwiirira Saulo ni Yonasani khu lukiingi Gilubowa.

¹³Nga waareerire kamakuumba ako, baatsya baabusaasa ni naako ke babaandu beesi ba Gileyadi baasuunga.

¹⁴Kila bayila kamakuumba ako, ni ka Saulo, ni ka Yonasani, baakasiikha mu Zela, liloba lye shikuuka sha Benyamini. Baakasiikha mu biliindwa bye shikuuka sha Saulo. Baakhola isho shoosi sheesi umuyiinga aabalomela, nio lwanyuma Wele waabawaambila shiisa, welamo khuuloomba khwaabwe.

¹⁵Ba Filisitiya baakelawo bebwakala ba Isiraeli luundi. Dawudi waatsya ni liiye lyeewe, baasoolanisa ba Filisitiya ikhumaliilisa Dawudi waaba nga waaluyile naabi.

¹⁶Kila umusaani isi balaanga bari Ishibi Benobu, nga ali uwe lisaaye lye kimisaani kimiboofu naluundi kimileeyi naabi, aakana bari awune Dawudi lifumo. Abe lifumo ly'omusaani uyo lisiro naabi nga lyoolisa tsikilo tsitaru ni shisiintsa, nga ali ni lurima nalwo.

¹⁷Ne khaanguukho, Abishayi umusoleeli uwa Zeruya, waatsaanuukha waatimiilila Dawudi, webwakala kuusaani ukwo, waakukhoonya. Kila basilikhale ba Dawudi bakhalawo bari, “Khukhwaama ari, iwe singane utsyatsake mu busoolo ni nafwe ta. Khulwekhuuba iwe niye ingabo yeefwe, naluundi buyiinga bwa Isiraeli bwiitsa khuhela.”

¹⁸Lwanyumakho, indi abawo buusoolo bubuundi akari e ba Isiraeli ni ba Filisitiya, mu shifwo bari Gobu. Mu busoolo ubwo, Sibekayi, uwaama i Husha weera kuusaani kuuboofu naluundi kuuleeyi, kweesi baalaanga bari Safu.

¹⁹Aabawo buusoolo bubuundi ni ba Filisitiya, i Gobu. Mu bweene ubwo, Elihanani umusoleeli uwa Yare Oregimu, abe uwaama i Beselehemu, waakhoonya kuusaani kuuboofu naluundi kuuleeyi, bari Goliyasi, nga kwaama i Giti. Abe liifumo lye kuusaani ukwo baalikhwiikha khu kuusaala kuuboofu.

²⁰Nga imbuka yaabirirewo, aabawo buusoolo bubuundi i Gasi. Buno nabwo bwabamo kuusaani kuuboofu naluundi kuuleeyi, nga buli kumukhono na buli shikele, khulikho tsintsala tsiseesaba.

²¹Nga kuusaani kwaatsekhelela ba Isiraeli, kila Yonasani, umwaana uwa Shimeyi akwiira. Shimeyi yuno abe ali wandaaye uwa Dawudi.

²²Kimisaani kine ikyo kyaba abe kyaama i Gasi. Dawudi ni basilikhale beewe baakiira kyoosi.