Read lumasaaba 2 Samweli 22 Bible Online

2 Samweli 22 - lumasaaba bible

2 Samweli 22

¹Lwanyuma lw'Omukasya khuuwonesa Dawudi khukhwaama khu baasiku beewe boosi, ne khufuurira ilala khukhwaama khu Saulo, weembela Umukasya kumweenya.

²Abe kumweenya kuloma kuri, Umukasya iwe uli niye umutseeti wase, naluundi iwe niye lumako mweesi ise nibisa iwe niye uwumbonesa ise khukhwaama khu baasiku baase.

³Iwe niye umutseeti wase, mweesi ise niibisa, iwe niye ingabo yase, naluundi she busoolo shase she kamaani shishimbonesa ise, iwe niye luumako mweesi ise niibisa iwe niye umuwonesi wase, uwumbonesa khukhwaama khu be bisayuumba.

⁴Mukasya, ise ikhuruuya iwe, khulwekhuuba ise nga ni naloomba isi uli, iwe wambonesa ise khukhwaama khu baasiku baase.

⁵Khulwekhuuba abe ise noleele ilala khuufwa, nga khwaantsibotokheleele nga inyaantsa ni yilyeebula, abe khukana khuumile ise nga kameetsi kakaasalasaale.

⁶Kimireko ky'emakoombe abe kyamaambile ise, abe kyaantsiboweleele kyaantsomeelekho.

⁷Ne nga indi mu ngunyi ingali, ise naalilila Umukasya Wele wase. Nga ali iyo mu Lisaayilo likhulu, Umukasya waawulila likono lyase, waantsilamo khuuloomba khwase.

⁸Shibala shaanikina naluundi shaatengaala; sheesisiikha, khulwekhuuba abe iwe, Umukasya, waakhalaale.

⁹Lisuusi lyaabonekha nga liniina mu ngaaki. Tsinimi tsye kumulilo kukulyeebukha, tsyaaniina nga tsyaama mukhanwa mweewe.

¹⁰Iwe wabayuula likulu weekha aasi, nga waasaambile bikele byoowo khu mifuumbi kikibuusile, nga kamamali ti.

¹¹Iwe weekha nga wekhaale khu bakeruubi; imbewo yaaba niyo tsindaha tsyoowo.

¹²Shishiilima shakhwibotokhelela iwe nga lisari; shishiilima she kamafuumbi kakaareera ifula.

¹³Luheni lwe ifula lulukhwinyoowa iwe ibweeni, lwatsasa lwakhosa khu shibala shoosi.

¹⁴Mukasya, Wele uwe mu ngaaki naabi, likono lyoowo lyakuulila khukhwaama mwikulu, lyawulilikhana.

¹⁵Iwe wasalanisa baasiku boowo, nga uraambisa buyiingo bwe luheni.

¹⁶Iwe wakhookhela mu nyaantsa, kimyaanda kye kameetsi aasi mwiiloba kyaabonekha. Iwe ni warafuwa naabi, shibala shatengaala khukhwoolesa khu mili kyasho.

¹⁷Iwe weekha aasi khukhwaama mwikulu mu ngaaki, wamaamba ise, wantsinyusa aasi mu nyaantsa.

¹⁸Iwe wambonesa ise khukhwaama khu baasiku, abe babaakhaangana ise nakhari ta, naluundi abe babaali ni kamaani khukhuuminyisa ise.

¹⁹Lweesi bihangafu byangwiilakho, baasiku baase beetsa baantsibwakala, ne iwe Mukasya, waba ingabo yase.

²⁰Nga bangunyiile ise mu shifwo shitweela, Mukasya, iwe wambonesa, khulwekhuuba ungana ise.

²¹Mukasya, iwe uli umulayi isi ise, khulwekhuuba ise ikhola bibiindu biilayi; naluundi iwe umba ise shiwaanwa, khulwekhuuba ise siindikho ni kumusaango ta.

²²Khulwekhuuba ise inondelela byeesi iwe uloma, naluundi sinakhwantsukhakho iwe, Wele wase, natsya naakhola bye bubwoonaki ta.

²³Khulwekhuuba ise nawaamba indeekela yoowo, naluundi sinayantsukhakho bilakilo byoowo ta.

²⁴Mu moni tsyoowo ise siindikho ni kumusaango ta, naluundi ise sinaayiwaambila mu byoonako ta.

²⁵Nashiryo Umukasya waayimba ise shiwaanwa, khulwekhuuba ise ikhola bibiindu biilayi; khulwekhuuba ise siindikho ni kumusaango mu moni tsyoowo ta.

²⁶Iwe busheele uli umwiyikinwa, isi abo babaakhukana iwe; iwe uli uwe shiisa, isi abo babaakhalikho ni bibyoonako ta.

²⁷Abo babaali bakhosefu, iwe ubokesanisa bukhosefu bwoowo; ne abo babaali baboonaki, iwe ubakhalila kamakesi ke angaaki.

²⁸Abo babaali babewombeekha, iwe ubawonesa khukhwaama mu bihangafu; ne abo babeniinisa angaaki, iwe uweentsa kimikhoosi kye khubaswaasa

²⁹Mukasya, Wele weefwe, iwe uli niye itaala, iyimulikhila ise nga indi mu shiilima.

³⁰Wele wase, iwe uwunjeeta ise naawula kamahe kamakali, iwe niye ukila ise nawaamba biriimba.

³¹Wele, kimikhoosi kyoowo kili kya ŋali, ni byeesi iwe uloma bili bituufu. Iwe uli ingabo iye babaandu babaatima isi iwe bari nio ubatseete.

³²Khulwekhuuba mbaawo ukuundi uuli Wele ta, akhali Umukasya yeenyene. Iwe weenyene niye uuli lulwaanda!

³³Wele yeenyene niye uuli luumako lwase lwe kamaani, iwe niye ukila ise naamenya mu lukoosi.

³⁴Iwe niye ukila ise naaba ni bikele bibiitima nga bye ikhisi, naluundi iwe niye ukila ise neema khu bikoongo khu ngaaki.

³⁵Iwe niye uwundeekela ise isaambo iye khusoolana, ni khuuraambisa buyiingo bwa buroonzi.

³⁶Iwe niye uwaamba ise ingabo iye buwonesi, ni buyeeti bwoowo bwaakila ise naaba uwe angaaki.

³⁷Iwe niye uwaamba ise kumukhoosi kumubalaayi kwe khuukeendelakho, nashiryo ise naalekha khukhwituya niikhupa aasi ta.

³⁸Ise nanyalisa khutimisa baasiku baase khukhwoolesa nabawaamba, nakobola nga naamalile khubeera boosi.

³⁹Ise nabeera boosi naabamalawo; nabawunaka boosi ni luurima, baakwa aasi mu bikele byase.

⁴⁰Khulwekhuuba iwe waamba ise kamaani ke khuusoolana; iwe waakila ise nafuura abo babaantsibwakala ise.

⁴¹Iwe niye uwaakila baasiku baase baatitukha baatsya; naluundi ise nanyalisa khukhwiira baasiku baase.

⁴²Imbo balila, bataamba ubayeeta; imbo balilila Umukasya, ne waalekha khubeelamo ta.

⁴³Nabafuura, nafwaana busa usha lifukhuulu, nabakhaandakilila nga ukhaandakilila liitosi khu ntsila.

⁴⁴Iwe wambonesa ise khukhwaama mu khusoolana ni kamanaambo; iwe wantsikesa ise khuuba umuraangirisi uwe kamanaambo; keekela baakulwa baase.

⁴⁵Kamanaambo kakaandi keetsa isi ise nga kaafulila aasi busa; khaangu akho baaloondelela byeesi ise inoma.

⁴⁶Banaambo abo kamaani kaabawamo, beetsa nga banikina busa khukhwaama mu biriimba byaabwe bibiilikho kamatikiiyi.

⁴⁷Mukasya wase, iwe uli uliwo umulamu! Kane ikhuruuye iwe! Wele wase kane ise ikhwisemo iwe shiriifwa, khulwekhuuba iwe niye buwonesi bwase.

⁴⁸Iwe niye uwaakila ise nelihaasa khu baasiku baase, iwe wara kamanaambo aasi e buwuli bwase.

⁴⁹Iwe wambonesa ise khukhwaama mu baasiku baase, waaniinisa ise angaaki e baasiku baase, iwe wambonesa ise khukhwaama khu baasiku baase.

⁵⁰Mukasya, ni khulwe ilomo iyo, kane ise ikhuruuye naabi, naluundi ikhwimbile iwe naabi, nga ndi mu manaambo koosi.

⁵¹Iwe niye ukila ise umuyiinga, umurobore woowo, naafuura mu busoolo bwe kamaani. Iwe wokesanisa khuukana khukhuukhakama ta, isi Dawudi ni lisaaye lyeewe, biilo ni biilo.