Read lumasaaba 2 Samweli 23 Bible Online

2 Samweli 23 - lumasaaba bible

2 Samweli 23

¹Tsino nitsyo tsilomo tsiimaliilisi tsya Dawudi, umwaana uwa Yese. Tsilomo tsy'omurobore uwa Wele, uwaniinisibwa angaaki, wekyela umuyiinga, uweembela ba Isiraeli kimyeenya. Tsilomo tsa Dawudi tsimaliilisi tsiloma tsiri:

²Umwoyo uw'Omukasya akanikhila khuubirira musiise, nga wambeele ise byeesi indi ni khuukanikha.

³Wele uwe ba Isiraeli waamalile khuukanikha, lulwaanda lwa Isiraeli lwanomeele ise luri: umuundu yeesi uwula buulayi babaandu, nga ali uwisaaya Wele mu khuwula khweewe,

⁴afwaana busa nga inyaanga n'irura, erurukhilila nga inyaanga n'ibonekha akhali kamafuumbi ta. Erurukhilila busa nga inyaanga nimulikha lwanyuma lwe kuufula kukali.

⁵Ilala, musaambo yino niyo isi Wele aweleele be muntsu yase tsiikhabi. Khulwekhuuba niye waamalile khuukhola ni nase indakaano ikhawawo ta. Waaruungikha buli shiindu buulayi, s'aakhebilile byeesi niye aamala khuusuubisa ta. Isho nisho sheesi ise nikoomba. Ilala, Wele kane anjeete ise, kane bino byoosi bikholikhe.

⁶Ne babaandu baboonaki bali busa nga kamawa, keesi bamalile khutuuma busa; mbaawo unyala waraambisa kamakhono busa khuukalima ta,

⁷akhali indi uyo yeesi ukalima, ali ni khuuraambisa liifumo lilyooki, naluundi bali ni khuukokhelawo ni abweene.

⁸Kamasiina ke basaani baanyindaalifu nga babaali babaakaanisi ba Dawudi niko kano: Isibosesi, umwaana uwa Hakimoni, nga niye umuraangirisi uwe baataru.

⁹Abe Eliyazari, umwaana uwa Dodo, umu Ahohi, niye ukhola khabili mu banyindaalifu baataru bano. Shiifukhu shitweela nga ba Filisitiya balikho basoolanisa ba Isiraeli, niye ni Dawudi besuungula khukhwibwakala ba Filisitiya. Basilikhale be ba Isiraeli boosi, baatitukha baatsya,

¹⁰khuurusakho Eliyazari yenyene niye uwaramawo. Ebwakala waakhoonya ba Filisitiya, khukhwoolesa kumukhono kweewe kwafwiilila, ne nga s'anyala walekhuula luurima ta. Nga Eliyazari waamalile khubeera, basilikhale ba Isiraeli beelayo busa khubukula bye busoolo khu bafu shoonyene. Khu shifukhu isho, Umukasya waanyalisa Isiraeli khuuwula busoolo bwe kamaani.

¹¹Ukhola khataru bari Shama, umwaana uwa Age, abe uwaama i Harari. Shiifukhu shitweela, ba Filisitiya babuusa liiye lyaabwe, baatsya i Lehi, bari boonakise kimikuunda kikiilimo tsibalaayo. Basilikhale babaaramire boosi baatitukha baatsya.

¹²Ne Shama weemikha mu mukuunda akari, weera ba Filisitiya, waawonesa kimikuunda ikyo. Khu shifukhu isho, Umukasya waanyalisa ba Isiraeli khuuwula mu busoolo bwe kamaani.

¹³Mu mwiiko mutweela, nga yaba ili imbuka iye liikesa, basaani baanyiindalifu bataru abo babaaba batweela khu makhumi kataru, baatsya khukhwakaananamo ni Dawudi nga ali mu lifuluma lye Adulamu. Abe liiye lye ba Filisitiya lyebuusile mu Litila lye Refayimu,

¹⁴nga abweene awo, yaba baamala khuuwaamba Beselehemu. Ne yaba Dawudi ali mu kumako kweewe.

¹⁵Nga buulesa bwaamuliile kila aloma ari, “Abe uri umuundu waatsya waakhutayila kameetsi khukhwaama mu sebele ili mu shilibwa sha Beselehemu waakhureerera, waanywa!”

¹⁶Kila basaani baanyiindalifu abo bahatuna bengila mu kaambi iye ba Filisitiya, bataha kameetsi khukhwaama mu sebele iyo, baakayilila Dawudi. Ne Dawudi waalekha khukanywa ta; waakatsukha busa aasi.

¹⁷Kila aloma ari, “Wele wase khali s'afukiilisile ise inywa kameetsi kano ta, khulwekhuuba shili busa nga khuunywa kamafuki ke basaani bano babewaanileyo buulamu bwabwe khuutsya khukareera.” Ni nashiryo walekha khukanywa ta. Bino nibyo bibiindu bye bunyindaalifu byeesi basaani Bataru bano be kamaani baakhola.

¹⁸Ari, Abishayi, abe niye umuraangirisi uwe banyindaalifu kamakhumi kataru. Abishayi ni wandaaye weewe Yowabu, abe bali babaana ba Zeruya. Niye ekholela lisiina mu makhumi kataru kano, nga n'eera baasiku beewe bitoondo bitaru.

¹⁹Abe niye uwamanyikhana naabi mu makhumi kataru kano, naluundi niye uwekyela umuraangirisi waabwe. Ne shitweela busa s'ekela mutweela khu bataru abo ta.

²⁰Benaya umwaana uwa Yehoyada, abe ali umusaani umunyindaalifu naabi, naluundi abe akhola bibiindu bye kamaani. Abe aama i Kabuzeli.

²¹Naluundi weera umu Misiri, ng'ali umusaani umuleeyi, naluundi umuboofu. Umu Misiri abe wawaambile liifumo mu mukhono kweewe, ne Benaaya waamutsya n'imiimbo yonyene, waayuula lifumo khukhwaama mu mukhono kw'Omumisiri, waamuwunila lilyeene, waamwiira.

²²Benaaya umwaana uwa Yehoyada uwe Kabuzeli, waaba uwamanyikhana naabi mu makhumi kataru ako.

²³Waaba nga waamanyikhana naabi mu makhumi kataru, ne waalekha khwituubaasa khu baataru abo ta. Dawudi waamwikesa khuuba umuraangirisi uwe liiye lililiinda Dawudi umweene.

²⁴Batweela khu makhumi kataru baaba nibo: Asaheli, wandaaye uwa Yowabu; Elihana, umwaana uwa Dodo khukhwaama i Beselehemu;

²⁵Shama khukhwaama i Harodi; Elika khukhwaama i Harodi;

²⁶Helezi khukhwaama i Palitati; Ira umwaana uwa Ikesi khukhwaama i Tekowa;

²⁷Abiyezeri, khukhwaama i Anasosi; Mebunayi, khukhwaama i Husha;

²⁸Zalumoni, khukhwaama i Ahohi; Maharayi, khukhwaama i Netofa;

²⁹Helebu umwaana uwa Bana, khukhwaama i Netofa; Ita, umwaana uwa Ribayi, khukhwaama i Gibeya, nga ali uwe shikuuka sha Benyamini;

³⁰Benaaya, khukhwaama i Pirasoni; Hidayi, khukhwaama mu ntsitsi tsye i Gasi;

³¹Abiloboni, khukhwaama i Arabasite; Azimafesi, khukhwaama i Bahurimu;

³²Eliyahaba, khukhwaama i Shalaboni; babaana ba Yasheni ni ba Yonasani;

³³Shama, khukhwaama i Harari; Ahiyamu, umwaana uwa Sharari, uwaama i Harari;

³⁴Elifeleti umwaana uwa Ahasibayi khukhwaama i Maka; Eliyamu umwaana uwa Ahisofeli, khukhwaama i Gilo;

³⁵Heziro, khukhwaama i Karumeli; Parayi, khukhwaama i Arabite;

³⁶Igali umwaana uwa Nasani, khukhwaama i Zoba; Bani, khukhwaama i Gadite;

³⁷Zeleki, khukhwaama i Amoni; Naharayi khukhwaama i Berosi. Abe yuno niye usutila Yowabu, umwaana uwa Zeruya bye busoolo byeewe.

³⁸Khwaabakho ni Ira, khukhwaama i Isiri; Garebu, khukhwaama i Isiri;

³⁹ni Uriya, khukhwaama i Hiti. Atweela baaba baselikhale 37.