Read lumasaaba 2 Samweli 3 Bible Online

2 Samweli 3 - lumasaaba bible

2 Samweli 3

¹Aabawo busoolo khuumala imbuka ingali, akari e luwaande lwa Saulo ni be luwaande lwa Dawudi. Be luwaande lwa Saulo baatsya nga bawetsekhelela kamaani, ne be luwaande lwa Dawudi baatsya nga beloosela busa kamaani.

²Dawudi aasaala babaana baakali busa nga amenya i Heburoni. Umukiboole bari Amunoni, maayi weewe abe bari Ahinowamu, uwaama i Yezureeli.

³Ukhola khabili bari Kileyabi, maayi weewe bari Abigayili, namulekhwa wa Nabali, uwaama i Karumeli. Ukhola khataru bari Abisalomu, maayi weewe bari Maka, umukhaana wa Talumaayi, uwaba umuyiinga uwa Geshuri.

⁴Ukhola khane bari Adiniya, maayi weewe bari Hagisi. Ukhola kharaano bari Shefatiya, maayi weewe bari Abitali.

⁵Ukhola khasesaba bari Isereyamu, maayi weewe bari Egela.

⁶Nga khuusoolana khushiitsya mu moni akari e liiye lya Saulo ni lya Dawudi, abe khu luubeka lwe liiye lya Saulo, Abuneri abe alikho ekhwiikha khuuba uwe kamaani.

⁷Saulo aaba n'umukhasi uwe bulafu, abe isi balaanga bari Rizipa, umukhaana wa Ayiya. Kila shifukhu shitweela Isibosesi areeba Abuneri ari, “Shiina kila wilile khu mukhasi uwa paapa wase?”

⁸Shino shakhalasa naabi Abuneri, kila areeba Isibosesi ari, “Iwe wambaasa uri ise ndi busa nga imbwa iyaama mu Yuda? Khukhwaama khaale ise ndi umwiyikinwa isi lisaaye lya paapa woowo, ni baalebe beewe, ni basaale beewe. Ise sinakhulyatsakamo iwe luwomelo naakhuwaanayo isi Dawudi ta. Ne bona shaleelo ulikho umbaabila ise kumusaango kukuwaamba khu mukhasi.

⁹Inoomba indi abe noola naakhayikhile khuuyeeta Dawudi afuna ibyo byeesi Umukasya aamusuubisa ta, khali Wele ambeele ise shitaambiso!

¹⁰Wele umweene waamala khuuloma ari, arirusa buyiinga khukhwaama khu lisaaye lya Saulo, abwakaanise Dawudi khuuba umuyiinga. Nio Dawudi awule Isiraeli ni Yuda, khukhwaamila ilala mu shiriimba Dani khukhwoolela ilala mu Basisheba.”

¹¹Ne khulwe khuurya naabi Abuneri, Isibosesi waalekha khuumwilamo ilomo yoosi ta.

¹²Lwanyuma Abuneri waarumana batweela khu basilikhale beewe khuuyila buurume isi Dawudi. Abe buloma buri: “Ise inoma indi khali iwe ubeele niye umuyiinga uwe linaambo lyoosi. Iwe nikane ukhole indakaano ni nase, kane ise imbooyawooye babaandu boosi mu Isiraeli, bakhwikese iwe umuyiinga waabwe.”

¹³Dawudi waamwilamo nga aloma ari, “Mbaawo buubi ta. Kane ise ikhole indakaano ni nawe. Ne akhali ise ikhukanakho shishiindu shitweela shonyene: singane khwikhale ni nase khukanikhe ta, akhali nga unyoowa khukhuundeerera Mikali, umwaana umukhaana wa Saulo.”

¹⁴Kila Dawudi asiindikha baarume khuutsya isi Isibosesi, umwaana wa Saulo, nga buloma buri, “Ingobosele ise umukhasi wase, Mikali, isi ise namala khuukhwa nga ni neera ba Filisitiya shitoondo shitweela.”

¹⁵Kila Isibosesi arumanisa baatsya khuurusa Mikali khu museetsa weewe, ulaangibwa Palitiyeli, umwaana wa Layisi.

¹⁶Palitiyeli waaloondelela Mikali ni basilikhale, nga alikho alila, khukhwoolesa i Bahurimu. Ne Palitiyeli n'ola iyo, Abuneri waamulakila ari, “Kobolayo ingo woowo.” Weelayo ingo weewe.

¹⁷Kila Abuneri akanikha isi baraangirisi be bikuuka bibiili mu Isiraeli, waababoolela ari, “Inywe mwaamalile imbuka ingali, nga mwikoomba muri khali Dawudi abeele umuyiinga weenywe.

¹⁸Ni nashiryo, ni mushikhole anariha. Khulwekhuuba Umukasya umweene waaloma ari, ‘Ise ikharaambise umwakaanisi wase Dawudi, khuwonesa babaandu baase, khukhwaama mu makhono ke ba Filisitiya, ni khukhwaama mu makhono ke baasiku baabwe boosi.’ ”

¹⁹Lwanyuma lwe khuukanikha ikhaba isi babaandu be shikuuka sha Benyamini, Abuneri waatsya i Heburoni waaboolela Dawudi ibyo byoosi byeesi ba Isiraeli ni be lisaaye lya Benyamini, baaba baalomile.

²⁰Abuneri waabukula basilikhale kamakhumi kabili, waatsya ni nabo. Nga boolileyo, Dawudi waabakholela buukeni bwe kamaani.

²¹Lwanyuma lwe buukeni, Abuneri waalomela Dawudi ari, “Uwe lukoosi, khayo niileyo intsye imbuusaase ba Isiraeli atweela imbareere ano, bakhole indakaano ni nawe. Kane iwe wikele umuyiinga uwe linaambo lyoosi, nga ifwe abe ni khubeele khwikoomba.” Nashiryo Dawudi waasibula Abuneri, waatsya mu lukoosi.

²²Khaanguukho nga Abuneri alitsiile khukhwaama i Heburoni, Yowabu ni basilikhale ba Dawudi baakobola, nga baasutile bibiindu biikali abe byeesi baama khuunuula mu busoolo ni baasiku baabwe.

²³Nga ni boola busa bari, aabawo uwaboolela Yowabu ari, “Abuneri, umwaana wa Neri aama khwiitsa ano khuukeniyila umuyiinga. Umuyiinga waamusiibuule waatsiile mu lukoosi, mbaawo sheesi amukholilekho ta.”

²⁴Kila Yowabu atsya isi umuyiinga, waamureeba ari, “Shiina kila ukholile shishiindu nga shino shiri? Abuneri anyala aryeena weetsa ano khuukhubona iwe, waamusibula waatsya?

²⁵Iwe waashimanyile uri Abuneri, umwaana uwa Neri, etsile ano khuukhubeeha iwe, ni khuumanya bibiindu byoosi byeesi iwe ulikho ukhola. Akana amanye kamaani ke liiye lyoowo.”

²⁶Nga Yowabu waarurire isi Dawudi, waasiindikha baarume khuuloonda khu Abuneri. Baamunyoola nga ali mu sebele iye Sira, kila bamwisyayo isi Yowabu. Ne Dawudi s'amanyakho abe bibiili khuukholikha ta.

²⁷Nga Abuneri waakobooleyo i Heburoni, Yowabu wekholisa nga ukana khumukanikhayo mu shimoonyo. Kila Abuneri amwiisa andulo mu khaseenge khakhaali aambi ni shilibwa shikhulu. Nga boolile mu bweene umwo, waamwikuba muunda waamukhoonya. Makiboole abe Abuneri waayira Asaheli, wandaaye uwa Yowabu.

²⁸Dawudi n'awulila ari Yowabu weerire Abuneri, waaloma ari, “Ise nitsuba mu moni tsy'Omukasya, indi buyiinga bwase sibulikho ni kumusaango khulwe khuufwa khwa Abuneri ta.

²⁹Khali kumusaango ukwo kuramire khu Yowabu ni lisaaye lyeewe, babe nga busheele bafuna buulwaale bubuukhali butweela ta, babe ni kamakoontsyo, ni buulwaale bwe lihaafu. Khali bafwiliile mu busoolo, naluundi balekha khuba ni biilyo ta.”

³⁰Yowabu ni wandaaye weewe Abishayi baakhoonya Abuneri, khulwekhuuba abe niye amakiboole aakhoonya waandayaabwe Asaheli. Aamukhoonyela mu busoolo i Gibiyoni.

³¹Lwanyuma Dawudi waalomela Yowabu ni babaandu boosi babaaba ni naye ari, “Khu khwookesanisa kumutaambo, ni mwinuule bikwaaro byeenywe, mwibowe bikwaaro bye bukoongwe, mulile Abuneri.” Umuyiinga Dawudi mweene waama inyuma nga aloonda khu baandu abe babaasutile kumulaambo.

³²Baasiikha Abuneri i Heburoni, ne umuyiinga weema khu ŋani, waalilila angaaki.

³³Kila umuyiinga waasola nga embela Abuneri kumweenya kwe khuumusiikha, nga kuloma kuri: “Abuneri, shiina kila ufwiile mu saambo iyo? Shiina kila ufwiile busa nga umusilu?

³⁴Abe bakhuboyile kamakhono, namwe abe bakhuboyile bikele? Waafwiila busa uryo, mu makhono ke babaakhulilemo luwomelo.” Kila babaandu boosi balila luukali naabi, khulwa Abuneri.

³⁵Nga antsye abe bushiili kumuusi, babaandu boosi baatsya isi Dawudi bamwikoontselela bari alyekho biilyo. Ne Dawudi wetsuba nga aloma ari, “Noola namala naalya khu khaandu nga inyaanga ishiili khukwa ta, khali Wele akhaliile ise kumusaango!”

³⁶Babaandu ni baabona sheesi Dawudi aakhola, shabasangaasa naabi, mu saambo niyo indweela nga bibiindu byoosi byeesi aba akhola.

³⁷Nashiryo babaandu be mu Yuda ni Isiraeli boosi baashimanya bari, umuyiinga Dawudi s'ewehaambilekho mu khukhoonyebwa khwa Abuneri, umwaana uwa Neri ta.

³⁸Kila umuyiinga alomela baraangirisi be mu buyiinga bweewe ari, “Inywe simwaashimanyile muri lwe shaleelo, umuundu uwe angaaki naabi naluundi umuraangirisi mu Isiraeli wafwiile ta?

³⁹Ikhaba nga ise ndi uwawakhibwakho kamafura khuuba umuyiinga, ne Yowabu ni Abishayi bokesanisile bari bali ni buunyala buukali khukhuufuura ise. Ise inoomba indi khali Wele elihaasile shishoonako sheesi bakholile shino.”