Read lumasaaba 2 Samweli 4 Bible Online

2 Samweli 4 - lumasaaba bible

2 Samweli 4

¹Nga Isibosesi, umwaana uwa Saulo waawuliile ari Abuneri waafwiliile mu Heburoni, kamaani kaamuwamo naabi. Naluundi buli mutweela mu Isiraeli waaba ni khukhwiyembelela naabi.

²Isibosesi abe waarawo babandaaye babili, nga nibo Bana ni Rekabu, khuuraangirira basilikhale babaatsya khuunuula bibiindu khukhwaama mu baasiku baabwe. Bano baaba babaana ba Rimoni, uwe mu shikuuka sha Benyamini, nga amenya i Berosi.

³Babaandu abe babaamenyatsaka mu Berosi, abe baatitukha baatsya i Gitayimu. Bashimenyayo ni khukhwoolesa shaleelo.

⁴Yonasani, umuwaana uwa Saulo, abe ali n'umwaana nga bamulaanga bari Mefibosesi, ne nga waalemala bikele. Yaba nga ali ni kimiiko kiraano kye buukhulu, kamakhuuwa ke khuufwa khwa Saulo ni Yonasani ni koola khukhwaama i Yezureeli, umulesi weewe waamushuula khuutima ni naye. N'aaba nga ali mu khaangu, umwaana uyo wekhupa aasi, wekela umuleme.

⁵Shifukhu shitweela, Rekabu ni Bana, babaana ba Rimoni uwama i Beyerosi, baatsya muntsu iya Isibosesi. Yaba antsye abilile, nga waakonile aasi alikho awolamwo khakeekhe.

⁶Umuliindi uwe khu mulyaango kwe ntsu iya Isibosesi abe aama khuuwula iŋaano, nga waaluyile. Ne n'awungukhila waakona, Rekabu ni Bana baanyololokha bekhupa muntsu, bekholisa nga babaatsya khutaha iŋaano.

⁷Ne ni boola muntsu mukari, baanyoola nga Isibosesi abe alikho akona, baamuwuna lurima muunda, baamwiira. Baamukhalakho kumurwe, baatima baatsya nga baloondelela litila lya Yorudaani. Baakeenda shiilo shoosi.

⁸Ni boola i Heburoni, baayilila Dawudi kumurwe kwa Isibosesi. Kila balomela umuyiinga bari, “Aamba kumurwe kwa Isibosesi, umwaana uwa Saulo umusiku woowo, isi abe iwe waheentsa mu buulamu bwoowo bwoosi. Umukasya waakhunyalisile iwe khukhwiliyaasa khu Saulo n'umwaana weewe.”

⁹Ne Dawudi waabeelamo ari, “Mu moni tsy'Omukasya, unyalisile khuwonesatsaka buulamu bwase khukhwaama mu bihangafu,

¹⁰umusaani mutweela n'eetsa wamboolela ari Saulo waafwiile, nga ambaasa ari alikho andereera kamakhuuwa kamalayi, nga ambaasa ari abe akhila khuufuna shiwaanwa. Ise namuwaamba naamwirira i Zikulaga.

¹¹Inywe muli babaandu baabi naabi, mwaakholile ni shishiminyisakho awo. Mwerire umusaani ukhalikho ni kumusaango ta, nga mumwirira muntsu yeewe, mu bulili bweewe bubweene. Muli ni khuufuna shitaambiso khulwe shishiindu sheesi mukholile. Inabeera, muhele muwewo khu shibala.”

¹²Lwanyuma Dawudi waalakila basilikhale beewe ari, babeere. Baabakhalakho kimirwe kyaabwe ni bikele byaabwe, baabisuunga aambi ni liitibo liliili i Heburoni. Ne baayila kumurwe kwa Isibosesi, baakusiikha mu Heburoni, aambi ni ŋani iya Abuneri.