Read lumasaaba 2 Samweli 5 Bible Online

2 Samweli 5 - lumasaaba bible

2 Samweli 5

¹Lwanyuma baraangirisi be bikuuka bibiili mu Isiraeli baatsya i Heburoni isi Dawudi, kila bamulomela bari, “Bona, ifwe khuli baalebe boowo babeene.

²Amataayiko, ikhaba nga abe Saulo ali umuyiinga weefwe, ne abe iwe niye uraangirira linaambo lyeefwe nga abe litsya mu busoolo. Naluundi Umukasya akhulomela iwe ari, ‘Iwe niye ukhaabe umwaayi uwe babaandu baase, ba Isiraeli. Iwe niye ukhaabe umuwuli waabwe.’ ”

³Nashiryo nga baraangirisi ba Isiraeli boosi baatsiile i Heburoni, umuyiinga Dawudi waakhola ni nabo indakaano mu moni tsy'Omukasya. Baryo baatsukha khu murwe kwa Dawudi kamafura, baamwikesa umuyiinga uwa Isiraeli yoosi.

⁴Dawudi ekela umuyiinga uwa Isiraeli nga ali ni kye buukhulu kamakhumi kataru. Waawula khuumala imbuka iye kimiiko kamakhumi kane.

⁵Nga ali i Heburoni, aawula Yuda khuumala imbuka iye kimiiko musaafu ni shisiintsa; nga ali i Yerusalemu, waawula Isiraeli yoosi ni Yuda yoosi, khuumala imbuka iye kimiiko kamakhumi kataru.

⁶Nga imbuka yaabirirewo, umuyiinga Dawudi waraangirira liiye lyeewe, baatsya khukhwibwakala ba Yebusi, abe babaamenya mu Yerusalemu. Ba Yebusi nga bambaasa bari abe mbaawo Dawudi ni liiye lyeewe isi banyala baabirira khukhwingila mu shiriimba ta. Kila bamulomela bari, “Singane wingile muno ta! Abe khwaakhalemala namwe khwaakhafwa tsiimoni, kane khukhutimise utsye.”

⁷Ne shitweela busa, Dawudi wawaamba shiriimba Sayuuni abe shishiilikho litikiiyi. Lwanyuma baashilaanga bari shiriimba sha Dawudi.

⁸Lweesi baatsya khuwaambila shiriimba isho Dawudi waaloma ari, “Uyo yeesi ukana khukhwiira ba Yebusi, ali ni khuniinila mu mwanda kwe kameetsi, nio ebwakale baaleme ni baabofu abo, beesi kumwoyo kwase kukhakanakho na khari ta.” Ni nashiryo, kila babaandu baloma bari, “Baabofu ni baaleme sibalifukiilisibwa khukhwiingila mu ntsu ta.”

⁹Dawudi waamenya mu shiriimba shino, waashilaanga ari Shiriimba sha Dawudi. Wombakha shiriimba webotookhelesa, nga arakikhila i Milo, weela mukari.

¹⁰Umukasya Wele uwe kamahe waaba nga ali khu luwaande lwa Dawudi. Nashiryo Dawudi weloosela khuuba uwe kamaani naluundi uwe angaaki naabi.

¹¹Lwanyuma Hiramu, umuyiinga uwa Tuulo, waasiindikha baarume isi Dawudi. Mwabamo baboombashi, ni babaabeetsa kamabaale, ni kimisaala kedali, khukhwoombakhela Dawudi lubili.

¹²Abweene awo, Dawudi waamanya ari abe Umukasya waamwikesile niye khuuba umuyiinga uwa Isiraeli. Naluundi ari Umukasya waamwikesile niye khuuba umuwuli uwe kamaani, khulwe babaandu beewe.

¹³Lwanyuma Dawudi waawuuya i Heburoni, waatsya waamenya i Yerusalemu. Nga ali mu Yerusalemu, waayila bakhasi babaandi, nga khulikho ni b'ebulafu. Nashiryo Dawudi wasaala babaana baakali.

¹⁴Babaana beesi Dawudi aasaala nga ali i Yerusalemu nibo bano: Shanuwa, Shobabu, Nasani, Solomoni,

¹⁵Ibihari, Elishuwa, Nefegi, Yafiya,

¹⁶Elishama, Eliyada, ni Elifeleti.

¹⁷Ba Filisitiya ni baawulila bari Dawudi wekelile umuyiinga uwa Isiraeli yoosi, benyukha baatsya khuumuweentsa nga bakana bamuwaambe. Ne Dawudi ni aafumbula shino, wenyukha weekha mu Yerusalemu, shiriimba abe shishiili mu kumako.

¹⁸Ba Filisitiya abe beetsile bebuusile mu Litila lye Refayimu.

¹⁹Kila ereeba isi Umukasya ari, “Intsye nibwakale ba Filisitiya? Kane iwe umbe ise kamaani ke khubafuura mu busoolo?” Umukasya waamwilamo ari, “Tsya ubebwakale, kane ise ikhuwe kamaani ke khubafuura nibo mu busoolo.”

²⁰Dawudi waabebwakala waabafuura. Kila aloma ari, “Imboone nga Umukasya n'afuuntsakilila baasiku baase, nga luluutsi lulusalasala ni lufuuntsakilila bibiindu.” Nashiryo Dawudi waatwiikha shiifwo ari, “Umukasya afuuntsakilila.”

²¹Dawudi ni liiye lyeewe baasuta ba wele beesi ba Filisitiya baabuumba busa, khulwekhuuba abe baabebiliile mu busoolo.

²²Kumuluundi kukuundi, ba Filisitiya baakobola luundi nga bakana khuusoolana, bebuusila mu Litila lye Refayimu.

²³Dawudi wereeba khu Mukasya, kila Umukasya amulomela ari, “Ukhabebwakala nga ubamakho ibweeni ta. Akhali baamile inyuma, khu luwaande lululoleleele kimisaala kimi balasamu.

²⁴Ni kane uwulile likono mu masaafu ke kimisaala liliili nga lye basilikhale ni bakhuumba, bebwakale mu khaangu. Likono ilyo kane limanyise liri ise naakhwinyooyile iwe ibweeni, khuusoolanisa liiye lye ba Filisitiya.”

²⁵Dawudi waakhola nga Umukasya n'amulakila, waafuura ba Filisitiya mu busoolo. Waabatimisa khukhwaama i Geba, khuutsya khukhwoolela ilala i Gezeri.