Read lumasaaba 2 Samweli 6 Bible Online

2 Samweli 6 - lumasaaba bible

2 Samweli 6

¹Dawudi waabusaasa luundi basilikhale babaafuura buulayi mu Isiraeli, baboolisa kimikaanda kitaru (30,000).

²Waabaraangirira khuutsya i Bala (lisina liliindi bari Kiriyasi Yeyarimu), abe shishiili mu Yuda, ari batsye basute Isanduuku iye Indakaano ya Wele, Umukasya uwe kamahe, uwikhala khu bakeruubi, bakiyile mu Yerusalemu.

³Baakira khu shikaari shishaakha, baarakho tsiwuunwa khuukhweesa, baakirusa muntsu iya Abinadabu, abe ili khu khakiingi. Uza ni Ahiyo, babaana ba Abinadabu abe nibo babaali khuuwusa tsiwuunwa itsyo.

⁴Ahiyo abe ali ibweeni we shikaari isho, nga isaanduuku imwaamakho inyuma.

⁵Aabawo babaandu abe babaali khukhwiimba kimyeenya, nga bakhupilakho kamatuungu, biyilili, ni bibyuuma bibiindi, nga bye khuusakayisa, ni bye khuukhoonyaka busa. Dawudi ni babaandu boosi abe bali baasangaafu nga beemba, nga bashina, nga baamaliilekho kamaani kaabwe koosi.

⁶Ne ni boola mu shifwo mweesi Nakoni awuulila biilyo bibulungule, tsiwuunwa tsyetiingwaasa. Kila Uza ayila kumukhono khuutikiya Isanduuku iye Indakaano.

⁷Umukasya Wele waakhalalila Uza naabi khulwe khuukhola shino. Wele waamwirira ni abweene awo, khulwe khuutiila kumukhono khu Sanduku iye Indakaano.

⁸Dawudi waakhalalila Wele khulwe khukhwiira Uza. Kila Dawudi atwiikha shiifwo isho ari, “Perezi Uza”[2], ni khukhwoolesa lwe shaleelo.

⁹Kila Dawudi arya naabi Umukasya, nga ereeba ari, “Kane ikhole ndyeena nio imbile Isanduuku y'Omukasya mu Yerusalemu?”

¹⁰Nashiryo waakhalawo khuulekha khukiyila mu shiriimba sha Dawudi ta. Ne akhali waakirusa khu ntsila, waakiyila muntsu ya Obedi Edomu, abe uwama i Gasi.

¹¹Isaanduuku y'Omukasya yaamenya muntsu ya Obedi Edomu khuumala kimyeesi kitaru. Umukasya waawa Obedi Edomu ni be muntsu yeewe tsikhabi.

¹²Dawudi waakelawo waawulila bari Umukasya waaweele be ntsu iya Obedi Edomu tsiikhabi, khulwe saanduuku. Kila Dawudi atsya muntsu ya Obedi Edomu khuusuta isanduuku khuukiyila mu Yerusalemu, nga alikho ekhoya naabi.

¹³Abo abe babaasutile Isanduuku ni baakyeenda bikyele bisesaba, Dawudi waawaanayo isaayilo iye yeeyi ikhomefu n'imasoti nayo indayi inyene.

¹⁴Dawudi waashina ni kamaani meene, mu moni tsy'Omukasya. Dawudi aashina nga abe weboyile shikwaaro shishaamila mu shikuute, sheekha aasi.

¹⁵Nashiryo Dawudi ni ba Isiraeli boosi, baaroongisa Isanduuku y'Omukasya, nga beembela angaaki, naluundi nga bafuura tsikhoombi.

¹⁶Isanduuku y'Omukasya ni yaba nga yingila mu shiriimba, Mikali umukhaana uwa Saulo aaba nga weemikhile mwidirisa waaloleleele. Kila abona Umuyiinga Dawudi nga alikho asuna busa, nga ashinila Umukasya. Mikali waalekelesa naabi abe sheesi Dawudi alikho akhola.

¹⁷Kila bayila Isanduuku y'Omukasya, baakira mu shifwo shayo, mu lisari abe isi Dawudi akikholeele. Dawudi wesaaya Umukasya, nga awaanayo isi Umukasya tsisaayilo tsye bibyookhebwa ni bibireera lukoosi.

¹⁸Dawudi n'amala khuuwaanayo tsisaayilo tsino, waawa babaandu tsiikhabi mu lisina ly'Omukasya uwe kamahe.

¹⁹Isi babaandu boosi babaabawo, Dawudi waawa buli mutweela shisiintsa she kumukaati, n'inyama, ni khuubamekelakho kimizabibu. Lwanyuma buli mutweela weelayo ingo weewe.

²⁰Dawudi weelayo khuuloombela be muungo mweewe tsikhabi khukhwaama isi Umukasya. Ne Mikali umukhaana uwa Saulo waarura antsye waatsya isi Dawudi, waamulomela ari, “Shiina kila ukhalilewo khukhwibirisa uryo shaleelo, nga wihanyaka busa? Unyala uryeena wakeenda nga uli bukhuna shisiintsa, waashinila mu moni tsye babaandu ba busheele ni bakhaana baraambi?”

²¹Kila Dawudi amwiilamo ari, “Ise abe ndi khuushinila Umukasya, uwambukula ise waantsikesa umuwuli we ba Isiraeli. S'arobora paapa woowo, namwe umuundu ukuundi yeesi khukhwaama mu shikuuka shishiindi ta.

²²Kane ise ikhwookesanisile ilala ndi ise indi uwe angaaki! Kane niyise aasi naabi. Ne bakhaana baraambi beesi ulikho ulomakho abo, kane beeloosela khukhuuntsisamo ise shiriifwa.”

²³Mikali, umukhaana uwa Saulo, aafwa busa nga s'aalikho n'umwaana ta.