Read lumasaaba 2 Samweli 8 Bible Online

2 Samweli 8 - lumasaaba bible

2 Samweli 8

¹Lwanyuma lwa bino, Dawudi webwakala ba Filisitiya, waabafuura buubi naabi mu busoolo. Wawaamba shiriimba Mesegayama, khukhwaama khu buwuli bwaabwe.

²Dawudi weloosela waafuura ba Mowabu nabo mu busoolo, kila alakila basilikhale baabwe khukhwiyalisa aasi, waabapima nga araambisa kumukosi. Abe uri apimakho buuleeyi bwe kumukosi khabili, abo waabeera; ne abe uli apimakho kumukosi lutweela, abo waabalekha khuuba baalamu. Be mu Mowabu baafukiilisa Dawudi khuuba umuyiinga waabwe, naluundi baaba nga bamuwa kumusolo.

³Lutweela Dawudi waaba nga ali khuutsya khu Luutsi Efurati, khukhwiikha buyiinga bweewe bushaakha ibweene iyo. Nga ali khu lukyeendo ulwo, waawula umuyiinga Zoba, uwa Rehobu. Lisiina ly'omuyiinga uyo liliindi abe bari Hadadezeri.

⁴Mu busoolo ubwo, Dawudi waamunuulakho basilikhale babaakeendela khu ŋwaaŋwa kumukaanda mutweela ni bikana musaafu (17,000), ni babaakeendela busa khu bikele kimikaanda kibili (20,000). Wawaamba kamakaali ke mu busoolo koosi, kakaaramire waakoonakisa, akhali kakaarama nga shitoondo shitweela (100) konyene.

⁵Liiye khukhwaama mu Damasiko shishiili mu Siriya ni baatsya khuyeeta Hadadezeri, Dawudi waakhoonyamo basilikhale kimikaanda kibili (20,000).

⁶Dawudi warawo ikaambi iye basilikhale mu Damasiko; waakila babaandu be mu Siriya baaba aasi e buyiinga bweewe, nga bamuwa niye kumusolo. Buli oosi esi Dawudi atsyatsaka, abe Umukasya amuyeeta khufuura baasiku beewe mu busoolo.

⁷Dawudi wawaamba kamafumo keesi abe baakhola khukhwaama mu zaabu, keesi abe basilikhale ba Hadadezeri basuta, waakayila mu Yerusalemu.

⁸Naluundi waasuta buroonzi umukali busa khukhwaama mu biriimba abe bibiili bya Hadadezeri. Bino byaba Beta ni Berosayi.

⁹Umuyiinga Toyi uwa Hamasi ni aawulila bari Dawudi waafuurire Hadadezeri ni liiye lyeewe lyoosi mu busoolo,

¹⁰waarumana umwaana weewe Yoramu khuutsya khumusheesa ni khuumuruuya. Khulwekhuuba abe Toyi umweene tsifuunda tsingali asoolana mu busoolo, ne abe Hadadezeri amufuura niye mu busoolo bweene. Yoramu waayilila Dawudi biwaanwa nga mulimo izaabu, ifweeza, ni buroonzi.

¹¹Bino Dawudi waabiwaanayo isi Umukasya, musaambo niyo ndweela nga n'awaanayo ifweeza n'izaabu byeesi aawaamba khukhwaama mu

¹²Edomu, Mowabu, Amoni, Filisitiya, Amaleki, ni khukhwaama khu Hadadezeri umwaana uwa Rehobu, abe uuli umuyiinga wa Zoba.

¹³Dawudi waamanyikhana naabi. Nga ali khu lukyeendo akobolayo ingo, waakhoonyela ba Edomu kumukaanda mutweela ni bikana shinaane (18,000), mu Litila lye Kumuunyu.

¹⁴Dawudi waara tsikaambi tsye basilikhale mu Edomu, ni babaandu baamwo baafukiilisa khuuba aasi e buyiinga bweewe. Buli oosi isi Dawudi aatsyatsaka, abe Umukasya amuyeeta khuufuura mu busoolo.

¹⁵Nashiryo Dawudi waaba umuyiinga wa Isiraeli yoosi; nga mu buwuli bweewe abirisa babaandu boosi buulayi.

¹⁶Yowabu umwaana uwa Zeruya, abe niye umuraangirisi we kamahe; Yehoshafati, umwaana uwa Ahiludi, nga niye umubiikhi we bibiitsya bikholikha mu buyiinga.

¹⁷Zadoki, umwaana wa Ahitubu, ni Ahimeleki, umwaana wa Abiyasaari, abe bali basaayi. Seraya abe ali umuroni.

¹⁸Benaya, umwaana wa Yehoyada, abe niye umuraangirisi we liiye liliinda umuyiinga, lililaangibwa liri lye ba Keresi ni ba Pelesi. Babaana ba Dawudi abe bali basaayi.