Read lumasaaba 2 Samweli 9 Bible Online

2 Samweli 9 - lumasaaba bible

2 Samweli 9

¹Shifukhu shitweela Dawudi waareeba ari, “Manya ikhabayo ikhaba umuundu mutweela, khu be lisaaye lya Saulo, uwaramawo, ise imukholele biilayi khu lwa Yonasani?”

²Ari, abe iliwo mutweela khu baraambi ba Dawudi, nga bamulaanga bari Ziba. Dawudi waalakila ari balaange Ziba uyo, eetse isi ali. Nga weetsile, kila Dawudi amureeba ari, “Iwe niye isi balaanga bari Ziba?” Welamo ari, “Uwe lukoosi, niye ise.”

³Umuyiinga waamureeba ari, “Iliyo umuundu yeesi uwe muunda iya Saulo ushiiliwo umulamu? Abe nga aliwo, ise ingana imukholele bibiindu biilayi.” Ziba weelamo ari, “Iliyo umwaana uwa Yonasani mutweela; ne waalemala bikele.”

⁴Umuyiinga waareeba ari, “Ali waheena?” Ziba waamuboolela ari, “Amenya ni Makiri, umwaana uwa Amiyeli, mu shiifwo shilaangibwa shiri Lodebari.”

⁵Umuyiinga Dawudi waarumanisa babaandu khuutsya i Lodebari, muungo mwa Makiri, umwaana uwa Amiyeli, khuureera Mefibosesi.

⁶Kila Mefibosesi umwaana uwa Yonasani, nga ali umwitsukhulu uwa Saulo waayilibwa isi Dawudi. Nga wolile isi Dawudi, wenamisa kumurwe kweewe aasi, nga esamo umuyiinga shiriifwa. Dawudi waamureeba ari, “Iwe niye Mefibosesi?” Naye welamo ari, “Niye ise, Umuyiinga.”

⁷Kila Dawudi amulomela ari, “Ukhaba ni khukhwiyembelela khwoosi ta. Khulwekhubeela indi khuutsya khukhukholela iwe bibiindu biilayi, khulwa paapa woowo Yonasani. Kane ikhukobosele liswa lyoosi lilyaba lya kuuka woowo Saulo. Naluundi, kane busheele khulyatsake ni nase khu shikabilo shitweela she biilyo.”

⁸Kila Mefibosesi enamisa luundi kumurwe nga esamo umuyiinga lukoosi. Kila alomela umuyiinga ari, “Ne ise niye naanu ne untsinaanekho? Ise ndi busa nga imbwa iyamala khaale khuufwa.”

⁹Lwanyuma umuyiinga waalaanga Ziba, uwabakho umwakaanisi uwa Saulo, kila amulomela ari, “Khukhwaama Mefibosesi n'aali umwitsukhulu uwa Saulo, kane ise imukoboseleyo buli shitweela shishaba sha Saulo ni lisaaye lyeewe.

¹⁰Ari, iwe ni babaana boowo likhumi na baraano, ni baraambi boowo kamakhumi kabili, mukhaamuraambire niye. Mukhaamulimile biilyo, naluundi mumukesele, nio be intsu iya Saulo ni baraambi beewe babe ni biilyo. Ne Mefibosesi, umwitsukhulu uwa Saulo, kane alyaatsake khu shikabilo shitweela she biilyo, ni nase.”

¹¹Kila Ziba alomela umuyiinga ari, “Uwe lukoosi, kane ise ikhole ibyo byoosi byeesi iwe unomele ise khuukhola.” Nashiryo, Mefibosesi waaliilatsakila bilyo atweela n'umuyiinga Dawudi, waaba busa nga mutweela khu baana b'omuyiinga.

¹²Mefibosesi aaba n'umwaana umusoleeli isi balaanga bari Mika. Abo boosi abe babaamenya muntsu iya Ziba, beekela baraambi ba Mefibosesi.

¹³Nashiryo, Mefibosesi waamenya mu Yerusalemu. Ikhaba nga abe waalemala bikele byoombi, ne nga abe aliila biilyo atweela n'umuyiinga.