Read lumasaaba 1 Bayiinga 10 Bible Online

1 Bayiinga 10 - lumasaaba bible

1 Bayiinga 10

¹Nabakyelama we Sheba n'awulila khu biwaamba khu lubuyi lwa Solomoni, aryo weetsa i Yerusalemu khuumukhakilisa nga amureeba bireebo birafu.

²Nabakyelama yuno eetsa i Yerusalemu nga ali ni baakali khu baakhulu beewe, nga waasutiile khu sikilya bibiindu bye lisuno biikali nga bibiwunya buulayi, zaabu ingali naabi, ni kamabaale ke buukusi bwe angaaki. Nga n'olayo waakanana ni Solomoni, baakanikhanamwo bibiindu biikali naabi byeesi aaba waamuwulilakho.

³Solomoni aryo weelamwo bireebo byoosi byeesi nabakyelama aamureeba, nga mbaawo na shitweela khu nibyo shishamukhaasa khusontsoola ta.

⁴Nabakyelama we Sheba yuno n'abona Solomoni nga n'ali uwe kamakhula kamakali naabi, ni ntsu isi ombekha nga nifwaana,

⁵waarama nga waasamiliile busa. Naluundi waarama nga weyaangile naabi lwe biilyo byeesi baareera khu meetsa tseewe, ni saambo isi baakhulu be mu lubili lweewe bekhalamwo, ni saambo iye bikwaaro byaabwe, ni saambo isi babaakaanisi beewe nabo baakwaaramwo, ni khuutubakho tsisaayilo tseesi baaba nga booshela mu Liisaayilo Liikhulu ly'Omukasya.

⁶Lwanyuma kila alomela umuyiinga ari, “Ibyo byoosi byeesi nawulila nga ndi mu shibala shase, bibiwaamba khu biilayi byeesi wakhola, ni bibiwaamba khu makhula koowo kamakali, bili byaŋali.

⁷Ne bibiindu bino abe sinabifukiilisa ta, khukhwoolesa samweene ni neetsile, naabibona ni tsimoni tsase. Mu ŋali mu bweene, abe naawulilakho bikyeekhe biri. Kamakhula koowo, ni khuutsowatsowana khwoowo byeesi imboone, bifuurira aleeyi naabi ibyo byeesi abe nawulilakho.

⁸Nga bali ni kumwikhoyo babaandu bano boosi! Nga bali ni kumwikhoyo naabi baakhulu boowo bano, babeemikha iburaangisi woowo buli busheele, nga bawulila bye kamakhula koowo!

⁹Aruuyibwe naabi Umukasya Wele woowo! Bona waakhuwa iwe ikhabi khukhwikhala khu shitsoloŋo nga umuyiinga wa Isiraeli. Aryo lwekhuuba Umukasya akana naabi Isiraeli ni khuukana khukhuukhakama ta, waakhukhola iwe khuuba umuyiinga nio unyalise khuubawula mu bwaŋali ni bukwalaafu.”

¹⁰Lwanyuma nabakyelama we Sheba waawa Solomoni tsikilo tsa zaabu khuutuuma mu bikana bine (4,000), ni khuutubakho ni kamabaale ke buukusi bwe angaaki, atweela ni bibiwunya buulayi. Mbaawo umuundu ukuundi uwareerakho luundi bibiindu bye buukusi bwe angaaki, nga byeesi nabakyelama we Sheba aareerera Solomoni ta.

¹¹(Ne tsimeeri tsa Hiramu tsareera i zaabu khukhwaama i Ofiri, tsaareera ni bikyeenga biikali bye kimisaala, ni khuutubakho kamabaale ke buukusi bwe angaaki.

¹²Umuyiinga waraambisa bikyeenga bino khuuba tsinguulilo tse Liisaayilo Liikhulu ly'Omukasya, ni lubili lweewe. Waaraambisa bikyeenga bino ni khukhwoombekha tsiindingiti ni tsindoongo bye babeembi be kimyeenya. Mbaawo bikyeenga bibiindi bibyareerebwakho luundi, namwe khuubonekhakho luundi, bibifwaanakho nga bino ta, paka khukhwoolesa ni shaleelo shino.)

¹³Umuyiinga Solomoni waakabila nabakyelama we Sheba biwaano biikali byoosi byeesi aakana, ibyo byoosi byeesi aaloomba, ni khuutubakho ni bibiindi byeesi aamuwa mu bunyala bweewe nga umuyiinga Solomoni. Lwanyuma lwa bino byoosi, nabakyelama yuno atweela ni babaakaanisi beewe, welayo mu linaambo lyeewe.

¹⁴Mu buli mwiiko Solomoni aafunatsaka zaabu tsitsoola tsikilo Kimyeeka kibili ni bikana bitaru (23,000).

¹⁵Khu bino byoosi nga waakhurakho byeesi aafunatsaka khukhwaama khu basuubusi ni babaakulaana babaabirira mu shibala sheewe ta, ni bibiindi khukhwaama khu bayiinga be Buwarabu, ni khukhwaama khu ba gafana be shibala.

¹⁶Umuyiinga Solomoni waakhola tsingabo bitoondo bibili (200) khukhwaama mu zaabu, nga mu buli ngabo araambisa aambi zaabu tsikilo musaafu.

¹⁷Naluundi waakholayo tsingabo tsitsiindi tsinjeekhe bitoondo bitaru (300), natso khukhwaama mu zaabu, nga mu buli ndweela aaraambisa aambi zaabu tsikilo tsibili. Umuyiinga waabiikha tsingabo tsino mu lubili lweewe lweesi bombekha nga baraambisa bisaala khukhwaama mu shisaali she Lebanooni.

¹⁸Lwanyuma ndi umuyiinga waakholayo shitsoloŋo shiboofu shisheene, khukhwaama mu masaanga ke ntsofu, waashimiliisa khu ngaaki ni zaabu inyene.

¹⁹Shitsoloŋo isho shabakho biniinilo bisesaba, nga mu mukoongo mwasho mukhwibotokhelele. Nga khu buli luwaande lwe shitsoloŋo, khulikho isi kamakhono kekhala, ni bifwaananyi bye talanyi byaayimikha khu buli luwaande lwe shitsoloŋo.

²⁰Waakholayo bifwaananyi bye talanyi biindi likhumi na bibili, nga buli shitweela shiimikha shaalolelanila ni shishiindi khu buli lidaala litweela khu biniinilo. Mbaawo na shitweela khu bitsoloŋo bibiindi mu shibala shoosi, shishakholekha nga shishifwaanakho nisho ta.

²¹Ni bikhopo by'omuyiinga Solomoni bye khuunyweelamo byoosi, byakholebwa khukhwaama mu zaabu, ni khuutubakho ni bibiindu bibiindi bye khuuraambisa mu lubili lweewe. Bino sibyakholebwa khukhwaama mu feetsa ta, lwekhuuba, ifeetsa yaba siilimo kumukaso naabi mu biseela bya Solomoni ta.

²²Shaba shiryo lwekhuuba umuyiinga aaba ali ni tsimeeri tse Tarushishi ngali naabi khu nyaantsa, tsitsatsyatsaka khukhola bye buukusi, nga tsitubaanila atweela ni tsimeeri tsa Hiramu. Mu buli miiko kitaru, tsimeeri tsino tsakobolatsaka nga baatsitsusilemo izaabu, feetsa, kamasaanga ke tsintsofu, atweela ni tsikhobe, kamasilikhe ni binywiinywi byeesi balaanga bari pikooko.

²³Aryo umuyiinga Solomoni wekyela ufuura mu bye buyiindifu ni mu makhula, khuuminyisa bayiinga boosi be mu shibala shoosi.

²⁴Babaandu be mu buli linaambo lyoosi khu shibala beetsaatsaka isi Solomoni khuumukyeniyila, ni khuuwulilatsaka bye kamakhula keesi Wele aamuwa.

²⁵Abe buli mwiiko kukuubira, babaandu bano boosi beetsa khuumukyeniya nga bamureerera biwaanwa bye feetsa, ni zaabu, ni bikwaaro, ni bye busoolo, ni bibiindu bibiwunya buulayi, ni tsiŋwaaŋwa, ni tsinyuumbu.

²⁶Solomoni ebuusanisila atweela kamakaali ni tsiŋwaaŋwa; atweela byoosi aaba ni kamakaali shikana shitweela ni bitoondo bine (1,400), ni tsiŋwaaŋwa kumukaanda mutweela ni bikana bibili (12,000), tseesi aara mu biriimba bibiindi, ni mu shiriimba Yerusalemu isi umuyiinga aba.

²⁷Umuyiinga aakhola ifeetsa yaaba mu bukali, yekyela busa nga kamabaale mu Yerusalemu, naluundi wekyelisa kimisaala kya sida kyaaba mu bukali, kyaafwaana busa nga kimisaala kimisukamooli kye Shepuhela.

²⁸Tsiŋwaaŋwa tseesi Solomoni aasuubulatsaka baatsamisatsaka mu Misiri ni mu Kuwe, baasuubusi b'omuyiinga baatsifunatsaka khukhwaama i Kuwe khu beeyi indayikho.

²⁹Khu mbuka iyo, likaari lilyareerebwa khukhwaama i Misiri, abe balikula khu bisiintsa bitoondo bisesaba (600) bye feetsa, ni khuukula iŋwaaŋwa khu bisiintsa bye feetsa shitoondo shitweela ni kamakhumi karaano (150). Bino byoosi abe lwanyuma beelayo baabikulisa isi bayiinga be ba Hiiti, ni bayiinga be ba Aramu.