Read lumasaaba 1 Bayiinga 11 Bible Online

1 Bayiinga 11 - lumasaaba bible

1 Bayiinga 11

¹Khu mbuka yino, umuyiinga Solomoni aakana bakhasi baakali, khukhwaama mu manaambo kamakali. Khuutuba khu mukhaana wa Faraawo, niye aayila bakhasi babaandi khukhwaama mu Mowaabu, ni mu Amoni, ni mu Edomu, ni mu Sidoni, ni khukhwaama mu ba Hiti.

²Kano kaaba kamanaambo keesi Umukasya aalakila babaandu ba Isiraeli khuulekha khuyilamo bakhasi, namwe kamanaambo kano khuubayilamo ta. Lwekhuuba bakhasi bano abe banyala baabashuusa kimyoyo kyaabwe khukhwisaaya ba wele babaandi. Ne Solomoni niye waabewaambakho naabi nga abakana.

³Aryo waaba ni baakyelama bitoondo musaafu (700), nibo babaaba bakhaana be bayiinga, waatubakho ni bakhasi be bulafu bitoondo bitaru (300). Baryo bakhasi bano boosi baamushuusa kumwoyo kweewe khuurura khu Mukasya.

⁴Aryo Solomoni n'ahangala mu miiko, bakhasi bano baashuusa kumwoyo kweewe khukhwiila khukhwisaaya ba wele babaandi, mu shifwo she khukhwisaaya Umukasya Wele weewe mutweela yenyene, nga paapa weewe Dawudi n'akholatsaka.

⁵Solomoni waarakikha khukhwisaaya Ashitoresi, nga niye wele umukhasi uwe Sidoni, ni Milukomu,[10] wele we mbikho uwe ba Amoni.

⁶Musaambo iyo, Solomoni waakhola bye bubwoonaki mu moni ts'Omukasya, waalekha khwiwaanilayo ilala khuuloondelela Umukasya, nga paapa weewe Dawudi n'akholatsaka ta.

⁷Lwanyuma Solomoni wombekha shiifwo she khukhwisaayilakho khu lukiingi lulwaba ibwaamanyaanga wa Yerusalemu, khukhwisaaya Kyemoshi, wele we mbikho uwe ba Mowabu, ni Moleki, wele we mbikho uwe ba Amoni.

⁸Solomoni wombekhela bakhasi beewe babaandi babaaramile nabo, biifwo bibiindi bye khukhwisaaya nga boosha bubaane isi ba wele baabwe.

⁹Aryo Umukasya waakhalala naabi khu lwa Solomoni, lwekhuuba kumwoyo kweewe kwashuukha kwaarura khu Mukasya, Wele wa Isiraeli, uwaba waamubonekhela kimiluundi kibili kimibuufu.

¹⁰Umukasya aamubonekhela luundi waamurewula ni khufuurira ilala bibiwaamba khukhwiisaaya ba wele babaandi, ne Solomoni niye waalekha khuuloondelela likaambila ly'Omukasya ta.

¹¹Shikila Umukasya alomela Solomoni ari, “Khukhwaama nga iwe n'ukhaliilewo ilala khuulekha khuwaamba indakaano yase, ni khuuloondelela kamakaambila kaase, ni biilakilo byeesi nakhuwa, ari kane ikhwinuulekho buyiinga buno imbukhurusekho, imbuwe umwakaanisi woowo.

¹²Ne khulwe buulayi bwa paapa woowo Dawudi, shino singene ishikhole mu mbuka yoowo nga ushiili mulamu ta. Buyiinga buno kane imbwonuule khuuburusa khukhwaama mu bunyala bw'omusooleli woowo.

¹³Ne ndi singene imurusekho buyiinga bwoosi ta; ne kane imulekhelekho khuuwula shikuuka shitweela shonyene, khulw'omwakaanisi wase Dawudi, ni khulwe buulayi bwa Yerusalemu, shiriimba sheesi nerobolela.”

¹⁴Lwanyuma Umukasya wenyusila Solomoni umusiku nga niye Hadadi, uwaba aama muungo mwe buyiinga mu shibala sha Edomu.

¹⁵Mu miiko kikyaba kyaabira, Dawudi aatsya mu shibala sha Edomu, atweela ni Yowabu, umukhulu we liiye lyeewe, khuutsya khusiikha ba Isiraeli babaafwiila mu busoolo. Nga bali iyo, liiye lye ba Isiraeli beeraka buli muundu uwe saani yeesi mu Edomu.

¹⁶Yowabu ni liiye lyoosi lye ba Isiraeli baaramayo khuumala kimyeesi kisesaba, nga beeraka buli musaani na buli busooleli yeesi.

¹⁷Ne Hadadi uwaba nga ashiili musooleli mu mbuka iyo, atweela ni baalala khu bakaanisi ba paapa weewe, baatitukhawo.

¹⁸Baryo baatitukha khukhwaama i Midiyani, baatsya i Parani, isi baafunila babaandu babaandi baabetubaasakho. Khukhwaama awo baatsya i Misiri, baatabula wa Faraawo, uwabawa intsu ye khuukonamwo, waabawa biilyo, waabawa ni liiswa.

¹⁹Hadadi waakanibwa naabi ni Faraawo, woola ni khuumufukiilila khuukhwa yaayawe w'omukhasi weewe nabakyelama Tapenesi.

²⁰Hadadi ni yaayawe wa Tapenesi yuno, basaala umwaana umusiinde, baamutwiikha lisiina bari Genubati. Umwaana yuno Genubati waaba muungo mwa Faraawo, waatsowela atweela ni babaana ba Faraawo babeene.

²¹Nga Hadadi ali iyo mu Misiri, waawulila bari Dawudi atweela ni Yowabu, umukhulu we liiye lyeewe baafwa, waatsya waalomela Faraawo ari, “Ikhuloomba ufukiilise nileyo mu shibala shase.”

²²Faraawo naye waamureeba ari, “Lwashiina? Manya iliwo shishiindu shoosi sheesi utaamba nga uli ano ni nase, shikila uloma uri ukana khukhwiilayo mu shibala she weenywe?” Hadadi weelamo ari, “Mbaawo ta. Ne ngana busa ufukiilise khukhwiilayo.”

²³Wele ndi wenyusila Solomoni umusiku ukuundi, Rezoni umusooleli wa Eliyada, uwatitukha khukhwaama khu mukhulu weewe Hadadezeri, umuyiinga wa Zoba.

²⁴Rezoni yuno ebuusanisila babaandu banabumiinyi, niye wekyela umukhulu waabwe. Lwanyuma lwa Dawudi khuuwula kamaye ka Hadadezeri, Rezoni yuno ni babaandu beewe, baatitukha baatsya bamenya i Damasiko, baamwikyelisa niye umuyiinga wayo.

²⁵Niye aba umusiku wa Isiraeli mu biifukhu bya Solomoni byoosi, nga abasoolanisa, nga Hadadi naye n'akhola. Rezoni nga ali umuwuli wa Siriya, abiiyila naabi Isiraeli.

²⁶Yerobowamu umusooleli wa Nebati, uwaba mutweela khu bakaanisi ba Solomoni naye waamushuukhakho. Yuno aaba aama mu shiriimba Zereda, mu shikuuka sha Efurayimu. Paapa weewe Nebati aaba waafwa, ne maayi weewe Zeruwa, aaba namulekhwa ne nga aaba ashiiliwo mulamu.

²⁷Yino niyo ilomo iyakila naye weyawukha khu muyiinga. Solomoni aaba nga alikho ombekha i Millo, khu luwaande lwe bwaamanyaanga wa Yerusalemu, ni khuufuunikha kumwaanya kukwaba mu litikiiyi lye shiriimba sha paapa weewe Dawudi.

²⁸Yerobowamu aaba umusaani ukhola kimilimo buulayi naabi. Solomoni n'amubona aryo, waamwikyelisa niye khuuba nga ukhulila kimilimo kyoosi kye ntsu ya Yusufu.[11]

²⁹Shifukhu shitweela, Yerobowamu n'aba nga ali khuurura khukhwaama mu Yerusalemu, umuŋoosi Ahija uwaama i Shilo waamwakaanana khu ntsila. Ahija aaba waakwaarire shikwaaro shishaakha, naluundi nga boombi bali iyo mwirome.

³⁰Ahija waabukula shikwaaro sheewe shishaakha tsana sheesi aaba nga waakwaarire, waashonuulakamo bisiintsa likhumi na bibili.

³¹Lwanyuma waalomela Yerobowamu ari, “Yiibukulila bisiintsa bino likhumi, lwekhuuba Umukasya Wele ali khuuloma ari, ‘Ndi aambi khukhwonuulamo buyiinga khukhwaama mu bunyala bwa Solomoni. Iwe kane ikhuwe bikuuka likhumi.

³²Ne niye kane imulekhele shikuuka shitweela khulw'omwakaanisi wase Dawudi, ni khulwe buulayi bwa Yerusalemu, shiriimba sheesi narobola khukhwaama mu Isiraeli mwoosi.

³³Lwekhuuba Solomoni waandurirekho, weelile khukhwisaaya Ashitoresi, wele umukhasi we ba Sidoni; ni Kyemoshi, wele we ba Mowabu; ni Milukomu, wele we ba Amoni. Naluundi waakhukyeenda nga aloondelela tsintsila tsase, khuukhola byeesi ise ingana ta. Niye waakhuuloondelela kamakaambila ni biilakilo byase, nga paapa weewe Dawudi n'akhola ta.’

³⁴“ ‘Ne shonyene ndi, singene imurusekho buyiinga buno bwoosi khukhwaama khu niye nga ashiili mulamu ta. Ne kane imuliinde niye awule mu mbuka yeewe yoosi, khulw'omwakaanisi wase Dawudi, isi samweene narobora, naluundi lwekhuuba niye aloondelelatsaka kamakaambila kaase, ni biilakilo byase.

³⁵Indyo lwanyuma indirusa buyiinga buno khukhwaama khu musooleli weewe, ikhuwe iwe bikuuka likhumi.

³⁶Ne umusooleli weewe kane imuwekho shikuuka shitweela shonyene. Lwa shino, umwakaanisi wase Dawudi arame nga alikho n'umwitsukhulu uli umuyiinga mu Yerusalemu, nga nisho shiriimba sheesi narobora khukhuuntsisaayilamo.

³⁷Kane ikhwikyelise iwe khuuba umuyiinga wa Isiraeli, ni nawe kane uwule oosi isi kumwoyo kukana.

³⁸Iwe siinga uba umuwolu wakholela khu byoosi byeesi ise ikhulakila, naluundi waloondelela tsintsila tsase, naluundi wakhola byoosi bibiili mu makaambila kaase ni biilakilo byase, nga umwakaanisi wase Dawudi n'akhola, indyo nase kane imbatsake ni nawe busheele. Naluundi kane ikhuwaangasile iwe mu buwuli buno, nga ni nakholela Dawudi, indyo ikhuwe Isiraeli shoosi khuuba shishoowo.

³⁹Ne lwe shishoonako sha Solomoni shino, kane imbe babetsukhulu ba Dawudi shitaambiso, ne singene shibe she biilo ni biilo ta.’ ”

⁴⁰Aryo Solomoni waahentsa isaambo iye khukhwiira Yerobowamu. Ne Yerobowamu waatitukhila w'omuyiinga Shishaka uwe Misiri, waamenya ibweene iyo khukhwoolesa Solomoni n'afwa.

⁴¹Bibiindu byoosi byeesi Solomoni aakhola mu buwuli bweewe, ni bye kamakhula keewe, byaronebwa mu Shiitabo she buraambi bwa Solomoni.

⁴²Solomoni aawulila mu Yerusalemu, nga awula Isiraeli yeesi khuumala kimiiko kamakhumi kane kimibuufu.

⁴³Lwanyuma Solomoni waafwa, baryo baamusiikha iyo mu shiriimba sha paapa weewe Dawudi. Lwanyuma lwaawo, umusooleli weewe Rehobowamu weelawo nga umuyiinga.