Read lumasaaba 1 Bayiinga 13 Bible Online

1 Bayiinga 13 - lumasaaba bible

1 Bayiinga 13

¹Shifukhu shitweela, Yerobowamu aaba nga wemikhile iburaangisi we shisheeso, nga atsya khuwaanayo bubaane, abawo mutweela khu baŋoosi ba Wele khukhwaama mu Yuda uwoola i Beseli, nga Umukasya amurumana.

²Lwe bunyala bwe Lomo ya Wele, waalookhela angaaki nga aloma ari, “O iwe shisheeso! O iwe shisheeso! Umukasya waandumile ni buurume buno: Umwaana ulaangibwa Yosiya akhaasaalikhe muungo mwa Dawudi. Akhaawaaneyo basaayi babaama mu buyu bwe khukhwisaaya, babeetsa ano khukhwoosha bubaane khu shisheeso shino, khuuba nga tsisaayilo babeene, ni kamakuumba ke babaandu kakhooshebwele khwiiwe.”

³Khu shifukhu khweene ukhwo, umuŋoosi uyo waawa khaabonelo, nga aloma ari, “Umukasya wasuubisa khukhwoolelesa shino: Shisheeso shino shikhaatikhemo khabili, ni likoshe liliishilikho litsutsukhe aasi.”

⁴Ne umuyiinga Yerobowamu n'awulila byeesi umuŋoosi wa Wele akanikha bibiwaamba khu sheeso she Beseli shino, waatsanuusa kumukhono kweewe khukhwaama khu sheeso, waaloma ari, “Nimuwaambe umusaani uyu!” Khaangukho kumukhono kweesi aatsanuusa tsana kwoomela mu shifwo sheesi kwabamo, waalekha khunyala khuukukobosa ta.

⁵Khu mbuka nyene iyo, shisheeso tsana shaatikhamo khabili, ni likoshe lilyashibakho, lyaatsutsukha aasi, nga umuŋoosi n'arewula makiboole.

⁶Umuyiinga wekoontselela umuŋoosi wa Wele nga amuloma ari, “Naakhwikoontseleele, loomba Umukasya Wele woowo, awonese kumukhono kwase kube kumulamu luundi.” Umuŋoosi waamuloombela isi Umukasya, kumukhono kweewe kwaaba kumulamu luundi.

⁷Lwanyuma umuyiinga waalomela umuŋoosi ari, “N'uwiitse mu lubili lwase, ubekho ni she khuulya. Naluundi ise kane ikhuweyo shiwaanwa.”

⁸Ne umuŋoosi waalomela umuyiinga ari, “Sinyalisa ta, abe wakhaba nga wambeele shisiintsa she bibiindu byoositsana byeesi uli nabyo. Sinyala naalya, namwe naanywakho shishiindu shoosi ano ta.

⁹Lwekhuuba Umukasya andakiile ari, ‘Ukhalyakho biilyo byoosi ta, namwe waanywakho kameetsi koosi ta, naluundi ukhakobolela mu ntsila isi utsiliilekho ta.’ ”

¹⁰Aryo wawaamba kumukhoosi kukuundi, waalekha khukobolela khu ntsila isi aatsiilakho i Beseli ta.

¹¹Khu mbuka iyo, aabawo umuŋoosi umusakhulu uwaba nga amenya mu Beseli. Mutweela khu basooleli beewe weetsa waamuboolela ibyo byoosi byeesi umuŋoosi uwaama mu Yuda aakholela i Beseli ni byeesi aaboolela umuyiinga.

¹²Kila umuŋoosi umusakhulu uyo areeba basooleli beewe tsana ari, “Atsiilile khu mukhoosi shiina?” Nabo baryo bookyesa paapa waabwe kumukhoosi kweesi umuŋoosi uwaama mu Yuda aatsiilakho.

¹³Kila abalakila ari, “Ni muŋoonaŋoonere isikilya.” Baryo nabo ni baamala khuushikhola, waakikhalakho,

¹⁴waaloonda khu muŋoosi tsana uwaama mu Yuda. Umuŋoosi umusakhulu waamunyoola niye nga wekhaale mwisina mwe kuusaala oko. Shikila amureeba ari, “Iwe niye umuŋoosi wa Wele khukhwaama mu Yuda?” Naye waamwiilamo ari, “E e, ise niye.”

¹⁵Kila umuŋoosi umukhulu amuloma ari, “Yiitsa khutsye ni nase iwase, utsye ubekho ni she khuulya.”

¹⁶Umuŋoosi uwaama mu Yuda waamwiilamo ari, “Ise sinyala naatsya ni nawe ta, naluundi sinyala naatsya naalyakho, namwe naanywakho shishiindu shoosi ta.

¹⁷Umukasya andewuure nga andakila ari ikhalyakho namwe ikhanywakho shishiindu shoosi, namwe khuukobolayo ingo nga inaambisa intsila isi neetsilekho ta.”

¹⁸Ne umuŋoosi umusakhulu waamwiilamo ari, “Ni nase ndi umuŋoosi nga nawe n'uli. Malayika w'Omukasya anganikhileyo nga anomela ari niitse ikhulome khutsye ingo wase, ikhuwekho khakhaandu khe khuulya, namwe khe khuunywa.” Ne umuŋoosi yuno khukhwaama mu Yuda s'ashimanyakho ari umuŋoosi umusakhulu uyu aba alikho amuwombesa ta.

¹⁹Kila baryo benyukha baatsya boombi, n'umuŋoosi yuno khukhwaama mu Yuda waatsya waalya biilyo luundi waanywakho ni kameetsi.

²⁰Ne ni baaba nga bali khuulya, buurume bwaama isi Umukasya, bweetsa isi umuŋoosi umusakhulu,

²¹abuboolele umuŋoosi uwaama mu Yuda ari, “Umukasya aloma ari iwe waaminyaaliile Umukasya Wele woowo. Bona iwe waakhwoolelesa byeesi Umukasya Wele woowo akhulakiile khuulekha khukhola ta.

²²Ukoboole ano waalya biilyo naluundi waanywa kameetsi ni nase, byeesi akhulakiile khuulekha khukhola ta. Ninashiryo, nga iwe wafwiile, kumulaambo kwoowo singene bakusiikhe mu ŋani ye ba paapa boowo ta.”

²³Ne lwanyuma ni baamala khuulya ni khuunywa, umuŋoosi umusakhulu waaŋoonaŋoona isikilya yeewe, waakiwa umuŋoosi uwaama mu Yuda.

²⁴Aryo umuŋoosi yuno uwaama mu Yuda waakiikhalakho, weeloosela ni lukyeendo. Ne naaba nga ali khu ntsila atsya, italanyi yaamwibwakala, yaamwiira. Kumulaambo kweewe kwaakalamilila khu ntsila, ni talanyi tsana ni sikilya byaaba nga byeemikhile aambi ni nakwo.

²⁵Babaandu babaaba nga balikho babira khu ntsila iyo, beetsa baabona kumulaambo ukwo, ni talanyi nga yeemikhile aambi ni nakwo. Baryo baatima baatsya i Beseli, shiriimba mweesi umuŋoosi umusakhulu amenyatsaka, baatsya baaboolela buli muundu yeesi isho sheesi baabona.

²⁶Aryo umuŋoosi umusakhulu uyo n'awulila bino waaloma ari, “Uyo akhiile khuuba niye umuŋoosi uwaama mu Yuda uwaminyaaliile Umukasya. Isho shaakila Umukasya waarumana italanyi yaamwiira.”

²⁷Kila umuŋoosi umusakhulu uyo aloma basooleli beewe ari, “Nimuuŋoonaŋoonele isikilya.” Baryo ni baamala khuukimuŋoonaŋoonela, waakikhalakho waatsya.

²⁸N'olayo, waanyoola kumulaambo nga kwaakalamiliile mu lukuuto, ni isikilya atweela ni talanyi nga byemikhile aambi ni nakwo. Abe italanyi yaakhulya kumulaambo ukwo ta, namwe abe yaakhwibwakala isikilya ta.

²⁹Umuŋoosi umusakhulu tsana waasuta kumulaambo ukwo, waakura khu sikilya yeewe, waakureera i Beseli, nio anyale khuukusolelakho nio akusiikhe.

³⁰Kumulaambo kuno waakusiikha mu ŋani yeewe inyene, nga alila ni kumutaambo ari, “O yaaya wandaayase!”

³¹Shikila alomela basooleli beewe ari, “Nase nga neetsile khufwa, kumulaambo kwase mukusiikha mu ŋani yino, ni kamakuumba kaase mukare aambi ni kamakuumba k'omuŋoosi wa Wele yuno.

³²Lwekhuuba ise naamanyile ndi buurume bweesi Umukasya aamuwa khukhwiitsa khuukanikha, bubuwaamba khu sheeso shishiili i Beseli, ni buurume bubuwaamba khu byeeso bibiili i Samariya, bulyoolelela.”

³³Ne abe yakhaba nga ibyo byaba biryo, Yerobowamu s'ashuukha khukhwaama mu bwoonaki bweewe ta. Niye eloosela busa khuurobora basaayi khukhwaama mu baandu ba busheele, khukhwakaanisa khu byeeso byeeyo. Abe umuundu yeesi uwakana khuuba umusaayi, baamuwa busa busaayi.

³⁴Shino sheekyela shishoonako shikhulu naabi, shaakila buyiinga bwa Yerobowamu bwaahela, atweela ni khuuhela khwe be muungo mweewe boosi khu shibala.