Read lumasaaba 1 Bayiinga 15 Bible Online

1 Bayiinga 15 - lumasaaba bible

1 Bayiinga 15

¹Abiya ekyela umuyiinga wa Yuda mu mwiiko kwe likhumi na shinaane kwe buyiinga bwa Yerobowamu nga niye umuyiinga wa Isiraeli.

²Abiya waaba nga umuyiinga mu Yerusalemu, khuumala kimiiko kitaru. Lisiina lya maayi weewe abe bari Maaka, umukhaana wa Abisalomu.

³Abiya naye waakhola bye bubwoonaki nga paapawe Rehobowamu n'akhola; waalekha khukhwiiwaanayo kumwoyo kweewe isi Umukasya Wele weewe, nga kuukawe Dawudi n'aba ta.

⁴Ne khulwe buulayi bwa kuukawe Dawudi, Umukasya Wele weewe, waawa Abiyamu umwaana khukhwikyela umuyiinga mu Yerusalemu, ni khuubona ari aliinda lukoosi.

⁵Umukasya aakhola shino lwekhuuba Dawudi aakholatsaka bibiindu bibiili biilayi bibikhoyesa Umukasya, naluundi aawulilatsaka bilakilo by'Omukasya, buulamu bweewe bwoosi, khuurusakho ilomo ya Uriya uwaba umu Hiti.

⁶Buusoolo bubwarakikha akari a Rehobowamu ni Yerobowamu bweloosela mu mbuka ya Abiya yoosi.

⁷Bibiindu bibiindi byoosi byeesi Abiya aakhola nga ali umuyiinga, byaronebwa mu Shiitabo she Bibyaamayo bye Bayiinga ba Yuda. Yabaatsakawo busoolo buukali naabi akari a Abiya ni Yerobowamu.

⁸Abiya waafwa, naye baamusiikha mu ŋani tse bayiinga mu shiriimba sha Dawudi. Lwanyuma lwayo umusooleli weewe Asa waamwiilila mu bikyele nga umuyiinga.

⁹Asa ekyela umuyiinga wa Yuda, mu mwiiko kwe kamakhumi kabili kwe buyiinga bwa Yerobowamu nga niye umuyiinga wa Isiraeli.

¹⁰Aryo Asa waawula nga umuyiinga khuumala kimiiko kamakhumi kane na mutweela mu Yerusalemu. Lisiina lya maayi weewe aba bari Maaka, umukhaana wa Abisalomu.

¹¹Asa waakholatsaka bibiindu biilayi bibikhoyesa Umukasya, nga kuukawe Dawudi n'akholatsaka.

¹²Waasalanisaka naluundi waarusilawo ilala bye basaani bamalaaya abe bye khukhwisaaya khu byeeso bibyaba mu shibala, waarusawo bifwaani byoosi byeesi bakuuka beewe baakhola.

¹³Aryo warusa ni maayi weewe Maaka, khukhwaama mu shifwo sheewe she bwa maayi wa nabakyelama, lwekhuuba abe wakhola shifwaani she mbikho sha wele umukhasi Ashera. Aryo Asa waaremaka ni kusiindi kwa wele yuno, waakwookhela mu litila lya Kiduroni.

¹⁴Ne nga s'amalilawo ilala biifwo bino bye khukhwisaayilamo ba wele babaandi bano ta. Ne akhaba nga shaba shiryo, Asa arama nga ali umwiyikinwa isi Umukasya mu mwoyo kweewe kwoosi.

¹⁵Aryo Asa wareera ifeetsa, ni bibiindu byoosi bibyakholebwa khukhwaama mu zaabu bibyaba bikhosefu, byeesi niye atweela ni paapawe baaba nga baamala khaale khukhosesa, wabira mu Lisaayilo Likhosefu.

¹⁶Umuyiinga Asa uwa Yuda atweela n'umuyiinga Baasha wa Isiraeli baaba ni busoolo akari aabwe, biifukhu byoosi byeesi baaba nga bali bayiinga.

¹⁷Umuyiinga waatsya weebwakala Yuda, wawaamba shiriimba Rama. Lwanyuma waashikyelisa shiriimba she kamaani naabi, waashisirakho lumako, khuulekha khufukiilila umuundu yeesi khukhwiinjila namwe khuurura mu Yuda ta.

¹⁸Lwanyuma umuyiinga Asa waatsya waasutaka ifeetsa atweela ni zaabu khukhwaama mu lubili lweewe ni khukhwaama mu Liisaayilo Liikhulu. Bino byoosi waabiwa babaakaanisi beewe, khuubiyilila Benihadadi, umusooleli wa Taburimoni, umwitsukhulu wa Heziyoni, uwaba umuyiinga wa Asiriya, uwaba amenya mu shiriimba Damasiko, nga amwakaanisilakho ni buurume buno ari,

¹⁹“Ise ngana khwiloosele khuuba be buusaale akari owo ni nase, nga paapa woowo ni paapa wase ni baaba. Bona ari indi khuukhwakaanisa iwe shiwaanwa she feetsa ni zaabu. Ne ikhuloomba ndi ufuniaakewo indakaano iili akari owo ni Baasha, umuyiinga wa Isiraeli, nio manya waarura khu shibala shase.”

²⁰Umuyiinga Benihadadi waafukiilisana ni sheesi umuyiinga Asa aamuloomba, shiikila arumana liiye lyeewe khuutsya khwibwakala Isiraeli. Liiye lino lyaatsya lyawaamba biriimba bya Isiraeli nga nibyo Ijoni, Dani, Abeli-Besi-Maaka, ni khuutubakho Kineresi shoosi, baatubaasakho ni shibala sha Nafutaali shoosi.

²¹Ne umuyiinga Baasha n'ashiwulilakho, waakamisilawo khukhwombekha lumako khu Rama, waashantsukha waatsya waamenya i Tiruza.

²²Lwanyuma Asa waarusa shilakilo khuutsya buli aandu oosi mu shibala sha Yuda, nga shiwaamba khu buli muundu, shiri bayeete khuusutaka kamabaale ni tsimbaawo byeesi Baasha aaraambisa khukhwoombekha khukhwaama mu Rama. Lwanyuma waaraambisa kamabaale keene kano ni tsimbaawo tseene khukhwoombekha tsimako khu shiriimba Geba she mu Benyamini, ni shiriimba sha Mizipa.

²³Ari buli shiindu shoosi sheesi Asa aakhola nga ali umuyiinga, buunyala bweewe, ni kamasiina ke biriimba byeesi ombekha, byoosi byaronebwa mu Shiitabo she Bibyaamayo bye Bayiinga ba Yuda. Mu miiko kyeewe kye buukhulu, Asa wawaambibwa ni buulwaale bwe bikhaandakilo.

²⁴Aryo Asa n'afwa, baamusiikha mu ŋani ye bakuuka beewe mu shiriimba sha Dawudi. Lwanyuma lwayo umusooleli weewe Yehoshafati wekyela umuyiinga mu shifwo sheewe.

²⁵Nadabu umusooleli wa Yerobowamu, ekyela umuyiinga wa Isiraeli, nga Asa alimalile kimiiko kibili nga ali umuyiinga wa Yuda. Aryo Nadabu yuno waaba nga awula Isiraeli khuumala kimiiko kibili.

²⁶Nadabu naye waamiinyaalila Umukasya, nga aloondelela shiibi she bubwoonaki sha paapawe Yerobowamu, naluundi waakila ba Isiraeli boosi khukhwoonaka.

²⁷Lwanyuma Baasha umusooleli wa Ahiya, khukhwaama mu shikuuka sha Isakaari, waakholela Nadabu luwomelo, waamwiirira mu mbuka isi niye ni ba Isiraeli boosi baaba nga bali khuutsya khwibwakala shiriimba sha Gibetoni shishiili mu Filisitiya.

²⁸Aryo Baasha weera Nadabu mu mwiiko kwa Asa kwe khataru nga ali umuyiinga wa Yuda. Aryo Baasha mweene weela mu bikyele bya Nadabu, nga umuyiinga wa Isiraeli.

²⁹Mu mbuka nyene khaangukho, waakhoonyaka be muungo mwa Yerobowamu boosi, nga mbaawo na mutweela isi alekhawo nga umulamu ta. Shino shaba shiryo khukhwiimikha khu lomo y'Omukasya isi aakanikha khuubirira mu muŋoosi Ahiya uwe Shilo, nga iwaamba khu Yerobowamu.

³⁰Shino shakholekha shiryo lwekhuuba Yerobowamu asyubuluusa lirima ly'Omukasya, Wele wa Isiraeli, lwe khukhwoonaka khuukali khweesi onekamwo umweene, ni lwe bibyoonako byeesi akila ba Isiraeli boosi baakhola.

³¹Bibiindu bibiramile byoosi byeesi Nadabu akhola nga ali umuyiinga, ni buraambi bweewe bubuundi, byaronebwa mu Shiitabo she Bibyaamayo bye Bayiinga ba Isiraeli.

³²Asa umuyiinga wa Yuda ni Baasha umuyiinga wa Isiraeli baasoolanatsaka mu biseela bye buwuli bwaabwe bwoosi.

³³Baasha umusooleli wa Ahiya aarakikha buuwuli bweewe mu Isiraeli mu mwiiko kwe khataru kwe buuwuli bwa Asa mu Yuda. Baasha aaba umuyiinga wa Isiraeli nga asintsiila i Tiruza khuumala kimiiko kamakhumi kabili na kine.

³⁴Baasha naye waaminyaalila Umukasya, nga aloondelela byeesi Yerobowamu aakhola. Aryo woonakisa mu moni ts'Omukasya, naluundi waakila ni Isiraeli yeesi khukhwoonaka.