Read lumasaaba 1 Bayiinga 19 Bible Online

1 Bayiinga 19 - lumasaaba bible

1 Bayiinga 19

¹Ahabu waatsya waaboolela umukyelama weewe Yezebeli, ibyo byoosi byeesi Eliya aaba nga waakholile, naluundi waamuboolela ari waakhoonyakile baŋoosi ba Bayaali boosi, nga araambisa lurima.

²Lwanyuma Yezebeli waarumanisa buurume buno isi Eliya, nga amulomela ari, “Khali ba wele nase baantsirire, siinga nga tsitsya khwoola tsinyaanga tsino kumukaamba, nga nase naakhukhukhoonya nga nawe ni wakhoonyile baŋoosi baase!”

³Aryo Eliya n'afuna buurume buno, waarya luukali lwe buulamu bweewe. Kila enyukhayo waatitukha waatsya mu shiriimba she Berisheba shishiili mu Yuda, waalekha ibweene iyo umwakaanisi weewe.

⁴Ne niye umweene waakyeenda yenyene shifukhu shibuufu, waatsya woola iyo mu mubiimbi. Ibweene iyo, waanyoolayo kuusaala kwe bibyeeyelo, wekhala mwisina mwakwo, kila aloomba ari shinyalikhana khali afwiile. Waaloma ari, “Ise naboone biikali bibimala, O Umukasya. Ikhuloomba ndi uyile buulamu bwase, lwekhuuba ise siindi buulayi khufuura abo babaafwa ta.”

⁵Lwanyuma weyalisa aasi mu shiniini she kuusaala tsana, liilo lyaamuwaamba. Khaangu kharyo, malayika weetsa waamuwaambakho nga amuloma ari, “Yinyukha ulye.”

⁶Eliya wenyukha waalolaka, waabona aambi ni kumurwe kweewe nga aliwo kumukaati kweesi bookhela khwibaale, atweela ni nyuungu iye kameetsi. Aryo wenyukha waalya, naluundi waanywa, weelawo aasi, waakona luundi.

⁷Lwanyuma ndi malayika tsana waakobola luundi kumuluundi kwe khabili, nga amuloma ari, “Yinyukha ulye, lwekhuuba lukyeendo luno lunyala lwakhubeela luukali naabi.”

⁸Eliya wenyukha waalya luundi waanywa. Biilyo bino byaamuwa kamaani kakaamunyalisisa khuukyeenda biifukhu kamakhumi kane, kumuusi ni shiilo, khuutsya khwoola khu lukiingi Horebu[13], lukiingi lwa Wele.

⁹Ibweene iyo weetsa wenjila mu lifuluma mweesi aakona shiilo sheene isho. Lwanyuma Umukasya waakanikha isi Eliya nga amureeba ari, “Eliya, iwe uli khuukhola shiina ano?”

¹⁰Eliya naye waamwiilamo ari, “Ise naayiwaanilayo ilala buulamu bwase khukhwakaanisa Umukasya Wele Umunyali wa byoosi yenyene. Ne babaandu ba Isiraeli baakhalawo baafuniaaka indakaano ni nawe. Baafuniaakaka ni bibyeeso byoowo, baakhoonyaka baŋoosi boowo boosi. Ari bona ise senyene niye uramilewo, ate nga ari balikho baweentsa nase khukhuuntsira.”

¹¹Kila Umukasya amulomela ari, “N'urure utsye, wiimikhe mu moni tsase khu lukiingi.” Eliya waatsya weemikha khu lukiingi. Lwanyuma Umukasya waamubirawo, ni mbewo iye kamaani naabi yawuutsa khu lukiingi. Imbewo yino yaba iye kamaani naabi, yaaranaka ni kamabaale. Ne ate nga Umukasya s'ali mu mbewo ingali iyo ta. Lwanyuma lwe mbewo, etsawo shiinikino she shibala, ne ate nga Umukasya s'ali mu shinikino she shibala isho ta.

¹²Lwanyuma lwe shiinikino shino, yabawo kumulilo, ne ate nga Umukasya s'ali mu mulilo ukwo ta. Ne lwanyuma lwe kumulilo yabawo khaakono khakyeekhe luundi khaawolu.

¹³Aryo Eliya n'akhawulila, wawaamba ingubo yeewe waakibowa mu moni mweewe, lwanyuma waarura waatsya weemikha mulyaango mwe lifuluma. Kila yabawo likono lilyeetsa, lyaamureeba liri, “Eliya, uli khuukhola shiina ano?”

¹⁴Eliya naye weelamwo ari, “Ise naayiwaanilayo ilala buulamu bwase khukhwakaanisa Umukasya Wele Umunyali wa byoosi yenyene. Ne babaandu ba Isiraeli baakhalawo bafuniaaka indakaano ni nawe. Baafuniaakaka ni bibyeeso byoowo, bakhoonyaka baŋoosi boowo boosi. Ari bona ise senyene niye uramilewo, ate nga ari balikho baweentsa nase khukhuuntsira.”

¹⁵Umukasya waamwiilamo ari, “Niwileyo, nga uraambisa intsila nyene isi weetsilakho, utsye woole mu mubiimbi kukuuli aambi ni Damasiko. Nga woolele mu shiriimba, robora Hazayeli umutsukhekho kamafura khuumwikyelisa umuyiinga wa Aramu[14]

¹⁶Lwanyuma ndi urobore Yehu umusooleli wa Nimushi, umutsukhekho kamafura khuumwikyelisa umuyiinga wa Isiraeli. Ne Elisa umusooleli wa Shafati khukhwaama i Abeli-Mehola, umutsukhekho kamafura khukhwiila mu shifwo shoowo nga umuŋoosi wase.

¹⁷Umuundu yeesi uliba nga waatitukhile khukhwiiribwa ni Hazayeli, aliribwa ni Yehu. Ni nooyo yeesi ukhaatitukhe khwiiribwa ni Yehu aliribwa ni Elisha.

¹⁸Ne ate indiramisawo babaandu bikana musaafu mu Isiraeli, babaakhenamisa kimirwe kyaabwe khukhwisaaya Bayaali, namwe khuukwa mu bikyele byeewe ta.”

¹⁹Eliya wenyukha waatsya, waanyoola Elisa umusooleli wa Shafati nga alikho alimisa ni tsiyeeyi tsibili mu mukuunda. Ne nga iburaangisi weewe yabayo basaani babaandi likhumi na mutweela nga buli mutweela ali khuulimisa na tsibili. Eliya waatsya waakwaarisa Elisa ikooti yeewe khu mabeka, lwanyuma waakyeenda waarurawo waatsya.

²⁰Aryo Elisa waakamisa khuulimisa, waalekha tsiyeeyi tseewe nga tsemikhile awo, waatimaka waaloonda khu Eliya, waamuloma ari, “Khayo inyoowe intsye isiibulekho paapa wase ni maayi wase, nio ingobole intsye ni nawe.” Eliya naye waamwiilamo ari, “N'utsye. Ne uli ni khuushebulila sheesi naama khukhukholakho ari.”

²¹Lwanyuma Elisa waakobola isi tsiyeeyi tseewe tsaba, waatsya waatsikhoonya, waateekha tsinyama nga araambisa kamakyooki kakaatsibakho nga tsiikhu. Lwanyuma waakabakila babaandu babaabawo tsinyama, nabo boosi baatsilya. Lwanyuma lwa byoosi, waatsya ni Eliya, wekyela umwakaanisi weewe.