Read lumasaaba 1 Bayiinga 2 Bible Online

1 Bayiinga 2 - lumasaaba bible

1 Bayiinga 2

¹Umuyiinga Dawudi nga ashiili khufwa ta, aaboolelela Solomoni mu bilomo bino:

²“Ise ndi aambi khuufwa intsye mu ntsila iye makoombe nga buli muundu yeesi ukuundi n'akhiile khuufwa. Ne ngana iwe ube umusaani umunyindaalifu luundi uwe kamaani.

³Yitsiliilisa khuuloondelela byeesi Umukasya Wele akana. Ukyeendatsakile mu mukhoosi kweewe, uwaambatsake kamakaambila keewe, ni biilakilo byeewe, ni khuukaambila khweewe atweela ni bujulisi bweewe, nga nibyo bibyaronebwa mu makaambila ka Musa. Nio nawe lwanyuma unyalisatsake khuufuna biilayi nga ukhola buli shiindu shoosi sheesi ukana, na buli aandu oosi isi utsya.

⁴Iwe n'ukane ukholatsake uryo, Umukasya kane olelese sheesi aasuubisa ise nga aloma ari, ‘Siinga babetsukhulu boowo bamenyawo nga ni baakha khuukhola, baaba baaŋali mu khunoondelela ise ni kumwoyo naluundi ni buulamu bwaabwe bwoosi, kane ibewo mutweela khu nibo ukane ekhale khu shitsoloŋo shoowo nga umuyiinga mu Isiraeli.’

⁵“Naluundi aliwo shishiindu shishiindi sheesi ukhaakha webilila ta. Iwe waamanya isaambo isi Yowabu umwaana wa Zeruya ambirisamo ise, nga ni eraka baakhulu baase be liiye babili, nga nibo Abuneri umwaana wa Neri, ni Amasa umwaana wa Jeseri. Bano aabeera nga shifwaanikhana nga nibo babaaba baasiku beewe mu busoolo, ate nga aashikhola khu mbuka isi busoolo bukhaabeelawo ta. Mu shino umweene ereerakho kumusaango lwe kamafuki kakaakhalikho ni kumusaango kwoosi ta. Nashiryo shili isi uli khubona uri umuwa shitaambiso.

⁶Shino n'ushikhole mu makyesi ke angaaki, ne ukhamulekha waafwiila mu lukoosi mu miiko kyeewe kye busaakhulu ta.

⁷“Ingana uwaambile shiisa basooleli ba Bazilayi uwe Gileyadi. Ise ngana iwe ubakhole nibo babe bakyeni be muungo mw'omuyiinga ba lubeelela, lwekhuuba baanjeeta ise naabi nga ni natitukhawo khulwa wandaayo Abisalomu.

⁸“Naluundi ushebulilatsaka Shimeyi umusooleli wa Gera, niye umusaani uwaama i Bahurimu shishiili mu Benyamini. Niye aantsuba ise luundi waakhomaka, ni naba nga ndi khuutitukha khuutsya i Mahanayimu. Nga niye ni eetsa khukhuuntsakanana ise khu luutsi Yorudaani, netsuba isi Umukasya ndi siindimwiira na khakyeekhe khoosi ta.

⁹Ne shishitsubo isho sishimukhola niye khuulekha khuba ni kumusaango ta. Iwe uli umuundu umukyesi naabi, kane umanye isaambo iye khumwiiramo afwe.”

¹⁰Lwanyuma Dawudi waafwa, baamusiikha mu shiriimba sha Dawudi.

¹¹Niye aba nga waawulila mu Isiraeli khuumala kimiiko kamakhumi kane, ne musaafu khu nikyo aawula nga ali i Heburoni, ni kataru na kitaru aawula nga ali i Yerusalemu.

¹²Aryo Solomoni weela mu bikyele bya paapawe Dawudi nga umuyiinga, wareera buyiinga bweewe bwoosi aasi e bunyala bweewe.

¹³Yabawo shifukhu shitweela Adoniya umwaana wa Hagisi weetsa khuubona Basisheba, maayi wa Solomoni. Kila Basisheba amureeba ari, “Khukhwiitsa khuno khuli khwe lukoosi?” Adoniya waamwiilamo ari, “E e.”

¹⁴Ne waalooselakho ari, “Niitsile busa nga ngana khuukanikhakho is'uli.” Basisheba naye waamwiilamo ari, “Mbaawo buubi ta. N'ushikanikhe.”

¹⁵Kila Adoniya weelamo ari, “Nga n'umanyile, buyiinga buno abe bwaba bubwase; nga buli muundu yeesi mu Isiraeli andoleelela ise khuuba umuyiinga. Ne bibiindu ni byashuukhakho, buyiinga buno bwaatsya wa wandaayase, lwekhuuba iyo niyo isaambo isi Umukasya aashikanamwo.

¹⁶Ne ari ise ndiyo busa ni ilomo ndweela yonyene isi ingana khukhuloomba iwe. Ikhwikoontselela, ukhekaana ta.” Basisheba waamwiilamo ari, “Shiina sheesi ukana?”

¹⁷Adoniya naye weelamo ari, “Ikhuloomba utsye ukanikhe isi Solomoni, afukiilise ise khuuyila Abishaga uwe Shunemu khuuba umukhasi wase. Ise naamanyile niye singene akhwikaanile iwe ta.”

¹⁸Basisheba naye weelamo ari, “Shilayi. Kane intsye imukhuloombele.”

¹⁹Aryo Basisheba waatsya isi umuyiinga Solomoni khuumukanikhayo khulwa Adoniya. Umuyiinga n'amubonakho wenyukha khu shitsoloŋo sheewe khuumwakaanila, weenamisa kumurwe kweewe khuumuwa lukoosi. Lwanyuma weelayo wekhala khu shitsoloŋo sheewe, waalakila ari bareerereyo maayi weewe shitsoloŋo shishiindi, nio anyale khukhwikhala aambi ni naye khu mukhono kweewe kumulayi.

²⁰Lwanyuma kila Basisheba amuloma ari, “Indiyo ni shishiindu shikyeekhe shiri sheesi ingana khuukhuloomba. Niyikina ndi iwe s'ukane wikaane ta.” Solomoni weelamo ari, “Maayi, n'umboolele khubone, ni nase singene nikaane ta.”

²¹Kila Basisheba elamo ari, “Fukiilisa wandaayo Adoniya, ayile Abishaga umukhaana uwe Shunemu khuuba umukhasi weewe.”

²²Solomoni naye weelamo maayi weewe ari, “Iwe unyala uryeena waanoomba ise khuufukiilila Adoniya khuuyila Abishaga umukhaana we Shunemu? Manya unyala waanoomba ise uri imuwe ni buyiinga buno bwoosi. Iwe waashimanya buulayi bubweene uri niye ali wandaayase umukhulu, ni khu lubeka lweewe ali n'umusaayi Abiyasaari, ni Yowabu umwaana wa Zeruya.”

²³Kila umuyiinga Solomoni etsubila mu moni ts'Omukasya nga aloma ari, “Khali Wele antsirire ise, siinga Adoniya alekha khwiiribwa lwa shino sheesi aloombile!

²⁴Umukasya umweene waayiŋaŋasa ise, luundi waayintsikhasa khu shitsoloŋo she buyiinga sha paapa wase Dawudi. Niye waayindeerawo ise buyiinga buno nga umweene n'asuubisa. Ni nashiryo mu ŋali mubweene, Adoniya aakha khuufwa khu shifukhu she shaleelo shino.”

²⁵Shikila umuyiinga Solomoni awa biilakilo isi Benaya umwaana wa Yehoyada khuutsya khumwiira. Aryo khu mbuka iyo, Adoniya weeribwa.

²⁶Lwanyuma umuyiinga Solomoni waalomela umusaayi Abiyasaari ari, “N'ukoboleyo ingo woowo i Anasosi. Abe waakhila khuufwa, ne singene ikhwiire aluno ari ta, lwekhuuba iwe niye uwasutatsaka isanduuku iye kamakaambila y'Omukasya nga paapa wase niye umuyiinga, naluundi mwabonabonela atweela mweembi mu mbuka iyo iyaba imangafu.”

²⁷Aryo Solomoni waawoona Abiyasaari khukhwaama mu bwakaanisi bwe busaayi isi Umukasya. Aryo waaba nga wolelesile sheesi Umukasya aalomela i Shilo bibiwaamba khu baandu be mu ntsu y'omusaayi Eli.

²⁸Kamakhuuwa kano koolela Yowabu. (Abe yakhaba nga Yowabu yuno s'aba khu lubeka lwa Abisalomu ta, ne aayeeta naabi Adoniya.) Yowabu wekhuuna tsiindimo, waatsya mu lisari likhosefu ly'Omukasya, waatsya wehaamba khu tsiintsika tse khu sheeso.

²⁹Solomoni n'ashiwulila ari Yowabu waatimile waatsiile mu lisari ly'Omukasya khu sheeso, waarumana Benaya umwaana wa Yehoyada khuutsya amwiirire abweene awo.

³⁰Aryo Benaya waatsya mu lisari ly'Omukasya, waalomela Yowabu ari, “Umuyiinga waalakiile ari urure ano.” Yowabu naye weelamo ari, “Siinarura ta. Ne nga ifwiila ano.” Benaya weelayo waatsya waaboolela umuyiinga sheesi Yowabu aaloma.

³¹Umuyiinga Solomoni weelamo ari, “N'utsye ukhole sheesi akhulomeele. N'utsye umwiirire a sheeso eene awo, lwanyuma umusiikhe. Uryo kane ube nga waandusilekho kumusaango ni khu paapa wase ni be muungo mweewe, lwe kamafuki ke babaandu babaakhalikho kumusaango beesi niye aakhoonyaka.

³²Umukasya umweene kane awe Yowabu shitaambiso, lwe khukhwiira basaani babili babaaba baalayi khufuurisa niye umweene. Paapa wase s'ewaambila mu khufwa khw'omukhulu we liiye lya Isiraeli Abuneri umwaana wa Neri, ni Amasa umwaana wa Jeferi uwaba umukhulu we liiye lya Yuda ta.

³³Shiryo shitaambiso khulwe khuufwa khwe babaandu bano khali khubeele khu Yowabu, ni khu be muungo mweewe biilo ni biilo. Ne Umukasya kane awatsake paapa wase Dawudi, ni be muungo mweewe babekhala khu shitsoloŋo sheewe lukoosi.”

³⁴Aryo Benaya waatsya mu Lisari ly'Omukasya, waakhoonya Yowabu. Baasuta kumulaambo kweewe, baakuyila baakusiikha muungo mweewe iyo mu mubiimbi.

³⁵Lwanyuma umuyiinga waarobola Benaya khuuba umukhulu we liiye, khukhwiila mu shifwo sha Yowabu, naluundi waarobola Zadoki khuuba umusaayi khukhwiila mu shifwo sha Abiyasaari.

³⁶Luundi ndi umuyiinga Solomoni waarumanisa Shimeyi khukhwiitsa is'ali, waamulomela ari, “Yiyombekhela intsu ano mu Yerusalemu, umenyatsake mu bweenemwo. Ni mu buli shiindu shoosi sheesi ukhola, ukhakhakakho khurura mu shiriimba shino ta.

³⁷Lwekhuuba khu shifukhu khweesi ulikhakakho khuurura mu shiriimba shino, waakhalisa litila Kidironi, uliiribwa. Ukwo kuliba musaango kwoowo.”

³⁸Shimeyi naye weelamo umuyiinga ari, “Sheesi uli khuuloma shili shilayi. Ni nase kane ikhole nga niwaama khuundakila.” Ni khukhwaamila abweenewo, Shimeyi waamenyatsaka mu Yerusalemu imbuka ndeeyi.

³⁹Ne lwanyuma lwe khuubirawo kimiiko kitaru, babili khu baakulwa ba Shimeyi baamutitukhakho, baatsya w'omuyiinga Akishi uwe Gaasi. Ne Shimeyi n'ashifumbula ari bali iyo,

⁴⁰wekhala khu sikilya yeewe, waatsya i Gaasi khuutsya khubaweentsa. Ne n'abanyoola waakobola ni nabo i Yerusalemu.

⁴¹Ne ndi yabawo umuundu uwatsya waaboolela Solomoni ari, Shimeyi atsyakho i Gaasi ne waamala waakobola.

⁴²Isho shaakila Solomoni waarumanisa Shimeyi khukhwiitsa is'ali, waamuloma ari, “Ise sinakhulayisa ano mu lisiina ly'Omukasya, khuulekha khururakho ano mu Yerusalemu ta? Nakhureewula ndi lweesi uliruriramo, uliiribwa. Iwe siwafukiilisana ni nase uri isho shili shilayi, naluundi uri kane ushikhole uryo?

⁴³Ne ari ndi lwashiina wafuniaakile shishitsubo shoowo isi Umukasya, naluundi waaminyaalila byeesi ise nakhulomela?”

⁴⁴Umuyiinga waalomela luundi Shimeyi ari, “Iwe ushebulila mu mwoyo kwoowo bibiindu biibi byoosi, byeesi wakhola khu paapa wase umuyiinga Dawudi. Ni aluno ari, Umukasya atsya khuukhuwa shitaambiso khulweebyo byoosi byeesi wakhola.

⁴⁵Ne khali Umukasya ambeele ise tsikhabi, ni buyiinga bwa paapa wase khali abuwaangasile biilo ni biilo.”

⁴⁶Kila lwanyuma umuyiinga alakila Benaya umwaana wa Yehoyada khuuyila Shimeyi atsye amwiire. Aryo Benaya waamuyila waamwiira. Aryo Solomoni waaba nga ari niye uuli ni bunyala bwoosi mu buyiinga bweewe.