Read lumasaaba 1 Bayiinga 20 Bible Online

1 Bayiinga 20 - lumasaaba bible

1 Bayiinga 20

¹Umuyiinga Benihadadi uwa Aramu waabuusanisa liiye lyeewe atweela, nga ayeetebwakho ni bayiinga babaandi kamakhumi kataru na babili, nga bali ni kamakaali atweela ni tsiŋwaaŋwa tsaabwe. Baryo boosi baatsya bebuulila Samariya, baarakikha khuushibwakala.

²Benihadadi yuno waarumanisa baarume khukhwiinjila mu shiriimba isi umuyiinga Ahabu wa Isiraeli, nga baloma bari, “Umuyiinga Benihadadi akhulakila ari,

³izaabu ni feetsa yoowo byoosi bili bibyase; ni khuutubakho bakhasi boowo babafuura buulayi atweela ni babaana boowo boosi!”

⁴Ahabu naye weelamwo ari, “Isho shili nisho shisheene, umukoosi wase. Ilala ise samweene, ni neebyo byoosi byeesi indi nabyo, bili bibyoowo!”

⁵Lwanyuma ndi Benihadadi tsana waarumanisa luundi baarume khuutsya baboolele Ahabu bari, “Ise naamalile khaale khuukhulakila ndi umbe ise ifeetsa yoowo, ni zaabu, ni bakhasi boowo, atweela ni babaana boowo beene.

⁶Ni nashiryo, kumukaamba khu nyaanga nga tsino, babaakaanisi baase bakheetse bapikisane mu lubili lwoowo, ni mu tsintsu tse babaakaanisi boowo. Nga beetsile bakhaasute buli shiindu shoosi sheesi bakhaabone bari shili she lisuno.”

⁷Lwanyuma umuyiinga Ahabu waalaanga baaraangilisi be mu shibala sha Isiraeli boosi, waabalomela ari, “Mwaaboone umusaani Benihadadi uyu nga n'ali khukhuumeentsakho buusiku! Lwekhuuba aarumanisa ano ari ise imuwe bakhasi baase, ni babaana baase beene, ni khuutubakho ifeetsa yase atweela ni zaabu nyene, ni nase naalekha khumwiimana.”

⁸Kila baaraangilisi bano ni babaandu boosi bamwiilamo bari, “Ukhawuliilisa namwe waakholakho na shitweela khu byeesi ali khuuloma ta.”

⁹Kila Ahabu naye elamo babaakaanisi ba Benihadadi ari, “Tsya muboolele umukoosi wase umuyiinga muri: kane imuwe ibyo byeesi aanyoowa khuundakila makiboole, ne sheesi aama khulooselakho shino, naalobile, sinanyalisa khuushikhola ta!” Baryo babaakaanisi beelayo baatsya baaboolela Benihadadi byeesi Ahabu aaloma.

¹⁰Benihadadi waarumanisa luundi isi Ahabu nga aloma ari, “Khayo ba wele bandeerere buwaangafu, ate ni khumiinyisakho awo, siinga nga ise ndekha khwoonakisa shiriimba shoowo isho she Samariya. Singene iramewo abe yakhaba na khakyeekhe khari kheesi buli mutweela khu baselikhale baase anyala waasutila ni mu shikalabo sheewe ta.”

¹¹Kila umuyiinga wa Isiraeli elamwo ari, “Umusoolani uuli khuukwaara busa nga erekekhela busoolo, s'akhiile khukhwibuyila nga umusoolani umalile khuuwula busoolo ta.”

¹²Buurume buno bwoola wa Benihadadi khu mbuka isi aabeela nga ali khuunyweela atweela ni bayiinga babaandi mu masari kaabwe. Kila alomela baselikhale beewe ari, “Buli mutweela ni emikhe mu shifwo sheewe khukhwibwakala Samariya. Baryo boosi beŋoonaŋoona.”

¹³Lwanyuma yaabawo umuŋoosi uweetsa isi Ahabu waamuboolela byeesi Umukasya aamulomela ari, “Unyala waaba uli khuubona nga baselikhale ba Benihadadi bano nga bali be kamaani naabi! Ne shaleelo shino, indi khuutsya khubawaanayo mu bunyala bwoowo. Ni abweenewo nio nawe umanye uri Umukasya niye uwe kamaani.”

¹⁴Kila Ahabu areeba ari, “Ne naanu uli khuutsya khusoolana mu busoolo ubwo?” Umuŋoosi waamwiilamo ari, “Baliindi be baawuli be bisiintsa nibo babaakane basoolane.” Ahabu waareeba luundi ari, “Ne naanu utsya khunyoowa khukhwiibwakala?” Umuŋoosi weelamwo ari, “Iweewe niye utsya khunyoowa.”

¹⁵Lwanyuma Ahabu waabuusa atweela baaliindi be baawuli be bisiintsa bano, boosi boola bitoondo bibili ni kamakhumi kataru na babili (232). Indi luundi waalooselakho liiye lyeewe lye ba Isiraeli lyoosi, lilyoola buukali bwe baselikhale bikana musaafu (7,000).

¹⁶Tsinyaanga tsoola tsisesaba tse mwihangilwe, nga Benihadadi ni bayiinga babaandi abo kamakhumi kataru na babili abo nga bashiinywa bameelameela mu masari kaabwe.

¹⁷Baselikhale baaliindi be baawuli be bisiintsa nibo babaanyoowa khukhuumba khukhwaama mu shiriimba Samariya. Ne ni baaba nga bali aambi khukhwoola, babaandu beesi Benihadadi aaba nga walomeele baliinde, beelayo baamuboolela bari, “Khwaaboone liiye likhuumba khukhwaama mu Samariya.”

¹⁸Kila Benihadadi abeelamwo ari, “Ni mutsye mubawaambe boosi nga baalamu. Ise sininaanayo, oba beetsile khuukana khureerawo lukoosi, namwe khuusoolana ta.”

¹⁹Ne khu mbuka yino, baaliindi be baawuli be bisiintsa baaba nga baaraangiile khuutsya mu busoolo, ni liiye lya Isiraeli liliramile lyoosi nga lyaloondilekho.

²⁰Buli mutweela khu baselikhale ba Isiraeli waatsya weerakho umusiku mutweela. Baryo baselikhale ba Aramu babaaramilewo bakwamo isuundakilisi, baatitukha. Ba Isiraeli baaboongakho nga babatimisa. Ne Benihadadi umuyiinga wa Aramu umweene wekaama khu ŋwaaŋwa yeewe waatitukhawo, ni babaandi be khu ŋwaaŋwa baamuloondakho.

²¹Aryo umuyiinga wa Isiraeli naye atweela ni baselikhale beewe baaboongakho, baatsya bawaambaka tsiŋwaaŋwa tse ba Aramu atweela ni kamakaali kaabwe. Babaandu ba Aramu beeribwa mu bukali naabi.

²²Lwanyumakho ndi umuŋoosi weetsa isi umuyiinga Ahabu, waamuloma ari, “Ari n'uwileyo, ushebulile bino byeesi waama khukhola, ne wirekekhe buulayi wilemo kamaani, lwekhuuba kumwiiko kukwiitsa, umuyiinga wa Aramu akhaakobole khukhwibwakala luundi.”

²³Nga byaabeele biryo, babaakaanisi b'omuyiinga Benihadadi uwa Aramu beetsa isi ali baamuboolela bari, “Ba wele be ba Isiraeli bali ba wele be mu ngoongo. Isho nisho shishakila baakhuwula ifwe. Ne ari siinga khwiilayo khwaabasoolanisila khu musaleela busa, khunyala khwaabawula buulayi naabi.

²⁴Ne shonyene ndi waakha khuukhola uri, rusawo bayiinga abo kamakhumi kataru na babili, wisewo baakhulu be kamaye mu bifwo byaabwe.

²⁵Lwanyuma laangayo liiye liliili liikali nga lilekhaana ni neelyo lilyakhururakho. Funayo tsiŋwaaŋwa tsiindi, kamakaali kakaandi, nio khutsye khubasoolanisile khu musaleela. Nga khwaakholile shino, ilala khunyala khwaabawula.” Aryo umuyiinga Benihadadi waafukiilisa kamakyesi iko keesi baamuwa.

²⁶Imbuka ni yoola iye khuusoolana, Benihadadi waalaanga atweela liiye lyeewe lye ba Aramu, waakhuumba waatsya i Afeki khuusoolana ni ba Isiraeli.

²⁷Ba Isiraeli nabo baaba nga berekekheele busoolo, nga bali na buli shiindu. Nabo baryo baakhuumba, baatsya khukhwakaanana ni liiye lye ba Aramu. Ne liiye lye ba Isiraeli lyaabonekha busa nga lituuli lye tsimbusi likyeekhe liri, ne ba Aramu nibo baaba nga bamalataane shibala shoosi.

²⁸Lwanyuma kila umuŋoosi atsya isi Ahabu, waamulomela byeesi Umukasya aamuboolela ari, “Ba Aramu bano bambaasa bari Umukasya ali wele we mu ngoongo, ne akhuba uwe mu matila ta. Nashiryo uli khuutsya khuuwula liiye lyaabwe lino lye kamaani. Lwanyuma nio nawe ni babaandu bano boosi mumanye muri Umukasya ali ni bunyala.”

²⁹Kamaye koombi kebuusila buli litweela shanjelekha we lyashe, khuumala biifukhu musaafu bibuufu. Ne khu shifukhu she kumusaafu busoolo bwaabalukhawo. Baryo ba Isiraeli baakhoonyaka baselikhale be ba Aramu baboola kumweeka mutweela (100,000) kumubuufu mu shifukhu shitweela shonyene.

³⁰Baselikhale ba Aramu babaaramakho baatikhula tsiindimo, baatsya beebisa mu shiriimba Afeki, ne ndi kuutikiiyi kwe shiriimba sheene kwaabakonela, kweerakho kimikaanda kibili ni bikana musaafu (27,000) khu nibo. Benihadadi umweene naye waatikhula tsiindimo waatsya weebisa mu khaseenge khe mukari khe mu shiriimba sheene Afeki.

³¹Babaakaanisi beewe baamutsyayo baamuloma bari, “Musakhulu, ifwe khwaawulila bari bayiinga ba Isiraeli bali be shiisa shikali naabi. Nashiryo ifwe khakhwiwunamile, khutsye isi umuyiinga wa Isiraeli, nga khwakwaarire tsisawu tsa makoongwe, naluundi nga khwebowele ni kimikosi khu mirwe kyeefwe. Manya winyoola umuyiinga Ahabu kane akhulekhe iwe ubewo mulamu.”

³²Baryo baakwaara tsisawu tsa makoongwe, bebowa kimikosi khu mirwe kyaabwe, baatsya isi umuyiinga wa Isiraeli, baamwikoontselela bari, “Umwakaanisi woowo Benihadadi akhuloomba ari umulekhe abewo mulamu.” Kila umuyiinga wa Isiraeli elamwo ari, “Niye ashiiliwo mulamu? Benihadadi ali nga waandaayase.”

³³Babaakaanisi ba Benihadadi bano baaba nga baaliindiliile khaalomo khaalayi kheesi Ahabu analoma, kila beelakamwo khaangu bari, “E, e, wandaayo Benihadadi!” Ahabu waabeelamwo ari, “Nimutsye mumureere.” Benihadadi n'olawo, Ahabu waamulaanga ari atsye aniine ekhale ni naye mu likaari lyeewe.

³⁴Kila Benihadadi waalomela Ahabu ari, “Ise kane ikhukobosele biriimba byoosi byeesi paapa wase aanuula khukhwaama khu paapa woowo, nio manya nawe waabikyelisa nga biriimba bye khuukulaanilamo mu shisiintsa she Damasiko, nga paapa wase naye n'akhola mu Samariya.” Ahabu naye weelamwo ari, “Ise kane ikhulekhuule utsye khulwe lomo iyo.” Baryo baakhola indakaano ye buusaale, lwanyuma waalekhuula Benihadadi waatsya.

³⁵Nga bili biryo, Umukasya waalakila mutweela khu baŋoosi alomele uwasheewe ari, “Ikhuloomba iwe ukhupe ise.” Ne uwasheewe uyo wekaana khuumukhupa.

³⁶Kila umuŋoosi amulomela ari, “Lwekhuuba iwe waalobile khuukhola sheesi Umukasya akhulakiile khuukhola, nga niwaama ano uri, italanyi itsya khukhwiira.” Aryo nga n'arurawo ari atsya, italanyi yaamusunakho yaamwiira.

³⁷Umuŋoosi tsana waatsya waalomela umuundu ukuundi ari, “Ikhuloomba iwe ukhupe ise.” Aryo umusaani yuno waamukhupa, waamurakho likuma liikali.

³⁸Aryo umuŋoosi tsana yuno waarurawo waatsya, waaliindila umuyiinga khu ndulo khwe lukuuto, nga webowile shilaka khu murwe kweewe, nga s'akana umuyiinga waamumanya ta.

³⁹Ne umuyiinga Ahabu n'aba nga abirawo, umuŋoosi tsana walaangilila ari, “Musakhulu, ise nabeele nga ndi mu busoolo, umuselikhale mutweela wandereera umubowe mutweela, waandakila ari imuliinde buulayi. Ne waanomela ari ne siinga umubowe yuno atitukhawo waatsya, ise imba nga niriibwa namwe ta, isasule bisiintsa bikana bitaru bye ifeetsa.

⁴⁰Ne nga ni nabeele nga niyukaasa iyi ni neeyi, umubowe tsana waatitukhawo waatsya.” Kila umuyiinga Ahabu amulomela ari, “Ari ikwo kuli musaango kwoowo. Uli ni khuuweebwa shitaambiso nga niwaama khuloma.”

⁴¹Lubaluba, umuŋoosi tsana waarusakho shilaka khu murwe kweewe, umuyiinga wa Isiraeli waamumanya nga niye mutweela khu baŋoosi.

⁴²Kila umuŋoosi yuno alomela Ahabu sheesi Umukasya aamulomela ari, “Umukasya aakhulakila iwe khuukhoonya umuundu abe uwakhila khuukhoonyebwa, ne iwe waamulekha waatsya. Ni nashiryo, ari iwe wamweene uli ni khuufwa mu shifwo sheewe, ni babaandu boowo bali ni khuufwa mu shifwo she babaandu beewe.”

⁴³Lwanyuma lweebyo umuyiinga wa Isiraeli weelayo ingo weewe mu Samariya, nga kumutaambo kwaamuwaambile naluundi nga waawetsekheleele naabi.