Read lumasaaba 1 Bayiinga 3 Bible Online

1 Bayiinga 3 - lumasaaba bible

1 Bayiinga 3

¹Solomoni waakhola indakaano iye khuukholakana ni Faraawo wa Misiri, nga ayila umukhaana weewe nga umukhasi. Waamureera khuumenya ni naye mu shiriimba sha Dawudi, khukhwoolesa nga n'amaliilisa khukhwoombekha lubili lweewe, Liisaayilo Liikhulu atweela ni lumako lwe kuseenge khukhwibotokhelela Yerusalemu.

²Khu mbuka iyo, babaandu ba Isiraeli baaba nga bawaanayo tsisaayilo tsaabwe khu byeeso bya busheele busa, lwekhuuba Liisaayilo Liikhulu ly'Omukasya lyaba nga lishiili khukhwombekhebwa ta.

³Solomoni okesanisa naabi khuukana khweewe khuukali isi Umukasya, nga aloondelela bilakilo bya paapawe Dawudi byoosi. Ne khuurusakho ndi, naye umweene aawaanatsakayo tsisaayilo nga naye atsisalila khu byeeso ibyo bya busheele bibikhali bitweela ta.

⁴Ne shisheeso shishafuura buukhulu shabatsaka i Gibiyoni, isho shaakila umuyiinga waatsya ibweene iyo khuwaanayo tsisaayilo tsintsoshe shikana shitweela.

⁵Mu shilo sheene isho i Gibiyoni, Umukasya waabonekhela Solomoni mu marooro, Wele waamureeba ari, “Loomba shoosi sheesi ukana ise ikhukholele iwe, ni nase kane ishikhuwe.”

⁶Solomoni naye weelamo ari, “Iwe wokyesanisa shiisa shikali naabi isi paapa wase Dawudi, lwekhuuba niye aaba umwiyikinwa, umwitsiliilisi luundi umwakaanisi uwaŋali is'uli. Naluundi weeloosela uryo khumwookyesanisa niye khuukana khuukali khuukhawawo ta, nga umuwa umusooleli uwiilawo khuuba umuyiinga mu shifwo sheewe.

⁷O Umukasya Wele, bona ari iwe waakholile ise khukhwiila mu bikyele bya paapa wase khuuwula nga umuyiinga, abe yakhaba nga ise ishiili umwaana mukyeekhe, ukhamanyile khuuwula buulayi ta.

⁸Bona ari ise ndi ano akari mu baandu boowo; lili linaambo likhulu naabi lililiimo babaandu babaakhabalikha taawe!

⁹Ari n'umbe ise kumwoyo kwe kamakhula, nio inyale khuuwula babaandu boowo bano mu bwaŋali, ni khuumanya khukhwaawulawo shiilayi ni shiibi. Lwekhuuba akhali isho, ise kane inyale ndyeena khuuwula babaandu boowo babaali baakhulu naabi bano?”

¹⁰Shino sheesi Solomoni aaloomba she kamakhula shekhoyesa naabi Umukasya.

¹¹Shiikila Wele elamo ari, “Lwekhuuba iwe uloombile kamakhula nio unyale khuuwula babaandu baase buulayi, mu shifwo she khukhwiloombela buulamu buuleeyi, namwe buyiindifu, namwe khuuhela khwe baasiku boowo ta;

¹²Ise ari kane ikhuwe sheesi uloombile. Ilala kane ikhuwe kamakhula ni khuumanya, nga mbaawo umuundu na mutweela uwabatsakakho nako, namwe siilibawo umuundu ukuundi yeesi, uulibakho nako lwanyuma lwoowo ta!

¹³Ise kane ikhuwe ni neebyo byeesi ukhaloombile ta, nga nibyo: buyiindifu ni shiriifwa, ilekhe khubawo umuyiinga ukuundi yeesi ukane afwaananekho ni nawe ta.

¹⁴Naluundi siinga uwuliilisa luundi waaloondelela kamakaambila kaase ni biilakilo byase, nga paapawo Dawudi n'akhola, kane ikhuwe buulamu buleeyi.”

¹⁵Lwanyuma Solomoni waasisimukha mwiilo, waashimanya ari Umukasya aakanikha ni naye mu marooro. Aryo waakobolayo i Yerusalemu, waatsya weemikha iburaangisi we Isanduuku iye kamakaambila y'Omukasya, waawayo tsisaayilo tsintsoshe, ni tsisaayilo tse lukoosi isi Umukasya. Lwanyuma waakabulila bakyeni beewe balaange boosi kamayiiya kamaboofu.

¹⁶Yabawo shifukhu shitweela, bamalaaya bakhasi babili beetsa isi umuyiinga nga bakana abakaye tsikhaando tsaabwe.

¹⁷Mutweela khu nibo waaloma ari, “O Umuyiinga, umukhasi yuno amenya ni nase mu ntsu ndweela. Ise nasaala umwaana wase umusiinde nga niye atweela ni nase khuli mu ntsu mweene.

¹⁸Lwanyuma lwe biifukhu bitaru nga uwase wasaalikhile, naye wasaala uweewe. Ne mu ntsu khulimo babaandu babili fwenyene, mbaawo umuundu ukuundi yeesi ta.

¹⁹Mu shilo, umwaana weewe afwiile lwekhuuba aamukoneele waamuminaka.

²⁰Lwanyuma weetsa mu shilo mweene, waabukula uwase khukhwaama mu mbafu mwase nga naakonile. Aryo waareera uweewe umufu waamura mu mbafu mwase, waayila uwase uuli umulamu.

²¹Ne antsye ni bwasheele, khuukhakakho ndi inuunisa umwaana, nenyoola nga ali umufu. Ne naamuloleelesa buulayi bweene kumutikhinyi, naabona nga umwaana uyo s'ali uwase naakhakyeekhe khoosi ta.”

²²Shikila umukhasi ukuundi uyo waamwiinyukhilamo nga aloma ari, “Umwaana umulamu niye uwase, ne umufu niye uwoowo.” Uyo naye weelamo ari, “Taawe! Umufu niye uwoowo, ne umulamu niye uwase.” Baryo baaba nga bakhaandisana naabi iburaangisi w'omuyiinga.

²³Lwanyuma umuyiinga Solomoni waaloma ari, “Inywe mweembi buli mutweela ali khuuloma ari umwaana umulamu niye uweewe, ne umufu buli mutweela ali khuuloma ari ali uwo washe.”

²⁴Kila umuyiinga arumanisa ari, “Ni mundereere lurima.” Baryo baareera lurima isi umuyiinga.

²⁵Lwanyuma waalakila ari, “Khalamo umwaana umulamu yuno, ameemo bisiintsa bibili, buli mutweela khu bakhasi bano mumuwekho shisiintsa shitweela!”

²⁶Kila umukhasi uwaba maayi uw'omwaana umweene, nga wetsuule khuukana lw'omwaana mu mwoyo kweewe, waaloma ari, “Taawe, paapa umuyiinga! Mukheera umwaana yuno ta! Ni mumuwe umukhasi uyo nga mulamu.” Ne umukhasi uwashe uyo waaloma ari, “Nisho shisheene, umwaana uyo mukhamuwakho mutweela khusiifwe ta, ni mumukhalemo bisiintsa bibili, mukhukabananise.”

²⁷Kila Solomoni aloma ari, “Ukheera umwaana uyo ta. Muwe umukhasi unyooyile, lwekhuuba niye ali maayi w'omwaana umweene.”

²⁸Babaandu ba Isiraeli boosi ni baawulila khu khuukhalawo khwa Solomoni khuno, baamuwa shiriifwa shikali naabi, lwekhuuba khukhwaamila abweene awo, baamanya bari Wele niye uwamuwa kamakhula khuukaya misaango mu bwaŋali.