Read lumasaaba 1 Bayiinga 9 Bible Online

1 Bayiinga 9 - lumasaaba bible

1 Bayiinga 9

¹Aryo Solomoni waamaliilisa khukhwombekha Liisaayilo Liikhulu ly'Omukasya, waamaliilisa ni lubili lweewe lwe khuukonamwo. Waamaliilisaka byoosi byeesi areengekhareengekha khukhwoombekha.

²Lwanyuma ndi Umukasya waamubonekhela kumuluundi kwe khabili, nga n'amubonekhela makiboole i Gibiyoni.

³Umukasya waamulomela ari, “Ise naawuliile khuuloomba atweela ni khukhwilootsa khwoowo, khweesi ureerire isiindi. Ise naakhosesele intsu yino isi wombekhele, ni nase mu bweene muno nimwo mweesi kane baantsisaayatsakile. Intsu yino ili iyase, ni nase kane ingilolelatsakile biifukhu byoosi.

⁴Ne isi iwe, siinga uwuliilisa byeesi inoma nga paapawo Dawudi n'akholatsaka, ni kumwoyo kwaŋali luundi kumuwolu, ukholatsake byoosi byeesi kamakaambila ni biilakilo byase byeesi biloma,

⁵ni nase kane nolelese bibitsubo byase byeesi nalomela paapawo Dawudi, ndi ilibawo umuundu khukhwaama muungo mweewe, uliba umuyiinga wa Isiraeli biilo ni biilo.

⁶Ne siinga iwe uminyaalila ise, namwe babaana boowo babaalikhusikhila iwe, siinga nabo baminyaala, baalekha khuwuliilisa kamakaambila kaase ni biilakilo byase byeesi indikhuukhuwa iwe, luundi baatsya baakaanisa ba wele babaandi, babesaaya,

⁷nase ndyo singene ifukiilise babaandu baase ba Isiraeli khuumenya mu shibala shino sheesi nabawa ta. Naluundi kane naantsukhe Lisaayilo lino likhosefu isi nalomakho ndi kane bantsisaayatsakilemo. Indyo kane nikyelise linaambo lya Isiraeli khuuba nga she khukhwilolakho busa luundi babe buukhomo isi kamanaambo kakaandi.

⁸Abe yakhaba nga Lisaayilo lino likhulu libonekha nga lye kamaani naabi liryo, kane liikyele busa nga she khukhwiyaanga isi abo babaabirawo, nga bereeba bari, ‘Lwashiina Umukasya aakhola shishiindu shiibi shishifwaana shiri khu baandu beewe ni khu Lisaayilo lyeewe likhulu?’

⁹Ne babaandu babeene baliilamo bari, ‘Shino shaba shiri lwekhuuba babaandu baarura khu Mukasya Wele waabwe, uwarusa bakuuka baabwe khukhwaama mu shibala she Misiri, beela khukhwisaaya ba wele babaandi, shaakila Umukasya waabareerakho buukosi buno.’ ”

¹⁰Khukhwombekha Lisaayilo likhulu atweela ni lubili, byayilila Solomoni kimiiko kamakhumi kabili.

¹¹Lwanyuma Solomoni waabukula biriimba kamakhumi kabili bye mu shisiintsa she Galilaaya, waabiwa Hiramu, umuyiinga we Tuulo, nga amusasula lwe tsimbaawo tse kimisaala sida ni sayipuraasi, ni zaabu byeesi aaraambisa.

¹²Ne Hiramu n'etsa khukhwaama i Tuulo khuubona khu biriimba byeesi Solomoni aamuwa, biriimba bino byaalekha khumusangaasa ta.

¹³Kila alomela Solomoni ari, “Wandaayase, biriimba shiina bino byeesi umbeele?” Kila Hiramu alaanga biriimba bino ari Kabulu, lwekhuuba aabibona nga sibilimo kumukaso ta. Biriimba bino bilaangibwa biryo khukhwoolesa ni shaleelo shino.

¹⁴Hiramu aaba waayakaanisa umuyiinga Solomoni tsikilo bikana bine (4,000) tse zaabu.

¹⁵Eyino niyo isaambo isi Solomoni awaanyiinyamo babaandu khuuraamba nga boombekha Liisaayilo Liikhulu ly'Omukasya, atweela ni lubili lweewe, ni Millo[9], ni litikiiyi lya Yerusalemu, atweela ni biriimba bya Hazori, ni Megido ni Gezeri.

¹⁶Makiboolekho, Faraawo umuyiinga we Misiri, ebwakala lwanyuma wahaamba shiriimba Gezeri, waashiwaambisakho kumulilo, waashoosha shaawawo, weeraka ni babaandu ba Kanaani babaaba bashimenyamwo. Lwanyuma waashiwayo nga shiwaanwa she bukhwaale isi umukhaana weewe, uwakhwaalikha wa Solomoni.

¹⁷Aryo Solomoni waakhakakho khuubona ari shiriimba shino sha Gezeri shombekhebwa luundi. Solomoni waalakila ni baraambi beewe khukhwoombekha ni biriimba Besi-Horoni she Mwisina,

¹⁸Baalati, ni Tamari shishaba mu mubiimbi kwe mu shibala sheewe.

¹⁹Baatubakho ni khukhwombekha biriimba bye birara, ni biriimba mweesi kamakaali, ni tsiŋwaaŋwa tseewe bibiikhibwa. Solomoni waabalakila khukhwoombekha byoosi byeesi akana mu Yerusalemu, ni mu Lebanooni, na buli aandu oosi mu buyiinga bweewe.

²⁰Aabawo babaandu babaakhaaba ba Isiraeli ta, nga nibo ba Amori, ba Hiti, ba Perizi, ba Hivi, ni ba Yebusi, babaaba nga bamenya mu shibala isho.

²¹Bano boosi baaba babetsukhulu be babaandu be kamanaambo, beesi ba Isiraeli bakhaahesa ta, ne baaramawo nga baakulwa be ba Isiraeli. Bano boosi, Solomoni aalakila ari benjisibwe mu buraambi bweewe ni kamaani, naluundi baarama nga baraamba baryo khukhwoolesa ni shaleelo shino.

²²Ne khu baandu ba Isiraeli, mbaawo na mutweela isi Solomoni aalakila ari bamwinjise ni kamaani mu buraambi ta. Ne khuurusakho nibo aabakhola busa khuuba baselikhale beewe, baakhulu be angaaki mu buwuli bweewe, baakhulu be kamaye, baakhulu be babatimisa kamakaali keewe, ni naabo babatimila khu ŋwaŋwa tseewe.

²³Solomoni aarobolayo baakhulu babaandi baboola bitoondo biraano ni kamakhumi karaano (550), khuuba nga nibo babaalolelela baraambi babaakholatsaka mu bye khukhwombekha khweewe.

²⁴Lwanyuma nga Solomoni waamalile khuumusa umukyelama weewe, uwaba umukhaana wa Faraawo khukhwaama mu shiriimba sha Dawudi, waamuyila mu lubili lweewe lweesi aamwombekhela.

²⁵Abe kimiluundi kitaru mu mwiiko, Solomoni awaanayo tsisaayilo tsintsoshe, ni biwaanwa bye lukoosi isi Umukasya, nga araambisa shisheeso sheesi ombekha. Aryo Solomoni waamaliilisa kumulimo kwe khukhwombekha Liisaayilo Liikhulu.

²⁶Lwanyuma umuyiinga Solomoni wombekha tsimeeri i Eziyoni Geberi, shishaba aambi ni Elati she mu shibala sha Edomu, khu ndulo khwe nyaantsa Imbesemu.

²⁷Hiramu waarumana basaani beewe babaamanya naabi bye khuusuba khu meetsi, khuutsya khutimisa tsimeeri tsa Solomoni, nga baraambila atweela ni basaani ba Solomoni.

²⁸Baatsya baatimisa tsimeeri boola i Ofiri, baareerera umuyiinga Solomoni tsikilo kumukaanda ni biikana bine (14,000) tsa Zaabu.