Read lumasaaba 2 Bayiinga 12 Bible Online

2 Bayiinga 12 - lumasaaba bible

2 Bayiinga 12

¹Yowasi ekyela umuyiinga uwa Yuda nga Yehu waamalile kimiiko musaafu nga ali umuyiinga uwa Isiraeli. Waaba umuyiinga khuumala kimiiko kamakhumi kane, nga ekhala i Yerusalemu. Maayi weewe abe aama i Berisheba, lisiina lyeewe abe bari Zebiya.

²Yehoyada waleekela Yowasi bibiindu biilayi byonyene, ni nashiryo naye wakholatsaka biilayi byonyene mu moni tsy'Omukasya.

³Ne ikhaba Yowasi naye s'onakisa kamesaayilo ka busheele busa ta, ni babaandu baryo beloosela khukaraambisa nga bawaanayo tsisaayilo.

⁴Shifukhu shitweela, Yowasi waalomela basaayi ari, “Buusanisa kamapeesa koosi ke bibiindu bikhosefu keesi bareera mu Lisaayilo ly'Omukasya, ako kakaama mu biwaanwa ni kimisolo.

⁵Mukaraambise mu khuŋoona Liisaayilo Liikhulu. Basaayi nanywe munyala mwabuusaasa kamapeesa kakeenywe.”

⁶Ne basaayi baalekha khurakikha khuuŋoona Lisaayilo ta. Nashiryo mu mwiiko kweewe kwe kamakhumi kabili na kitaru nga umuyiinga,

⁷Yowasi waalaanga Yehoyada ni basaayi babaandi waabareeba ari, “Shiina kila mukhaarakikha khuuŋoona Lisaayilo? Khukhwaama ari mukhebukulilakho kamapeesa koosi ta, akhali ndi muli ni khuukawaanayo karaambisibwe mu khuŋoona Lisaayilo.”

⁸Nashiryo basaayi baafukiilisa bari singene beloosele khuubusaasa kamapeesa ta, naluundi bari ibewo babaandu babaandi babaakhola khu kwe khuuŋoona lisaayilo.

⁹Yehoyada wawaamba lipokisi lye tsimbaawo, waalirundulakho kumwaanya khu ngaaki, waalira khu luwaande luseetsa lwe shisheeso isi babaandu babirira nga bengila mu Lisaayilo. Abe buli lweesi umuundu awaanayo kamapeesa nga engila mu Lisaayilo, basaayi bakabukula baakara mu lipokisi ilyo.

¹⁰Abe nga baaboone bari kamapeesa ketsuule mu lipokisi, umuroni uw'omuyiinga n'umusaayi umukhulu abe beetsa baakabala, lwanyuma baakara mu tsisawu.

¹¹Lwanyuma abe bakawa abo babaali khuuloleelela kwe khuŋoona Lisaayilo. Bano abe bawaamba kamapeesa kano baakawa babombakhi,

¹²ni baraambi babaandi, ni khuukula tsimbaawo ni kamabaale. Kakaandi abe karaambisibwa khu milimo kikikhali mitweela ta, kye khuuŋoona Lisaayilo.

¹³Kamapeesa kano sikaaraambisibwakho mu khukhola bipwakhuli bye ifeetsa, namwe biraambisibwa mu khusimisa tsitaala, namwe bipwakhuli bibiraambisibwa mu khuubita, namwe tsifulumbeti, namwe shishiindu shoosi she zaabu namwe she ifeetsa ta.

¹⁴Khulwekhuuba kano kaaba ke buraambi bwe khuuŋoona Lisaayilo.

¹⁵Mbaawo abe uwimenieelesa nga kamapeesa kano ni karaambisibwa ta, khulwekhuuba abe abo babaakaraambisa bali babeyikinwa.

¹⁶Ne ako keesi babaandu baareera khulwekhuuba baasaalile kimisaango, namwe khulwe bibyoonako byaabwe, kano sibaakayila mu Lisaayilo ta. Kano abe kali ke basaayi.

¹⁷Mu mbuka nyene iyo, umuyiinga Hazaeli uwa Siriya webwakala shiriimba Gaasi, waashiwaamba. Nga alikho ariisariisa khuuwaamba Yerusalemu,

¹⁸umuyiinga Yowasi uwa Yuda waabusaasa biwaanwa byoosi abe niye ni bakuuka beewe Yehoshafati, Yolamu, ni Ahaziya, abe byeesi baabuusa mu mabiikhilo ke mu Lisaayilo ni mu lubili, nga mulimo izaabu, waabiwaamba waabiwongela Hazaeli. Aryo nga Hazaeli waamalile khuufuna bibiindu bino, waalakila basilikhale beewe khuulekha khuwaamba Yerusalemu ta.

¹⁹Bibiindu byoosi byeesi Yowasi aakhola nga ali umuyiinga, byaronebwa mu shitabo shishiilimo Bibyakholekha biikhale bye Bayiinga ba Isiraeli.

²⁰Lwanyuma baaraangilisi be kamaye keewe baamukholela luwomelo, kila beera Yowasi nga ali muntsu i Milo, shishiili khu ntsila itsya i Sila.

²¹Babaamwiira baaba Yosaka, umusoleeli uwa Shimeasi ni Yehozabadi, umusoleeli uwa Shomeri. Baamusiikha i Yerusalemu khu biliindwa bye bakuuka beewe. Amaziya umusoleeli uwa Yowasi weela mu bikyele bya paapawe, nga umuyiinga.