Read lumasaaba 2 Bayiinga 13 Bible Online

2 Bayiinga 13 - lumasaaba bible

2 Bayiinga 13

¹Mu mbuka isi Yowasi umwaana uwa Ahaziya oleselamo kimiiko kamakhumi kabili na kitaru nga ali umuyiinga uwa Yuda, Yehoahazi umwaana uwa Yehu wekyela umuyiinga uwa Isiraeli, nga ekhala i Samariya. Waawula nga ekhala iyo khuumala kimiiko likhumi na musaafu.

²Naye waaminyaalila Umukasya, waakhola bibiindu bibikhali biilayi ta. Naye webirisaka nga Yerobowamu umwaana wa Nebati, uwaakila ba Isiraeli baaminyaalila Umukasya.

³Shino shaakhalasa naabi Umukasya, kila naye waabaantsukha, waakila waalekha umuyiinga Hazaeli uwa Siriya n'umwaana weewe Benihadadi, baawula ba Isiraeli khuumala imbuka indeeyi.

⁴Lwanyuma Yehoahazi waaloomba isi Umukasya ari abayeete. Nga Umukasya waaboone isaambo isi abe Hazaeli alikho ababonabonisamwo, waabarusakho ba Siriya.

⁵Umukasya waawa ba Isiraeli umuwonesi khuubayeeta, waakila baarura mu khumiinikhilisibwa khwe ba Siriya. Ba Isiraeli beelayo baamenya mu lukoosi nga ni baaba makiboole.

⁶Ne shitweela busa baalekha khururira ilala khu ntsibirisa imbi isi beyika khukhwaama khwisaaye lya Yerobowamu ta. Baalekha khufuniaaka kimisiindi abe kyeesi baraambisa mu khwisaaya wele Ashera ta. Kimisiindi kino abe kili i Samariya.

⁷Liiye lya Yehoahazi lyakheendelela ilala, lyarama busa nga basilikhale kamakhumi karaano babaakyeendela khu ŋwaaŋwa, kamakaali likhumi, ni basilikhale ba busheele busa kumukaanda mutweela (10,000). Khulwekhuuba abe liiye lilifuura bukali umuyiinga uwa Siriya waalyonakisa.

⁸Bibiindu byoosi byeesi Yehoahazi aakhola nga ali umuyiinga, nga bibiilimo ni bunyindaalifu bweewe, byaronebwa mu shitabo shishiilimo Bibyakholekha biikhale bye Bayiinga ba Isiraeli.

⁹Lwanyuma Yehoahazi waafwa, baamusiikha khu biliindwa bye bakuuka beewe mu Samariya, umwaana weewe Yehoashi wekela niye umuyiinga.

¹⁰Yehoashi ekyela umuyiinga wa Isiraeli nga Yowasi waamalile kimiiko kamakhumi kataru na musaafu, nga ali umuyiinga wa Yuda. Yehoashi waawula khuumala kimiiko likhumi na kisesaba, nga ekhala i Samariya.

¹¹Naye waaminyaalila Umukasya, waakhola bibikhali biilayi ta, waaba busa nga Yerobowamu umwaana wa Nebati, uwaakila ba Isiraeli boosi baakhola bibyoonako isi Umukasya.

¹²Bibiindu byoosi byeesi Yehoashi aakhola nga ali umuyiinga, atweela ni busoolo bweesi aasoolanisa umuyiinga Amaziya uwa Yuda, byoosi byaronebwa mu shitabo shishiilimo Bibyakholekha biikhale bye Bayiinga ba Isiraeli.

¹³Lwanyuma Yehoashi waafwa, baamusiikha mu Samariya, khu biliindwa bye bakuuka beewe. Umwaana weewe Yerobowamu we khaabili wekyela umuyiinga.

¹⁴Lutweela nga Elisha ali umutsiina nga ali aambi khuufwa, naluundi nga Yehoashi ashiili umuyiinga uwa Isiraeli, waatsyayo khuumubona. Nga woolileyo kila alila, nga aloma ari, “Paapa wase! Paapa wase! Kamakaari ka Isiraeli ni babaakekhalamo kane bakhole baryeena!”

¹⁵Elisha waamulomela ari, “Bukula luyiingo ni bufumo.” Kila abibukula.

¹⁶Elisha waalomela umuyiinga ari, “Aamba buufumo ure mu luyiingo lwanyuma ukhweese.” Waakhola nga Elisha n'amulomela. Kila Elisha ara kamakhono keewe khu makhono k'omuyiinga.

¹⁷Elisha waamulomela ari, “Yikulawo litirisa lililolelela ibukwanyaanga.” Waalikulawo. Elisha waaloma ari, “Lasa bufumo.” Kila alasa. Elisha waamulomela ari, “Bufumo buno bw'Omukasya. Bwetsuule kamaani ke khuuwula ba Siriya! Khulwekhuuba utsya khusoolanisa ba Siriya i Afeki, khukhwoolisa ubamalewo.”

¹⁸Elisha waaloma luundi ari, “Bukula bufumo buburamire lwanyuma ubukhupe aasi.” Yehoashi waabubukula waabukhupa aasi kimiluundi kitaru kyonyene, waakamisa.

¹⁹Ne umuŋoosi Elisha waamukhalalila, waamuloma ari, “Khali ukhupile aasi kimiluundi kiraano namwe kisesaba. Awo khali uwulile Siriya mu busoolo khukhwoolisa n'ubamalawo. Ari shimanyisa shiri kane ubawule mu busoolo kimiluundi kitaru kyonyene.”

²⁰Lwanyuma lwayo, Elisha waafwa, baamusiikha. Ari abe buli kumwiiko lweesi kimiheeso kiililakho, ba Mowabu bebwakala ba Isiraeli.

²¹Shifukhu shitweela nga ba Isiraeli balikho basiikha umuundu, kila babona lituuli lye ba Mowabu nga beetsa khu bebwakala. Khulwe khuurya khuukali, baamwaata kumulaambo ukwo mu ŋani ya Elisha, baatitukhawo. Khaangukho kumulaambo ukwo ni kwetiila khu makuumba ka Elisha, kwekyela umuundu umulamu, wenyukha khu ngaaki weema.

²²Khuumala buwuli bwa Yehoahazi bwoosi, umuyiinga Hazaeli uwa Siriya abe amiinikhilisa ba Isiraeli.

²³Ne Umukasya waabawaambila shiisa, waabona ari boosi sibawawo ta. Umukasya waabasaasila khulwe Ndakaano isi aakhola ni Iburayimu, Isaaka, ni Yakobo. Ni khukhwoolisa aluno ari, Umukasya siwabaantsukhakho ta.

²⁴Nga Hazaeli umuyiinga uwa Siriya waafwiile, umwaana weewe Benihadadi waamwiilila mu bikyele byeewe nga umuyiinga.

²⁵Nio lwanyuma Yehoashi umwaana uwa Yehoahazi, waatsya waanuula khukhwaama khu Benihadadi, biriimba byeesi abe Hazaeli aawaamba khukhwaama khu paapa weewe. Kimiluundi kitaru nga Yowasi amuwula n'amurusakho biriimba bya Isiraeli.