Read lumasaaba 2 Bayiinga 15 Bible Online

2 Bayiinga 15 - lumasaaba bible

2 Bayiinga 15

¹Azariya umusoleeli uwa Amaziya ekyela umuyiinga uwa Yuda, nga Yerobowamu waamalile kimiiko kamakhumi kabili na musaafu nga ali umuyiinga uwa Isiraeli.

²Ekyela umuyiinga nga ali ni kye buukhulu likhumi na kisesaba. Nga ekhala mu Yerusalemu, wawula khuumala kimiiko karaano na kibili. Maayi weewe abe bamulaanga bari Yeholaya, nga aama i Yerusalemu.

³Naye waaba busa nga paapawe Amaziya, wakhola ibyo bibikhoyesa Umukasya.

⁴Ne shitweela busa naye waalekha khutikulula kamesaayilo ke ba wele babaandi ta. Babaandu baarama nga bashiitsyayo ne bawaanayo biwaanwa ni khukhwoosha bubaane nga besaaya.

⁵Shaakila Umukasya waamusiindikhila buulwaale bwe bikeenge, waaba nabwo khukhwoolisa mu khufwa khweewe; naluundi waamenyatsaka yenyene muntsu iya buraawa. Umwaana weewe Yosamu waaba niye umenya mu lubili, aryo waaba umuyiinga mu shifwo sheewe.

⁶Bibiindu bibiramire byoosi byeesi Azariya aakhola nga ali umuyiinga, byaronebwa mu Shiitabo shishiilimo Bibyakholikha khaale bye Bayiinga ba Yuda.

⁷Nga Azariya waafwiile, baamusiikha mu Yerusalemu, khu biliindwa bye bakuuka beewe. Umwaana weewe Yosamu waamwiilila mu bikele nga umuyiinga.

⁸Zekariya umwaana wa Yerobowamu II, ekyela umuyiinga uwa Isiraeli nga Azariya waawulile Yuda khuumala kimiiko kataru na shinaane. Zekariya waawula Isiraeli nga ekhala i Samariya, khuumala kimyeesi kisesaba.

⁹Zekariya naye waaba busa nga bakuuka beewe, waakhola bibiindu bibikhali biilayi ta mu moni tsy'Omukasya. Waaloondelela khukhwisaaya ba wele babaandi, nga Yerobowamu umwaana uwa Nebati n'aleekela ba Isiraeli khuukhola.

¹⁰Ne lwanyuma Shalumu umwaana uwa Yabeshi waakhola luwomelo lwe khukhwiira Zekariya. Waamwiirira abulafu busa kila niye umweene ekyela umuyiinga.

¹¹Bibiindu bibiramire byoosi byeesi Zekariya aakhola nga ali umuwuli, byaronebwa mu Shiitabo shishiilimo Bibyakholikha biikhale bye Bayiinga ba Isiraeli.

¹²Nashiryo shino shakholikha nga abe Umukasya ni aasuubisa Yehu ari, “Lisaaye lyoowo liliikela bayiinga ba Isiraeli, khuumalakho kumuboolo kwe khaane.”

¹³Nga Uziya waamalile kimiiko kataru na syeenda nga umuwuli uwa Yuda, Shalumu wekela umuyiinga uwa Isiraeli. Shalumu waamala kumweesi mutweela kwonyene mu buwuli, nga ekhala i Samariya.

¹⁴Lwanyuma Menahemu umusoleeli uwa Gasi waama i Tiruza waatsya i Samariya waakhoonya Shalumu. Menahemu wekela umuyiinga.

¹⁵Bibiindu bibiramire byeesi Shalumu aakhola, nga mulimo ni luwomelo lweewe, byoosi byaronebwa mu Shiitabo shishiilimo Bibyakholekha biikhale bye Bayinga ba Isiraeli.

¹⁶Mu mbuka iyo, Menahemu woonakisa shiriimba she Tapuwa, ni babaandu babaashibamo boosi, ni khuutsya khukhwoolisa i Tiruza, khulwekhuuba babaandu baamwo baaloba khukhwiwaanayo mu makhono keewe, weeraka babaandu boosi babaabamo, ni bakhasi be bisoombo waakhalakaka bisoombo ibyo.

¹⁷Menahemu umwaana uwa Gadi ekyela umuyiinga uwa Isiraeli, nga Azariya waawulile Yuda khuumala kimiiko kataru na syeenda. Aryo waawula khuumala kimiiko likhumi, nga ekhala i Samariya.

¹⁸Ne naye waaloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati n'aleekela ba Isiraeli khu khola. Aryo waakhola bibyoonako mu moni tsy'Omukasya.

¹⁹Lwanyuma Tigilasi Pilesa, umuyiinga uwa Asiriya webwakala Isiraeli. Ne Menahemu waamuwa buyiindifu bwe feetsa bubwoola bikana ni bikana, ari amuyeete anyalise khuumenyawo nga umuyiinga.

²⁰Buyiindifu buno Menahemu aabukhoonola khukhwaama khu bayiindifu be mu Isiraeli, nga aloma ari buli mutweela ali ni khuuwayo kumusolo mu feetsa iyoola aambi ikilo ndweela. Nashiryo umuyiinga wa Asiriya waakaanila bibiindu bino waalekha khuwaamba shibala isho ta.

²¹Bibiiramire byoosi byeesi Menahemu aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Isiraeli.

²²Nga Menahemu wafwiile, umwaana weewe Pekahiya wekyela umuyiinga.

²³Pekahiya ekyela umuyiinga uwa Isiraeli nga Azariya waamalile kimiiko kamakhumi karaano, nga uwula Yuda. Pekahiya wawula khuumala kimiiko kibili, nga ekhala i Samariya.

²⁴Ne Pekahiya naye waloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati ni aleekela ba Isiraeli khu khola. Aryo wakhola bibyoonako mu moni tsy'Omukasya.

²⁵Mutweela khu baaraangilisi be liiye lya Pekahiya, abe bamulaanga bari Peka, umwaana wa Remaliya. Peka yuno wakhola luwomelo waatsya ni basilikhale karaano khukhwaama i Gileyadi, bakhoonya Pekahiya, atweela ni Arugoba ni Ariye, nga bali mu lubili lw'omuyiinga i Samariya. Peka wekyela umuyiinga wa Isiraeli.

²⁶Bibiiramire byeesi Pekahiya akhola nga ali umuyiinga, byaronebwa mu Shiitabo she Bibyakholikha Biikhale bye Bayinga ba Isiraeli.

²⁷Peka ekyela umuyiinga uwa Isiraeli nga Azariya waawulile Yuda khuumala kimiiko karaano na kibili. Peka waawula nga ekhala i Samariya, khuumala kimiiko kamakhumi kabili.

²⁸Ne Peka naye waaloonda khu saambo tsiimbi weloosela khukhwisaaya ba wele babaandi, nga Yerobowamu umwaana wa Nebati ni aaleekela ba Isiraeli khuukhola. Aryo waakhola bibyoonako mu moni tsy'Omukasya.

²⁹Nga Peka ali umuyiinga, Tigilasi Pilesa uwa Asiriya webwakala Isiraeli luundi, wawaamba biriimba bino: Iyoni, Abeli-Besi-Maaka, Yanowa, Kedeshi ni Hazori. Wawaamba ni bisiintsa bino: Gileyadi, Galilaaya, Nafutali; waasuta babaandu baamwo waabayila mu bubowe i Asiriya.

³⁰Nio lwanyuma Hosheya umusoleeli uwa Ela waakhola luwomelo weera Peka. Hosheya wekyela umuyiinga wa Isiraeli nga Yosamu umwaana uwa Uziya waawulile khuumala kimiiko kamakhumi kabili.

³¹Bibiiramire byeesi Peka aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Isiraeli.

³²Yosamu umusoleeli wa Azariya ekyela umuyiinga wa Yuda nga Peka waawulile Isiraeli khuumala kimiiko kibili.

³³Yosamu ekyela umuyiinga nga ali ni kye buukhulu kabili na kiraano. Waawula khuumala kimiiko likhumi na kisesaba nga ekhala mu Yerusalemu. Maayi weewe abe bari Yerusha, umukhaana uwa Sadooki.

³⁴Yosamu waaloonda khu bikholwa biilayi bya paapa weewe Azariya, naye waakhola bibiindu biilayi mu moni tsy'Omukasya.

³⁵Ne she khabi imbi, waalekha khutikulula kamesaayilo ke ba wele babaandi, abe isi babaandu batsya khukhwisaaya ni khukhwookhela bubaane ta. Naluundi niye uweesamo wombakhisa shilibwa she luwaande lwe ngaaki lwe Lisaayilo ly'Omukasya.

³⁶Bibiiramire byeesi Yosamu aakhola nga ali umuyiinga, byaronebwa mu Shiitabo she Bibyakholikha Biikhale bye Bayiinga ba Yuda.

³⁷Mu biifukhu ibyo, Umukasya waasiindikha Rezini, umuyiinga wa Siriya ni Peka umuyiinga wa Isiraeli khuutsya khwibwakala Yuda.

³⁸Nga Yosamu wafwiile, baamusiikha mu biliindwa bye bakuuka beewe, mu Yerusalemu. Lwanyuma umusoleeli weewe Ahazi, wekyela umuyiinga.