Read lumasaaba 2 Bayiinga 19 Bible Online

2 Bayiinga 19 - lumasaaba bible

2 Bayiinga 19

¹Nga umuyiinga Hezekiya waawuliile bibiindu bino, khulwe kumutaambo kumukali, naye wonuula bikwaaro byeewe, waakwaara shikwaaro she bukoongwe, wengila mu Lisaayilo ly'Omukasya khuuloomba.

²Kila arumana Eliyakimu nga yuno niye uraangilila bye mu lubili, ni Shebuna abe uuli umuroni, ni basaayi babaamanyikhaane naabi, nga buli mutweela waakwaarire shikwaaro she bukoongwe, khuutsya isi umuŋoosi Isaaya, umwaana uwa Amozi.

³Baatsya baamulomela bari, “Umuyiinga Hezekiya waalomile ari: Shino shili shifukhu she kumutaambo, she tsikhomo ni khuswaala. Shili busa nga umukhasi uuli mu butsiina bwe khuusaala, ne nga s'ali ni kamaani ke khuusaala ta.

⁴Winyoola Umukasya Wele woowo awuliile bilomo by'omu Asiriya uyo nga afwotsola Wele umulamu. Khali Wele amuweele shitaambiso khulweebyo byeesi alomele. Ni nashiryo khuloombele ifwe khukhuramilewo.”

⁵Nga baarume ba Hezekiya baamalile khukhwoolisa buurume bwaabwe isi Isaaya,

⁶waabeelamo ari, “Umukasya aloma ari: ‘Mukharya khulwe bilomo byeesi muwuliile, nga umurume w'omuyiinga uwa Asiriya afwotsola ise ta.

⁷Bona, ise samweene intsya khumuramo umwoyo, ukana akile awulile lukaambo busa lukile eleyo mu shibala sheewe. Nga woolile iyo, kane bamwiirire mu shibala sheewe shisheene.’ ”

⁸Nga bishiili biryo, umurume w'omuyiinga wa Asiriya waarura i Yerusalemu, waatsya khukhwiireebakho isi umuyiinga weewe. Khulwekhuuba abe umuyiinga waarurire i Lakisi waatsiile khukhwibwakala Libuna.

⁹Lwanyuma Senakyeribu waawulila bari umuyiinga Tiruhaka uwa Esiyopiya alikho etsa khumwibwakala. Kila asiindikha buurume luundi isi Hezekiya mu Yerusalemu, nga buloma buri:

¹⁰“Boolela Hezekiya umuyiinga uwa Yuda muri: ‘Ukhalekha Wele isi wiyikina waakhuwombesa iwe ari ise kane ikhaasikhe khuwaamba Yerusalemu ta.

¹¹Iwe wamweene waamanya buulayi byeesi bayiinga ba Asiriya baakhola khu manaambo kakaandi khukhwaama khaale, nga ni baakoonakisila ilala. Ne ari iwe wambaasa uri kane uwone?

¹²Ba wele be kamanaambo baabayeetatsakakho khuubawonesa khukhwaama khu bakuuka baase? Boonakisa Gozani, Harani, Rezefu, ni naabo babaaba mu Telesara.

¹³Umuyiinga uwe Hamasi, n'uwe Arupadi, n'uwe Sefaruvayimu, n'uwe Hena, n'uwe Iva, boosi bali waheena?’ ”

¹⁴Nga Hezekiya waamalile khukhwakaanila ibaluwa yino, naluundi nga waamalile khuukisoma, kila atsya mu Liisaayilo Liikhulu, waakibaambululila mu moni tsy'Omukasya.

¹⁵Aryo Hezekiya waaloomba nga aloma ari, “O Umukasya Wele uwa Isiraeli, iwe waayikhala khu shitsoloŋo angaaki a kerubi! Iwe wenyene niye uuli Wele uwe buyiinga bwe khu shibala shoositsana. Iwe wenyene niye uwabuumba likulu ni shibala.

¹⁶O Mukasya, n'ureke khukhuru khwoowo urekeerese khuuloomba khwase! O Mukasya, ni wikule tsimoni tsoowo ubone! Rekeeresa bilomo byeesi Senakyeribu aloma, bibifwotsola Wele umulamu.

¹⁷“O Umukasya, shili shituufu shiri bayiinga ba Asiriya bafuura kamanaambo kamakali mu busoolo, nga buurume ni bulomele.

¹⁸Baamwaata ba wele be kamanaambo ako mu mulilo baaboosha; ne khulwekhuuba abe bano sibali wele umweene ta, akhali kamabaale ni bisaala byeesi babaandu bakhootsa busa. Ni nashiryo banyalisa khuuboonakisa.

¹⁹Ne iwe, O Umukasya, naakhwikoontseleele, n'ukhuwonese ifwe khukhwaama mu meeno keewe. Shino kane shikile kamanaambo koosi kamanye kari iwe wenyene Umukasya, niye uuli Wele.”

²⁰Lwanyuma Isaaya umwaana uwa Amozi waasiindikhila Hezekiya buurume bw'Omukasya Wele uwa Isiraeli bubwaloma bubuwaamba khu Senakyeribu, umuyiinga uwa Asiriya.

²¹Buurume bweesi Umukasya akanikhile buloma buri: Umukhaana indungubaasi uwa Sayuuni akhulekelesa iwe naluundi waakhutsekhelela. Umukhaana uwa Yerusalemu asiisiikha busa kumurwe nga iwe utitukha khuururawo.

²²Naanu niye isi iwe ukhomyaasile naluundi waalekelesa? Naanu niye isi iwe uwotseleele? Naanu niye isi iwe uloleelele ni tsimoni tsye khukhwiyiinga? Bino byoosi ubikholile khu Wele wa Isiraeli!

²³Khuubirira mu baarume boowo, iwe wafwotsoole Umukasya, nga uloma uri, mu khuraambisa kamakaali koowo, iwe waafuurire mu busoolo bwe angaaki naabi, ni khukhwoolela ilala mu buli shisiintsa sha Lebanoni shoosi. Naluundi uri waaremire kimisaala kyaabwe kimi seda kikiifuura buuleeyi, ni kimisaala kikiindi kikiifuura buulayi. Waaloma uri woolile buli aandu, ikhaba ni mu shisaali mukari mu bweene.

²⁴Weloosela uri waalima tsisebele tsye kameetsi mu manaambo kakaandi, waanywamo kameetsi, uri waanyalisa khukhwoomisa ni tsintsitsi tse kameetsi mu Misiri!

²⁵Senakyeribu, iwe siwawulila shino uri ise Umukasya nashikhalawo khaale busa ta? Ise shino nashikhalawo khukhwaama khaale ndi shikhaakholikhe musaambo yino, ndi ukhaminiangule biriimba byeesi bebotokhelesa kamatikiiyi, bikyele busa nga kamakubili.

²⁶Shino shikila babaandu baayo baaba ni kamaani makyeekhe kari, shaakhunyalisa iwe khuubakyeendelakho. Ari bayikyela busa nga bilimwa mu mukuunda, bali busa nga bunyaasi bubushiili bubwaana. Bali busa bunyaasi buburura khu ntsu khu ngaaki; kumuumu kubwoosha bwaniaala khaangu.

²⁷Ne ise naamanya iwe nga niwikhala aasi, naluundi naamanya khuurura ni khukhwinjila khwoowo naamanya ni lirima lyeesi iwe untsokesanile ise.

²⁸Khulwekhuuba iwe waantsokesanisile ise lirima liikali, naluundi ise naboone khukhwiyiinga khwoowo, ise inakhura iwe kumulobo mu moolu ni shiibya mu khanwa mwoowo ikhukhweese wileyo khu ntsila isi weetsilakho.

²⁹Kila Isaaya alomela Hezekiya ari, “Khano nikho khaakane khabe khaabonelo isi uli: Umukasya anatseeta shiriimba shino: kumwiiko kuno kane mukyese biilyo bibirura byonyene busa, ni kumwiiko kukwiitsa nakwo muryo; ne mu mwiiko kwe khataru, ni mumiitse, mukyese, nio lwanyuma mubyaale kimizabibu mulye bibyaamo byakyo.

³⁰Babaandu ba Yuda babaakhaabe bawonele busoolo buno, bakhaamenye mu liloba lyeenywe bushaakha, beeleyo basaalane luundi.

³¹Khulwekhuuba babaakhaabe nga baaramirewo balirakikha khuusalanila nga barakikhila mu Yerusalemu, lituuli lye babaakhaabe baaramirewo likhaarakikhire khu Lukiingi Sayuuni. Shino shikhaakholikhe khulwekhuuba Umukasya ali ni khuukana khuubiriirifu naabi.

³²“Nashiryo bibiwaamba khu muyiinga uwa Asiriya, Umukasya alikho aloma ari: Basilikhale beewe singene bengile mu shiriimba isho namwe balasemo buyiingo bwaabwe ta. Singene bakhuumbile ibulafu we shiriimba nga bawaambile tsingabo namwe bashibotookhelele ta.”

³³Umukasya aloma ari, “Umuyiinga uyo kane awaambe intsila imureerire eleyo iweewe. Singene engilekho mu shiriimba muno ta.

³⁴Khulwekhuuba ise samweene kane imbewo khutseeta shiriimba shino, khulwe lisiina lyase ni ly'omwakaanisi wase Dawudi.”

³⁵Mu shilo sheene isho, malayika w'Omukasya waatsya weera basilikhale kumweeka mutweela kimikaanda shinaane ni biikana biraano (185,000), khukhwaama mu kaambi iye ba Asiriya. Babaaramawo ni benyukha kumutishinyi baanyoola nga iliwo kimilaambo buli aandu.

³⁶Lwanyuma lwa bino, Senakyeribu umuyiinga uwa Asiriya, weelayo ingo ni basilikhale beewe, waatsya waamenya mu shiriimba Nineve.

³⁷Shifukhu shitweela nga ali mu lisaayilo esaaya wele weewe Nisiroki, basooleli beewe Adurameleki ni Sharezeri baamuwuna lurima baamwiira. Kila beelukhila mu shibala sheesi balaanga bari Ararati. Umwaana weewe Esarihadoni waamwiilila mu bikele byeewe, nga umuyiinga uwa Asiriya.