Read lumasaaba 2 Bayiinga 20 Bible Online

2 Bayiinga 20 - lumasaaba bible

2 Bayiinga 20

¹Mu mbuka nyene iyo, Hezekiya waaba umutsiina, woolisa aambi ni khuufwa. Kila umuŋoosi Isaaya umwaana wa Amozi atsya khuumubona, waamulomela ari, “Umukasya waalomile ari, uli khuutsya khufwa, nashiryo n'uŋoonaŋoone bye muungo mwoowo. Singene uwone khukhwaama mu butsiina buno ta.”

²Hezekiya n'awulila bilomo bino, waashuukha waalola khwitikiiyi, waaloomba isi Umukasya nga aloma ari,

³“O Umukasya, ise naakhwikoontseleele, iwe n'ushebulile nga ise n'imbeele umwiyikinwa is'uli, naluundi nakhola byeesi iwe ukana.” Lwanyuma waarundukha waalila kamasika burafu bubweene.

⁴Ne nga Isaaya abe ashiili khururawo waatsya ta, buurume bwaamwiitsila khukhwaama isi Umukasya nga buloma buri,

⁵“Yiilayo isi Hezekiya umuraangilisi uwe babaandu baase umulomele uri, Umukasya Wele uwa kuuka woowo Dawudi waalomile ari: Ise naawuliile khuuloomba khwoowo, naluundi naaboone kamasika koowo. Nashiryo, ise inakhuwonesa iwe; ni khu shifukhu she khataru ukhaatsye mu Liisaayilo Liikhulu khuuloomba.

⁶Kane ise ikhulooselekho iwe kimiiko kikiindi likhumi na kiraano khu bulamu bwoowo. Ise kane ikhutseete iwe ni shiriimba shino khukhwaama khu muyiinga uwa Asiriya. Kane ise ikhole shino khulwe lisiina lyase ni khulwe lisiina lya Dawudi umwakaanisi wase.”

⁷Kila Isaaya alakila babaakaanisi b'omuyiinga ari, “Ni mureere kamatuunda ke kuusaala kufigi, nga mwakarokire, mukahakhe khu libiimba lyeewe; kane awone.”

⁸Kila Hezekiya areeba Isaaya ari, “Khabonelo shiina khakane khokesanise khari Umukasya anambonisa ise? Naluundi khakhokesanisa khari khu shifukhu she khataru ise ikhaatsye mu Liisaayilo Liikhulu imwisaaye?”

⁹Isaaya waamwiilamo ari, “Khabonelo khukhwaama isi Umukasya, khakhokesanisa khari kane akhole sheesi akhulomeele iwe, khali nikho khano: ukana shishiniini she angoloobe shitsye ibweeni bikele likhumi, namwe shiile inyuma bikele likhumi?”

¹⁰Hezekiya welamo ari, “Shili shishaangu naabi shishiniini khuutsya ibweeni bikele likhumi; ne ari khola shiile inyuma bikele likhumi.”

¹¹Aryo Isaaya waaloomba Umukasya khuukhola shino; nashiryo weesa shishiniini inyuma bikyele likhumi, nga inyaanga yaakhosele khu Ahazi.

¹²Mu mbuka nyene iyo, umuyiinga uwa Babulooni, Merodaki-Baladani umwaana uwa Baladani, waasiindikha baarume ni tsibaluwa ni shiwaanwa isi Hezekiya, khulwekhuuba abe waawulila bari Hezekiya ali umutsiina.

¹³Hezekiya waabakaanila buulayi waabokesanisa buyiindifu bwe muntsu yeewe bwoosi, nga mumuuli ifeetsa, izaabu, bibiwunya buulayi, kamafura kakawunya buulayi, libiikhilo lye bye busoolo byeewe, ni neebyo byoosi abe bibiili muntsu yeewe. Mbaawo shishaba muntsu namwe abe sheesi Hezekiya ali ni nasho sheesi akhaabokesa ta.

¹⁴Lwanyuma kila umuŋoosi Isaaya atsya isi Hezekiya amureeba ari, “Babaandu abo abe bakana shiina? Naluundi baamile waheena?” Hezekiya weelamo ari, “Baamile mu shibala she aleeyi she Babulooni.”

¹⁵Isaaya waareeba ari, “Mu ntsu mwoowo baboonemo shiina?” Hezekiya weelamo ari, “Baboone buli shitweela shishiili muntsu mwase; mbaawo na shitweela sheesi bakhaboone ta.”

¹⁶Kila Isaaya alomela Hezekiya ari, “Umukasya alikho aloma ari:

¹⁷Bona biifukhu bilikho biitsa, isi ibyo byoosi bibiili muntsu yoowo, ni neebyo byeesi bakuuka boowo baabiikha khukhwoolisa shaleelo, bakhaabisute babiyile mu Babulooni. Umukasya aloma ari mbaawo shishikhaaramewo ta.

¹⁸Ikhaba batweela khu lisaaye lyoowo nabo balibasuta babayile mu bumuli. Baliboomola bekyele babaakaanisi mu lubili lw'omuyiinga uwe Babulooni.”

¹⁹Kila Hezekiya alomela Isaaya ari, “Ilomo y'Omukasya isi ulomile ili indayi.” Khulwekhuuba abe niye alikho elomela mu mwoyo ari, “Kasita itsya khubawo lukoosi ni khukhwiliinda nga ise ishiili umulamu.”

²⁰Bikholwa bibiramire bya Hezekiya nga ali umuyiinga, ni buwuli bweewe, nga ni ombekha kumwaanda kwe kameetsi waakengisa mu shiriimba, byoosi byaronebwa mu Shiitabo shishiilimo Bibyakholikha Khaale bye Bayiinga ba Yuda.

²¹Lwanyuma Hezekiya waafwa baamusiikha khu biliindwa bye bakuuka beewe. Umwaana weewe Manase waamwiilila mu bikyele byeewe nga umuyiinga.