Read lumasaaba 2 Bayiinga 21 Bible Online

2 Bayiinga 21 - lumasaaba bible

2 Bayiinga 21

¹Manase ekyela umuyiinga nga ali ni kimiiko likhumi na kibili. Waawula nga ekhala mu Yerusalemu khuumala kimiiko kamakhumi karaano na kiraano. Maayi weewe abe bari Hefisiba.

²Naye ndi waakhola bibiindu bibikhasangaasa Umukasya ta, nga abiiyika khukhwaama khu manaambo keesi Umukasya aatimisa kaatsya, nga ba Isiraeli bashiili khwoola mu shishiitsa isho ta.

³Wombakha buyaakha binamwiima byeesi abe paapawe Hezekiya aamala khaale khukhwoonakisa. Wombakhila wele Bayaali bibyeeso, naluundi waakhootsa kusiindi kwa wele Ashera, nga Ahabu umuyiinga uwa Isiraeli abe n'akhola. Wesaaya naluundi waakaanisa ba wele ba buli shikuuka shoosi khuungo ikhaba ni be tsinieenieesi.

⁴Wombakha bibyeeso bibiindi mu Liisaayilo Liikhulu, mweesi abe Umukasya aaloma ari, “Mu Yerusalemu lisiina lyase lili ni khukhwiisibwamo lukoosi.”

⁵Wombakhila ba wele babaandi bibyeeso bibili, buli shitweela mu lwaanyi lutweela lwe Liisaayilo Liikhulu.

⁶Wawaamba umwaana weewe waamwoosha nga isaayilo. Wewaambila mu bye khuulakula, bye bulosi, naluundi wereeba khu bafumu. Aakhola bibyoonako biikali naabi, waakila Umukasya lirima lyaamuwaamba.

⁷Wawaamba kusiindi kwe shifwaani sha wele Ashera kweesi umweene aakhootsa, waakura mu Liisaayilo Liikhulu, abe lyeesi Umukasya aalomela Dawudi ni Solomoni ari, “Mu Lisaayilo lino, ni mu Yerusalemu, byeesi ise samweene imalile khuurobora khukhwaama mu bikuuka bya Isiraeli byoosi, kane baantsisaayatsakilemo biilo ni biilo.

⁸Ba Isiraeli ni baba bari baaloondeleele kamakaambila kaase koosi, keesi ise nabawa nibo khuubirira mu Musa, ise singene imbaantsukhe babaruse mu Isiraeli babayile mu bubowe ta.”

⁹Ne babaandu baalekha khuwulila ta. Manase waabakhongelesa khuukhola bibyoonako khuuminyisakho ni byeesi kamanaambo kakaandi koosi keesi Umukasya aanyoowa khukwoonakisa, ni kaakholatsaka.

¹⁰Kila Umukasya akanikha khuubirira mu bakaanisi beewe baŋoosi nga aloma ari,

¹¹“Umuyiinga Manase waakholile bibyoonako biikali naabi, khuuminyisakho ni byeesi babaandu babaanyoowa khuumenya mu liloba ilyo, ba Amori ni baakhola. Wakilile babaandu ba Yuda nabo besaayile bifwaani.

¹²Nashiryo Umukasya Wele wa Isiraeli alikho aloma ari: Bona intsya khureera ingunyi khu Yerusalemu ni khu Yuda, iye kamaani naabi, nga yiyaangisa buli muundu.

¹³Kane ise inaambise shipimo nisho shitweela sheesi naraambisa khu Samariya, mu khukhalila Yerusalemu kumusaango, nga ni nakhola be ntsu ya Ahabu. Kane neeye babaandu mu Yerusalemu, imbamalemo nga umuundu n'asiinga isawaani, waakifumalikha aasi.

¹⁴Ikhaba babaandu baase babaakhaaramewo, ise ndibekaana, imbawaaneyo mu makhono ke baasiku baabwe bababirise buubi.

¹⁵Khulwekhuuba bakholile bibyoonako mu moni tsase, bamaambisile ise lirima, khukhwaamila ilala nga bakuuka baabwe ni baama mu Misiri khukhwoolisa khu shifukhu shino.”

¹⁶Ni khuuminyisila ilala, Manase eeraka babaandu baakali busa mu Yerusalemu yoosi, babaakhalikho ni kumusaango ta. Shino shalooselakho busa khu byoonako byeesi aakila babaandu ba Yuda boosi bakhola mu moni tsy'Omukasya.

¹⁷Ari bikholwa bibiramire bya Manase byoosi, ni bibiindu byeesi aakhola, ni bibyoonako byeewe, byaronebwa mu Shiitabo she Bibyakholikha Biikhale bye Bayiinga ba Yuda.

¹⁸Manase ni aafwa, baamusiikha mu liloba lye mu lubili, mwiiswa lya Uza. Umwaana weewe Amoni waamwiilila mu bikyele byeewe nga umuyiinga.

¹⁹Amoni ekyela umuyiinga nga ali ni kye buukhulu kamakhumi kabili na kibili. Waawula khuumala kimiiko kibili nga ekhala mu Yerusalemu. Lisina lya maayi weewe abe bari Meshulemeti, umukhaana uwa Haruzi, uwaama i Yotiba.

²⁰Naye waakhola bibyoonako mu moni tsy'Omukasya, nga paapawe Manase n'akhola.

²¹Naye webirisila ilala buubi nga paapawe, wesaaya bifwaani nibyo bitweela nga paapawe n'abisaaya.

²²Waantsukha byeesi Umukasya Wele we bakuuka beewe aakana akhole, weebirisa musaambo ikiindi busa.

²³Babaakaanisi ba Amoni babeene baamulyamo luwomelo, baamukhoonya nga ali muntsu mweewe.

²⁴Ne babaandu ba Yuda babeene beera abo babaalyamo umuyiinga luwomelo. Lwanyuma bawaamba Yosiya umwaana weewe, waamwiilila mu bikyele byeewe nga umuyiinga.

²⁵Bikholwa bya Amoni bibiramire byoosi, byaronebwa mu Shiitabo she Bibyakholikha Biikhale bye Bayiinga ba Yuda.

²⁶Baamusiikha mu ŋani yeewe mu liswa lya Uza. Yosiya wekyela umuyiinga uwiilakho.