Read lumasaaba 2 Bayiinga 25 Bible Online

2 Bayiinga 25 - lumasaaba bible

2 Bayiinga 25

¹Nga Zedekiya wolisile kimiiko syeenda mu buwuli, waaminyaalila Nebukaduneeza, umuyiinga wa Babulooni. Uri khu shifukhu shishikhola likhumi mu mweesi kwe likhumi, Nebukaduneza umuyiinga uwa Babulooni tsana yuno weetsa ni liiye lyeewe webotookhelela Yerusalemu. Ibulafu we lumako lwe shiriimba, boombakhayo i kaambi ni bye khuuniinilakho.

²Nashiryo baarama nga bebotokheleele shiriimba, khukhwoolisa nga Zedekiya wawulile khuumala kimiiko likhumi na mutweela.

³Khu shifukhu shikhola syeenda mu mweesi kukuukhola khane mu mwiiko kwe likhumi na mutweela kwe buwuli bwa Zedekiya, intsala iye kamaani yakwawo, nga buli aandu mbaawo biilyo ta.

⁴Kila baselikhale be Babulooni bawumbulakho liitikiiyi, ne umuyiinga Zedekiya ni baselikhale boosi mu shilo isho baatitukha baarura mu shiriimba, nga babirira mu shilibwa shishiili akari e kamatikiiyi. Babirira khu luwaande lwe kumukuunda kw'omuyiinga ikhaba nga ba Babulooni baabawo. Banyololokha baatsya khu luwaande lwe Litila lya Yorudaani.

⁵Ne liiye lye ba Babulooni lyaloonda khu muyiinga Zedekiya, lyamuwaambila i Yeriko, ne baselikhale beewe boosi baasalanilaka busa.

⁶Baryo bawaamba umuyiinga Zedekiya, baamuyila isi Nebukaduneza, umuyiinga uwa Babulooni abe uli i Ribula. Ibweene iyo baamukhalila kumusaango.

⁷Beera babaana ba Zedekiya nga umweene abona, baamutomolakamo tsimoni tseewe, baamubowa kiminyololo kya buroonzi, baamuyila i Babulooni.

⁸Khu shifukhu she kumusaafu mu mweesi kukuukhola kharaano, mu mwiiko kwe likhumi na syeenda kwe buwuli bwa Nebukaduneza, Nebuzaradani, nga abe niye umuraangilisi uwe liye lya Babulooni, woola mu Yerusalemu.

⁹Woosha Liisaayilo Liikhulu, ni lubili lw'omuyiinga ni tsintsu tsyoosi mu Yerusalemu. Woosha tsintsu tsindayi tsyoosi mu shiriimba.

¹⁰Liiye lye ba Babulooni lilyaba ni naye lyafuniaaka kutikiiyi abe kukwebotookhelela Yerusalemu.

¹¹Nebuzaradani umuraangilisi uwe liiye, wawaamba babaandu babaarama mu shiriimba boosi, ni naabo babaatitukha beyuunga khu muyiinga uwa Babulooni, nga waareerekho ni babaandu babaandi baakali, boosi waabayila mu bubowe.

¹²Ne waalekhayo mu Yuda abo babaaba baminyisakho butaambi, baarama khu khwaaka kimizabibu ni khuulima kimikuunda.

¹³Kimisiindi kya buroonzi, ni kimikhoondi kya buroonzi abe bibiili mu Liisaayilo Liikhulu, ba Babulooni baabifuniaakamo bisiintsa, baabisuta baatsya ni nabyo.

¹⁴Naluundi baasuta tsisoongwe, bitiiyo bibiyoola liiloba, byeesi baraambisa khuusimisa tsitaala, bipwakhuli bye bubaani, ni bibiindu bya buroonzi byoosi abe bibiraambisibwa mu Liisaayilo Liikhulu.

¹⁵Baasuta ikhaba tsisefuluya, tsisowaani, ni neebyo byoosi abe bibyakholebwa mu zaabu ni mu feetsa.

¹⁶Ne aabawo kimisiindi kibili kyeesi abe umuyiinga Solomoni aabuumba kya buroonzi nga kili mu Liisaayilo Liikhulu, kyaba nga kimisiro naabi.

¹⁷Abe buli kusiindi kwoolisa tsifuuti kabili na musaafu buuleeyi, nga barukhilakho buubeya bwa buroonzi bibiindi khuukibotokhelesa.

¹⁸Umukhulu uwe liiye uyo waayila umusaayi umukhulu Seraya, n'umuloondakho bari Zefaniya, ni babaandu bataru abe babaliinda khu mulyaango.

¹⁹Weloosela waayila umuraangilisi uwe liiye abe liliili mu shiriimba, ni babaandu baraano abe babaali khu lukhobo lw'omuyiinga; n'umuroni uw'omuraangilisi uwe liiye lya Yuda, nga niye uwingisa babaandu mu maye; ni baselikhale babaandi kamakhumi kasesaba babaaramakho beesi banyoola mu shiriimba.

²⁰Abo boosi Nebuzaradani wabayila i Ribula, isi umuyiinga uwa Babulooni abe ali.

²¹Nga boolile i Ribula, mu shisiintsa she Hamasi, umuyiinga uwa Babulooni Nebukaduneeza waabeera boosi. Nashiryo babaandu be mu Yuda baasiindikhibwa mu bubowe, mu liloba lilikhali lilyaabwe ta.

²²Umuyiinga Nebukaduneza waarobora Gedaliya, umwaana wa Ahikamu, naluundi umwitsukhulu uwa Shafani, khuuba umuwuli we babaandu babaarama mu Yuda.

²³Ari baaraangilisi be kamaye babaaramire ni baawulila bari umuyiinga uwa Babulooni waaroboore Gedaliya nga umuwuli, baatsya ni kamaye kaabwe i Mizipa, isi aaba. Mu baandu bano mwabamo Ishimayili umwaana uwa Nesaniya, Yohanani umwaana uwa Kareya, Serayiya umwaana uwa Tanihumesi uwaama i Netofa, ni Yazaniya abe uwaama i Maaka.

²⁴Gedaliya waabetsubila nga abaloma ari, bakharya ba Babulooni ta. Waabalomela ari bamenye mu lukoosi nga bafukiilisa umuyiinga uwa Babulooni khuuba umuwuli waabwe, ari singene ibewo buwaangafu bwoosi ta.

²⁵Ne lwanyuma lwe kimyeesi musaafu, Ishimayili umwaana uwa Nesaniya, naluundi umwitsukhulu uwa Elishama, nga be mu shikuuka sh'omuyiinga, waatsya ni babaandu likhumi webwakala Gedaliya waamwiira. Weera ni Bayudaaya ni ba Babulooni abe babaali i Mizipa.

²⁶Shino shaakila babaandu boosi, khukhwaamila khu we aasi khukhwoolisa khu be angaaki, ni baaraangilisi be kamaye, boosi benyukha belukhila i Misiri; khulwe khuurya ba Babulooni.

²⁷Nga Yehoyakini waamalile kimiiko kamakhumi kataru na musaafu mu bubowe, Evili-Merodaki wekyela umuyiinga mu Babulooni. Khu shifukhu she kamakhumi kabili na musaafu, mu mweesi kwe likhumi na kibili, kumwiiko kweesi aarakikhilamo khuuwula, wawaambila Yehoyakini shiisa waamulekhuula.

²⁸Waabirisa Yehoyakini buulayi, naluundi waamuniinisa angaaki khuumiinyisakho bayiinga babaandi babaaramire abe babaali mu bubowe mu Babulooni.

²⁹Nashiryo Yehoyakini weyabula bikwaaro bye buubowe. Waalyatsaka biilyo atweela n'umuyiinga.

³⁰Umuyiinga uwa Babulooni waalakila ari bamuwatsake tsinusu tseesi ali ni khuuraambisa khukhwoolisa n'alifwa.