Read lumasaaba 2 Bayiinga 3 Bible Online

2 Bayiinga 3 - lumasaaba bible

2 Bayiinga 3

¹Mu mwiiko kweesi Yehoshafati aamalila kimiiko likhumi na shinaane nga ali umuyiinga wa Yuda, Yolamu umusooleli wa Ahabu, weekyela umuyiinga wa Isiraeli. Aawula khuumala kimiiko likhumi na kibili, nga amenya i Samariya.

²Yolamu waaminyaalila Umukasya, waakhola bibiindu bibikhali biilayi ta. Niye uwaminiangulaka shibuumbe sheesi paapawe aabuumba she khukhwisaaya ba wele babaandi, nashiryo niye s'aba umwoonaki naabi nga basaali beewe ta.

³Ne shitweela busa eloosela khuukhola bye bubwoonaki byeesi Yerobowamu, umwaana uwa Nebati aaleekela ba Isiraeli khuukhola.[1]

⁴Abe yaamala khuubirawo imbuka ingali nga shibala sha Mowabu shiwulibwa ni Isiraeli, nga shili ni khuuwayo kumusolo isi bayiinga ba Isiraeli. Umuyiinga Mesha uwa Mowabu abe ali umubayi we kamasheese, ni nashiryo abe asasula kumusolo kuno nga awaanayo kamasheese kamaana kumweeka mutweela (100,000), ni bubwooya bweesi babekile khu mamiiku kumweeka mutweela (100,000).

⁵Ne lwanyuma lwe khuufwa khwa Ahabu, Mesha waaminyaalila ba Isiraeli.

⁶Nashiryo, shifukhu shitweela umuyiinga Yolamu waarura i Samariya, waatsya nga abusaasa liiye lya Isiraeli lyoosi.

⁷Kila arumanisa buurume isi Yehoshafati umuyiinga uwa Yuda nga buloma buri, “Umuyiinga uwa Mowabu waaminyaalile ise; iwe unyala waanjeeta mu khumusoolanisa?” Yehoshafati welamo ari, “Kane ikhuyeete. Iwe ni nase khuli shiindu shitweela. Ise ndi atweela ni nawe, ikhaba basilikhale baase ni tsiŋwaaŋwa tsase byoosi bili bibyoowo.”

⁸Ne wereeba ari, “Ne kane khwaamile khu luwaande shiina?” Yolamu welamo ari, “Kane khwaamile luwaande lwe kumubiimbi kwa Edomu.”

⁹Nashiryo Yolamu, ni Yehoshafati, atweela n'umuyiinga uwa Edomu, baraangilila kamaye kaabwe baatsya khukhwibwakala. Ne lwanyuma lwe biifukhu musaafu, alekha khubawo kameetsi ke babaandu namwe bisolo khuunywa ta.

¹⁰Shino shaakila umuyiinga Yolamu uwa Isiraeli waaloma ari, “Nga shiibi! Umukasya waakhureerire ifwe ano, ari nio khuwaanibweyo mu makhono ke liiye lye ba Mowabu?”

¹¹Kila Yehoshafati areeba ari, “Ano sikhulikho n'umuŋoosi w'Omukasya, isi ifwe khunyala khwereebakho sheesi Umukasya akana ifwe khukhole ta?” Kila mutweela khu baaraangilisi mu liiye lya Yolamu aloma ari, “Elisha umwaana uwa Shafati, ali ano ni nafwe. Ali mutweela khuubo babaaraambila atweela ni Eliya.”

¹²Yehoshafati welamo ari, “Uyo anyala waakhuwa ifwe buurume khukhwaama isi Umukasya.” Baryo bayiinga bataru bano baatsya isi Elisha.

¹³Elisha waareeba Yolamu ari, “Shiina kila mwiitsile isi ise? Ni mutsye isi baŋoosi be bawele be kamanaambo kakaandi, beesi basaali beenywe besaayatsaka.”[2] Kila Yolamu naye elamo ari, “Sishinyalikha ta, khulwekhuuba Umukasya niye ukhureerire ifwe ano, ari liiye lye ba Mowabu likhuwaambe ifwe fweesi.”

¹⁴Elisha waamwiilamo ari, “Ise ndi umuŋoosi uwa Wele, umunyali uwa byoosi. Ne imbetsubila indi ilekha khuba khulwa Yehoshafati, umuyiinga uwa Yuda isi ise nisamo lukoosi, khali ise simbalolileyo namwe khali simbayeetile ta.

¹⁵Ni mundeerere umuundu unyala khuukhupa lituungu.” Uyo n'arakikha khuukhupa lituungu, kamaani k'Omukasya keekha khu Elisha waafuna buurume.

¹⁶Waaloma ari, “Umukasya alikho aloma ari, kane awaambe tsintsitsi tsitsooma, atsikelisemo kamatibo ke kameetsi.

¹⁷Umukasya aloma ari inywe singene mubonekho ifula namwe imbewo ta, ne tsintsitsi tsitsamala khukhwooma tsinetsusibwa ni kameetsi, nio inywe ni bisolo byeenywe munyalise khuunywa.

¹⁸Isho shili shishiindu shishaangu naabi isi Umukasya, naluundi kane abawe inywe kamaani ke khuuwula ba Mowabu.

¹⁹Kane inywe muwaambe biriimba byaabwe byoosi, byeesi baabotokhelesa ni kamatikiiyi, ni nebyo bibiili bikhulu. Inywe mukhaareme kimisaala kyoosi kikiili kimilayi, mwoonakise tsisebele tsaabwe tsoosi, naluundi mwoonakise liiloba lyaabwe lilyaama biilyo naabi ilyo, nga mulibiimbilila ni kamabaale.”

²⁰Ni bwasha kumutishinyi khu shifukhu shisheelakho, nga imbuka iye khuuwaanayo isaayilo yoolile, khaangukho kameetsi kaarakikha khukhwiikha nga kaamila khu luwaande lwe Edomu, kaasalasala shibala shoosi.

²¹Nga bino bishiili biryo, abe ba Mowabu baawuliile bari bayiinga bataru balikho beetsa khu bebwakala. Abe baabuusanisile basoolani baabwe, khukhwaamila khu bahele khukhwoolela ilala khu baasakhalu. Abe basoolani bano beemikhile khu lwaakha, nga bali berekefu khusoolana.

²²Kumutishinyi ukwo liiye lye ba Mowabu ni lyaasisimukha, lyaabona nga inyaanga yakhoseleele khu meetsi, nga kalikho kabonekha kamabesemu nga kamafuki.

²³Kila baloma bari, “Bona kamafuki ako! Kamaye ke bayiinga abo kali ni khuuba nga kasoolane keranire kameene. Ni mubire khutsye khunuule byeesi balekhile.”

²⁴Ne ni boola mu kaambi iye ba Isiraeli, liiye lye ba Isiraeli lyenyukha lyabebwakala, khukhwoolisa ni batitukha baatsya. Ba Isiraeli beloosela khubatimisa nga beera ba Mowabu.

²⁵Ba Isiraeli bawaamba naluundi boonakisa biriimba bye ba Mowabu. Baaremaka kimisaala kimilayi kyoosi, naluundi boonakisa tsisebele tsaabwe tsyoosi. Bamwaata kamabaale khu buli liiloba liilayi lyoosi, khukhwoolisa liloba lyaabwe liilayi lyoosi ni lyeetsula kamabaale konyene. Ikhumaliilisa, shiriimba she Kiri-Haresesi shonyene shisharama nga sibashoonakisile ta. Ne shitweela busa basilikhale nga bawaambile kamabaale baashibotookhelela, baashibwakala, khukhwoolisa ni baashiwaamba.

²⁶Umuyiinga Mesha uwa Mowabu n'abona ari bakana khumufuura mu busoolo, wawaamba basilikhale beewe bitoondo musaafu (700), nga buli mutweela ali ni lurima, baatsya nga bakana babirire isi baselikhale ba Edomu baabuusanila. Ne baalekha khunyalisa ta.

²⁷Lwanyuma waabukula umwaana weewe umusiinde abe ukhaamusikhile mu bikele byeewe nga umuyiinga, waamura khu litikiiyi lye shiriimba, waamuwaanayo nga isaayilo intsoshe. Shino shareera naabi lirima mu maye ke ba Isiraeli, waakila baantsukha shiriimba beelayo ingo waabwe.