Read lumasaaba 2 Bayiinga 6 Bible Online

2 Bayiinga 6 - lumasaaba bible

2 Bayiinga 6

¹Shifukhu shitweela baŋoosi babekhala ni Elisha bamulomela bari, “Bona shiifwo sheesi ifwe khwaakaananamo ni nawe shili shifwiiti.

²Lwashiina kila khukheekha khu luutsi Yorudaani, buli mutweela waaremayo kuusaala, khunyalise khukhwombekhayo shiifwo shibalaayi?” Elisha waabeelamo ari, “Ni mukhole nga ni mulomile.”

³Kila mutweela khu baŋoosi amulomela ari, “Shaandibeele shilayi iwe khuutsya ni nafwe.” Elisha weelamo ari, “Khayo khutsye.”

⁴Ni nashiryo Elisha waatsya ni nabo. Ni boola khu luutsi Yorudaani, baarakikha khuurema kimisaala.

⁵Ne mutweela khu baŋoosi n'aba nga arema kuusaala, iyaywa yeewe yaakhukhamwo, yaakwa mu meetsi. Khaangukho waalila ari, “Oyaaya! Musakhulu, iyaywa yabeene! Ingisabile busa, shiili iyase ta!”

⁶Elisha waamureeba ari, “Ikwiile ali?” Nga wookesile Elisha abweene isi yakwa, kila afuna khasaala, waakhamwaatawo, shino shaakila iyaywa yaakyelakyela khu meetsi.

⁷Elisha waamulomela ari, “Kibukule.” Kila umuŋoosi uyo atsaanusa kumukhono waakibukula.

⁸Abe buli muluundi nga umuyiinga uwa Siriya akana khukhwibwakala linaambo lya Isiraeli, abe akaananamo ni naabo babaamuwa khu makhula, nga ababoolela ari, “Kumuluundi kuno ise naakhalilewo ndi kane khure ikaambi yeefwe mu shifwo nabulebe.”

⁹Ne abe buli kumuluundi, Elisha areewura umuyiinga uwa Isiraeli nga aloma ari, “Ukhabirira mu shifwo nabulebe ta. Khulwekhuuba liiye lye ba Siriya lyebuulile ibweene iyo.”

¹⁰Nashiryo abe umuyiinga wa Isiraeli asiindikha buurume isi liiye lya Isiraeli liliili mu shifwo umwo khuuba lilirekefu.

¹¹Umuyiinga wa Siriya n'amanya shishiili khuukholekha kila akhalala naabi. Kila alaanga baaraangilisi be liiye lyeewe, waabareeba ari, “Khusi inywe, naanu niye uboolela umuyiinga uwa Isiraeli tsinengekharengekha tseefwe?”

¹²Mutweela waamukobolamo ari, “Umuyiinga, mbaawo namutweela khusi ifwe ta. Akhali umuŋoosi Elisha uuli mu Isiraeli, niye uwikhala aboolela umuyiinga uwa Isiraeli byoosi byeesi uba waakanikhiile mu shiseenge mwoowo.”

¹³Umuyiinga waaloma ari, “Ni mutsye mubone isi amenya, khulwekhuuba indi khuukana khuuruma basilikhale bamuwaambe, bamureere ano.” Kila buurume bukobolela umuyiinga nga buloma buri, Elisha amenya i Dosani.

¹⁴Nashiryo waasiindikhayo liiye liikali nga bali khu ŋwaaŋwa ni mu makari; baatsya mu shilo, bebotookhelela shiriimba.

¹⁵Ni bwasha kumutishinyi umuraambi wa Elisha waarura antsye, waabona liiye liikali nga lili ni tsiŋwaaŋwa, ni kamakaari, nga bebotookheleele shiriimba. Kila buuri bumuwaamba, waalomela Elisha ari, “Musakhulu, ifwe kane khukhole khuryeena?”

¹⁶Umuŋoosi waamwiilamo ari, “Iwe ukharya ta. Liiye liliili khu luwaande lulweefwe lili liikali khuuminyisakho lilyaabwe.”

¹⁷Kila Elisha aloomba nga aloma ari, “O Mukasya, naakhuloombile, iwe ni wikule tsimoni tseewe anyalise khuubona.” Aryo Umukasya wekula tsimoni tsy'omuraambi, waabona. Abe khu lukiingi khwoosi khwetsuule tsiŋwaaŋwa ni kamakaali bye kumulilo nga byebotookheleele Elisha.

¹⁸Nga liiye lye ba Siriya lyesyeendile aambi ni Elisha, kila aloomba ari, “Mukasya, naakhuloombile, khali baselikhale bano boosi bafwiile tsimoni baba baabofu.” Aryo Umukasya waabeera boosi tsimoni, bekyela baabofu, nga Elisha n'aloomba.

¹⁹Kila Elisha alomela baasiku bano ari, “Mwaakoraanile intsila, naluundi shiriimba sishili nisho shino ta. Nimunoondekho, ise kane imbalakane umuundu isi mulikho muweentsa.”

²⁰Nga liiye lye baasiku bano lyaamalile khukhwiingila mu shiriimba she Samariya, kila Elisha aloomba ari, “O Mukasya, ni wikule tsimoni tsye babaandu bano, nio banyale khuubona luundi.” Aryo Umukasya wekula tsimoni tsaabwe baabona; benyoola nga beemikhile mukari mwe shiriimba she Samariya.

²¹Umuyiinga wa Isiraeli n'ababona waalomela Elisha ari, “Musakhulu, ari imbakhoonye? Imbakhoonye imbamalewo?”

²²Elisha waamwiilamo ari, “Taawe, singene ubakhoonye ta. Ubakhoonya, ubawaambiile mu busoolo? Akhali ndi iwe n'ubawe busa biilyo balye, ni she khunywa banywe, ubalekhe bakoboleyo isi umuyiinga waabwe.”

²³Nashiryo umuyiinga waabakholela kamayiiya ke kamaani kameene; ni baamala khuulya ni khuunywa, wabalekha beelayo isi umuyiinga waabwe. Khukhwaamila awo, ba Siriya balekhelawo khuutsya khunuula mu Isiraeli.

²⁴Nga abirirewo imbuka, umuyiinga Benihadadi uwa Siriya waabusaasa liiye lyeewe lyoosi, waatsya khukhwibwakala Samariya.

²⁵Khulwe imbuka isi baamala nga baayibotokhelela Samariya, intsala yakwawo iye kamaani nga mbaawo she khuulya mu shiriimba ta. Khukhwoolisa kumurwe kwe sikilya baakukulisa ikilo ndweela iy'efeetsa. N'ipwakhuli iye kamasilyokokho ke liwuusi[5] baakakulisa shisiintsa she kilo iy'efeetsa.

²⁶Shifukhu shitweela nga umuyiinga uwa Isiraeli alikho abira aambi ni liitikiiyi lye shiriimba, waawulila umukhasi nga alila, nga aloma ari, “Naakhwikoontseleele, uwe shiriifwa, n'unjeete!”

²⁷Kila umuyiinga amukobolamo ari, “Khayo Umukasya akhuyeete. Iwe wambaasa uri ise inyala khuukhuwa biilyo namwe iviini?”

²⁸Ne lwanyuma kila umuyiinga areeba umukhasi uyo ari, “Buwaangafu shiina bweesi abe uli ni nabwo?” Umukhasi weelamo ari, “Iseese n'umukhasi washaase, intsala yakhuliile naabi, khuryo khwaafukiilisana khuulya babaana beefwe. Umukhasi yuno waanomela ise ari nga khwaanyooyile khuulya uwase shaleelo, shifukhu shishiilakho khulya uweewe.

²⁹Nashiryo khwaateekha uwase khwaamulya. Ari shifukhu shisheelakho ise ni naamuloma ndi reera umwaana woowo khumuteekhe khumulye, niye waabisa uweewe.”

³⁰Umuyiinga n'awulila bilomo bino, khulwe kumutaambo kumukali, wonuulaka bikwaaro byeewe. Isaambo isi aaba nga ali khu kutikiiyi khu ngaaki, babaandu baabona bari, khana mukari abe waakwaariremo isawu iya makoongwe.

³¹Kila aloma ari, “Khali Umukasya ambeele ise shitaambiso shishiiminyisila ilala, noola kumukaamba khukhwoola inyaanga nga yino iri, nga Elisha ashiili umulamu.”

³²Kila umuyiinga arumana umuundu khuutsya wa Elisha. Imbuka iyo Elisha aaba abe ali ingo weewe, nga ali ni baaraangilisi ba Isiraeli bekhaale ni naye. Ne nga umurume uyo nga ashiili khukhwoola ta, Elisha waabaloma ari, “Umwiiri uyo waarumaane umuundu khuuremakho kumurwe kwase. Nga mwaaboone umuundu eetsa, yikalawo lulwiitsi mukhomekhelewo ilala, alekhe khukhwiingila muno ta. Khulwekhuuba umuyiinga umweene, aneetsa nga waamuloondilekho.”

³³Nga Elisha ashiili khukhala ni kumunwa ta, umurume woola, kila amulomela ari, “Biwaangafu bibikhwoolilekho bino byaamile isi Umukasya. Shiina kila ise iniinda, nga nambaasa ndi kane Umukasya akhuyeete ifwe khu mbuka yino?”