Read lumasaaba 2 Bayiinga 7 Bible Online

2 Bayiinga 7 - lumasaaba bible

2 Bayiinga 7

¹Ne Elisha waamwiilamo ari, “Umukasya ali khusuubisa ari, kumukaamba khu mbuka nga yino iri, mu Samariya muno, isaawu imboofu iye buufu, namwe tsisawu tsibili tsye ŋaano, bikhaakule ibeeyi ifwiiti naabi.”

²Kila mutweela khu baaraangilisi be liiye, abe uli n'umuyiinga waaloma ari, “Abe ikhaba bari Umukasya akhaasiindikhe ifula iye kamaani, iyo sinyala yaakila biilyo byasala kumukaamba ta.”

³Ari khu mbuka iyo, aambi ni shilibwa shishiingila mu Samariya, abe iliwo basaani bane nga bali ni bikeenge. Kila bereeba bonyene bari, “Shiina kila khwikhala ano khukhwoolisa ni khufwa?

⁴Abe khwakhaloma khuri khutsye mu shiriimba, intsala ilimo, khuryo khutsya khufwa. Ni khuloma khuri khwikhale ano, shitweela busa khutsya khufwa. Shiina kila khukhatsya mu kaambi iye ba Siriya; nga baakhulekhile khuuba baalamu, khubeeyo, ne nga baakhwiirire, shitweela busa khuba khwaafwiile.”

⁵Nashiryo isi antsye bwilabulila basaani bano bane benyukha baatsya mu kaambi iye ba Siriya. Ne ni boola khu ndulo khw'ekaambi iye ba Siriya, baanyoola nga mbaawo umuundu yeesi ta.

⁶Khulwekhuuba ba Siriya baaba baawuliile shishaba ni likono nga lye kamakaali, ni tsiŋwaaŋwa, ni liiye liikali lilyeene. Kila baloma bari, “Mwaamanyile, umuyiinga uwa Isiraeli waapaangisile kamaye ke ba Hiiti ni ba Misiri, khukhwiitsa khuukhuluumba ifwe.”

⁷Nashiryo nga antsye bwilabula, baatitukha baatsya, beebilila tsiweema tsaabwe, ni tsiŋwaaŋwa, ni tsisikilya. Baatima baalekha busa ikaambi nga ili busa, nga bakana khuwonesa buulamu bwaabwe.

⁸Basaani bane be bikeenge bano ni boola khu ndulo khw'ekaambi, bengila mu weema ndweela, bekhala aasi baalya naluundi baanywa. Nga baamalile, baasuta ifeetsa n'izaabu, ni bikwaaro, baatsya baabibisa. Kila bakobolayo, baatsya mu weema ikiindi, namwo bayaayamo bibiindu baatsya baabibisa.

⁹Lwanyuma kila belomela babeene bari, “Ifwe sikhulikho khukhola shishiindu shituufu ta. Shaleelo shili shifukhu she kumwikhoyo, ne ifwe mbaawo umuundu yeesi isi khuboolelekho ta? Ni khuloma khuri khuliinde khukhwoolisa antsye bushe, kane khufune shitaambiso. Nashiryo khayo khutsye mu lubili lw'omuyiinga, khubaboolele kamakhuuwa kamalayi kano.”

¹⁰Nashiryo baakobolayo mu Samariya, baakuukuula isi basilikhale babebuula khu shilibwa. Baababoolela bari, “Khwaama khutsya mu kaambi iye ba Siriya, ne mbaamo luswaaki ta, akhali tsiŋwaaŋwa ni tsisikilya tsitsiili tsimbowe. Tsiweema tsoosi tsiliwo busa.”

¹¹Basilikhale bano baayila kamakhuuwa kano muntsu iy'omuyiinga.

¹²Kila umuyiinga enyukha mu bulili, waalomela basilikhale beewe ari, “Ise naamanyile kamakesi keesi ba Siriya balikho bakhukhalila ifwe. Baamanyile bari ifwe khuli mu ntsala, nashiryo baarurire mu kaambi, baatsiile khwiibisa ibulafu, nga bambaasa bari ifwe khunarura khutsye khuuweentsa biilyo. Nio uri khurura, bakhuwaambe ifwe, bakhuyile mu shiriimba shaabwe.”

¹³Kila mutweela khu basilikhale beewe aloma ari, “Khayo basilikhale bayile tsiŋwaaŋwa tsiraano tsitsiramire, batsye mu kaambi iye ba Siriya, babone shiina shishiitsya mu moni. Khulwekhuuba fweesi khutsya khufwa nga basheefwe babaaramire ni baafwa; khayo khubarumane khubone.”

¹⁴Baryo baayila kamakaali kabili; umuyiinga waarumana basilikhale beewe bano khuutsya babone shiina shishikholikhile khu baselikhale ba Siriya.

¹⁵Basilikhale bano baaloonda khu ba Siriya, baatsya khukhwoola khu luutsi Yorudaani. Ne buli isi babira, abe babona bikwaaro ni bye busoolo byeesi ba Siriya baantsukha nga batima batsya mu khaangu. Lwanyuma beelayo baaboolela umuyiinga byeesi baabona.

¹⁶Ni abweenewo, babaandu baatsya mu kaambi ye ba Siriya, baanuula bibyabamo byoosi. Baayila bibiindu biikali naabi khukhwoolisa ni shipimo she buufu buulayi baabukulisa ibeeyi ifwiiti naabi, shaaba busa nga Umukasya n'aloma.

¹⁷Umuyiinga wa Isiraeli abe waarobora mutweela khu basilikhale beewe baakhulu khuuba niye uliinda khu shilibwa. Ne babaandu nga babiraka mu khaangu, baamukhaandakilila khukhwoolisa n'afwa, shaba busa nga Elisha n'ashiloma.

¹⁸Makiboole nga umuyiinga waatsiile ingo wa Elisha, Elisha aamuboolela ari buufu bakhaabukulise ibeeyi iye aasi naabi.

¹⁹Ne umusilikhale umukhulu yuno elamo Elisha ari, “Abe Umukasya akhakhola ifula iye kamaani inyene yaakhupa, shishiindu nga isho seshinyalikha ta.” Elisha waamwiilamo ari, “Wamweene ukhebonelekho, ne s'ukhaalyekho biilyo ibyo ta.”

²⁰Nashiryo, ni shisheene isho nisho shishamukholikhakho, babaandu baamukhaandakilila mu shilibwa waafwa.