Read lumasaaba 2 Bayiinga 8 Bible Online

2 Bayiinga 8 - lumasaaba bible

2 Bayiinga 8

¹Makiboole abe Elisha waaboolela maayi w'omwaana isi niye aalamusa khukhwaama mu khufwa ari, “Umukasya waamalile khaale khuureewula ari intsala itsya khubawo, khuumala kimiiko musaafu. Ni nashiryo iwe ni be mu ntsu mwoowo, ni murure ano mutsye oosi isi kane munyoole.”

²Aryo umukhasi uyo wenyukha, waarurawo waatsya nga ilomo ya Wele ni yaloma. Waatsya ni be mu ntsu mweewe boosi, baatsya bamenya mu liloba lye ba Filisitiya khuumala kimiiko musaafu.

³Nga kimiiko musaafu kino kyaweelekho, umukhasi tsana waarura mu shibala she ba Filisitiya, weelayo iwaabwe. Nga wolileyo, waatsya isi umuyiinga, waamuloomba ari bamukobosele liiswa lyeewe n'intsu yeewe.

⁴Khu mbuka iyo abe umuyiinga alikho akanikha ni Gehazi umwakaanisi w'omuŋoosi, nga alikho amureeba ari amuboolele bye kamakaanga byeesi Elisha aba nga akhola.

⁵Ne Gehazi n'aba nga alikho amuboolela khu musooleli isi Elisha alamusa khukhwaama mu bafu, khaangukho umukhasi umweene n'umwaana weewe tsana boolawo. Kila Gehazi alomela umuyiinga ari, “Musakhulu, umukhasi mweene n'umusooleli weewe nibo babeene bano.”

⁶Umuyiinga n'areeba umukhasi bibiindu bino, naye waamwilwaatsila byoosi nga ni byaba. Kila umuyiinga arobora mutweela khu bakhulu be mu lubili lweewe waamulomela ari, “Uli ni khuubona uri umukhasi yuno bamukobosela bibiindu byeewe byoosi. Ikhaba biilimwa byeesi baalima mu liswa lyeewe khukhwaama nga n'atsya khukhwoolisa ari, bali ni khuumukobosela.”

⁷Lwanyuma lwayo, Elisha waatsya i Damasiko, khuutsya khubona Benihadadi umuyiinga uwa Siriya, uwaba umutsiina. Tsilomo tsoolela Benihadadi bari umuŋoosi ali mu Damasiko.

⁸Umuyiinga waalomela Hazaeli ari, “Suta shiwaanwa utsye ni nasho isi umuŋoosi, umureebe sheesi Umukasya aloma, oba kane butsiina bwase buwole namwe ta.”

⁹Hazaeli nga atsya, waayila bibiindu biilayi naabi nga byetsuule tsiŋamila kamakhumi kane. Ne n'aakanana Elisha, wemikha mu moni tseewe waamulomela ari, “Umwakaanisi woowo, Benihadadi umuyiinga wa Siriya, alikho akhwireebakho khusiiwe bari kane awone butsiina namwe ta?”

¹⁰Elisha waamulomela ari, “Tsya umuboolele uri bari kane awone; ne Umukasya waamalile khaale khukhuuntsokesanisa ari kane afwe.”

¹¹Elisha waalolelela Hazaeli, waamwoomiisilakho tsimoni, khukhwoolisa Hazaeli kamaŋaanyu ni kaamuwaamba. Elisha waarundukha kamasika waarakikha khuulila.

¹²Kila Hazaeli areeba ari, “Musaakhulu, ulikho ulila shiina?” Elisha waamwiilamo ari, “Khulwekhuuba ise namanyile nga inywe mutsya khukhola khu Isiraeli bibiindu biibi naabi. Mutsya khwoosha biriimba byaabwe, naluundi mwiire basoleeli baabwe. Ikhaba babaana bakyeekhe beene mutsya khubeera, ni bakhasi babaali bisoombo mutsya khukhala bisoombo mwiire babaana baali muunda.”

¹³Kila Hazaeli aloma ari, “Ise inyala indyeena nakhola shishiindu nga shino shiri? Ise ndi umwakaanisi busa, ukhalikho ni bunyala bubwoola awo ta.” Elisha waamwiilamo ari, “Hazaeli, ise Umukasya waamalile khaale khukhuuntsokesanisa ari iwe niye utsya khwiilawo khuuba umuyiinga wa Siriya.”

¹⁴Hazaeli welayo waatsya isi umuyiinga Benihadadi. Kila umuyiinga amureeba ari, “Elisha waalomile ari shiina?” Hazaeli weelamo ari, “Bari butsiina bwoowo kane buwone.”

¹⁵Ne shifukhu shisheelakho, Hazaeli waabukula ku bulaangiti kuusiro, waakusanya mu meetsi, kila akuwaamba waabiimbilila Benihadadi mu moni, khukhwoolisa ni aafwa. Lwanyuma lweesho, Hazaeli weekyela umuyiinga.

¹⁶Yehoramu umusooleli wa Yehoshafati, ekela umuyiinga wa Yuda, nga abirirewo kimiiko kiraano, khukhwaama Yolamu ni ekyela umuyiinga uwa Isiraeli.

¹⁷Isi Yehoramu ekyelela umuyiinga, abe ali ni kimiiko kamakhumi kataru na kibili. Waawula khuumala kimiiko shinaane nga ekhala mu Yerusalemu.

¹⁸Yehoramu waaminyaalila Umukasya, waakhola shishoonako. Waayila umukhaana wa Ahabu nga umukhasi weewe, waakila Yehoramu naye waaba umwoonaki nga lisaaye lya Ahabu ni bayiinga ba Isiraeli ni baaba baboonaki.

¹⁹Ne shitweela busa, Umukasya waalekha khukhwoonakisa Yuda ta. Khulwekhuuba abe waasuubisa umwakaanisi weewe Dawudi ari, busheele ilibawo umuundu khukhwaama mu lisaaye lyeewe ulibatsaka umuyiinga wa Yuda.

²⁰Mu biseela byeesi Yeholamu abeela umuyiinga, linaambo lye ba Edomu lyekhalakho khu Yuda, barobora umuyiinga uwaabwe.

²¹Nashiryo Yeholamu wawaamba liiye lyeewe, wenyukha mu shilo baabira intsila iye Zeya, bebwakala ba Edomu, abe babaamalile khuubebotokhelela. Ne ba Edomu baawula liiye lya Yeholamu, kila basilikhale batima baakobolayo ingo.

²²Edomu yekhalilakho ilala khukhwaama khu buwuli bwa Yuda khukhwaamila abweenewo, khukhwoolisa ni shaleelo. Ni mu mbuka niyo ndweela, shiriimba she Libuna nasho shekhalakho.

²³Bibiindu bibiramire byoosi byeesi Yeholamu aakhola nga ali umuyiinga, byaronebwa mu shitabo shishiilimo Bibyaamayo bye Bayiinga ba Yuda.

²⁴Nashiryo nga Yeholamu waafwiile, baamusiikha mu Yerusalemu, khu ŋani tsye bakuuka beewe. Lwanyuma Ahaziya umusooleli weewe wekyela umuyiinga.

²⁵Isi Ahaziya umusooleli wa Yehoramu ekyelela umuyiinga uwa Yuda, abe Yolamu waawulile nga umuyiinga mu Isiraeli khuumala kimiiko likhumi na kibili.

²⁶Ahaziya ekyela umuyiinga nga ali ni kimiiko kamakhumi kabili na mutweela. Waakhola buwuli bweewe khuumala kumwiiko mutweela nga ekhala i Yerusalemu. Maayi weewe abe bari Ataliya, nga aba umwitsukhulu wa Omuri, uwabakho umuyiinga uwa Isiraeli.

²⁷Ahaziya naye webirisa buubi nga be nda iya Ahabu, nga akhola bibyoonako mu moni tsy'Omukasya. Khulwekhuuba abe waayila umukhaana waabwe, naye webirisa nga nibo ni beebirisa.

²⁸Ahaziya wahaambakana ni Yolamu umuyiinga uwa Isiraeli, baatsya bebwakala Hazaeli ni liiye lyeewe lye ba Siriya, nga lili i Ramosi mu Gileyadi. Mu busoolo buno Yolamu aafunilamo khuutsiinisibwa.

²⁹Nashiryo welayo waatsya waalwaalila mu shiriimba she Yezureeli. Nga ali ibweeneyo, Ahaziya waatsya khuumubona, khulwe kamakoontso keesi aaba ni nako.