Read lumasaaba 2 Bayiinga 9 Bible Online

2 Bayiinga 9 - lumasaaba bible

2 Bayiinga 9

¹Shifukhu shitweela, Elisha waalaanga mutweela khu baŋoosi babekhala ni naye waamulomela ari, “Yibowa buulayi, ubukule imuka iye kamafura utsye mu shiriimba she Ramosi, shishiili mu Gileyadi.

²Nga woolileyo, eentsa Yehu umusooleli uwa Yehoshafati naluundi umwitsukhulu uwa Nimushi. Muwaambe umwiise andulo isi munyala mwaaba babili mwenyene.

³Abweenewo, bukula imuka iye kamafura ukamutsukhe khu murwe nga umulomela uri, ‘Umukasya waakhuroboore iwe naluundi waakhuhakhile kamafura kano khuuba umuyiinga uwa Isiraeli.’ Lwanyuma uli ni khuutima khaangu urureyo, ukhaliinda ta.”

⁴Nashiryo umuŋoosi yuno isi Elisha aaloma, wenyukha waatsya i Ramosi.

⁵N'olayo, waanyoola nga baaraangilisi be kamaye bali mu lukhobo lwaabwe. Kila aloma ari, “Umukhulu, indi ni buurume bwoowo.” Kila Yehu amureeba ari, “Bwa naanu umweene?” Umuŋoosi weelamo ari, “Buli bubwoowo.”

⁶Aryo Yehu wenyukha, boombi baatsya mu ntsu mukari. Umuŋoosi waatsukha kamafura khu murwe kweewe nga aloma ari, “Umukasya Wele uwa Isiraeli waakhuhakhile iwe kamafura kano khuukhurobora khuuba umuyiinga uwe babaandu beewe ba Isiraeli.

⁷Umukasya akana wiire babaandu be lisaaye lya Ahabu umuraangilisi woowo. Naluundi uli ni khukhwiira Yezebeli, nga wilihaasa khuufwa khwe baŋoosi baase, ni babaakaanisi baase babaandi.

⁸Buli mutweela uwe seetsa khukhwaama mu ntsu ya Ahabu ali ni khuufwa. Oba bali babasaalikhana mu ntsu umwo, oba bali baakulwa, boosi bali ni khuufwa.

⁹Be muntsu yeewe boosi bali ni khukhwiiribwa babe busa nga be mu ntsu ya Yerobowamu umwaana uwa Nebati, ni be wa Baasha umwaana uwa Ahija, ni beeribwa.

¹⁰Ne Yezebeli uyo, tsiimbwa tsikhaamuliile mu shiriimba she Yezureeli. Sishikhekoombise ni khuumusiikha ta.” Lwanyuma umuŋoosi wekulawo luluutsi, waatima waatsya.

¹¹Yehu n'akobola isi baakhulu be kamaye beesi araangilila, baamureeba bari, “Ikhabawo buwaangafu bwoosi? Umusaani umupeme uyu akhuweentsakho shiina?” Waabeelamo ari, “Ne bari ndi uyo mwaamumanya buulayi, ni saambo isi akanikhamwo.”

¹²Bamwiilamo bari, “Isho sishili shituufu ta. Alomile ari shiina?” Yehu weelamo ari, “Anomeele ari Umukasya waambakhile ise kamafura khukhuundobora ise khuuba umuyiinga uwa Isiraeli utsya khwiilakho.”

¹³Mu khaangu naabi, buli mutweela khu nibo waabulamo ikooti yeewe, batsyaalisa aasi ibweeni wa Yehu. Kila mutweela afuura ikhoombi, baryo boosi baayokesela angaaki nga bakuukuula bari, “Yehu niye umuyiinga!”

¹⁴Nashiryo Yehu umusooleli uwa Yehoshafati, naluundi umwitsukhulu uwa Nimushi, wakholela Yolamu luwomelo. Yolamu ni liiye lyeewe abe bali i Ramosi, shishiili mu Gileyadi, nga bebuliile Hazaeli, umuyiinga uwa Siriya.

¹⁵Ne umuyiinga Yolamu abe waakobola i Yezureeli, khuunyika kamakoontso keesi ba Siriya baamwoolesakho, nga ni aabasoolanisa. Kila Yehu abalomela ari, “Noola shino shili shiryo, mukhalekha umuundu na mutweela khuurura mu shiriimba, waayila kamakhuuwa kano mu Yezureeli ta.”

¹⁶Lwanyuma Yehu waaniina mu likaari lyeewe, waatsya i Yezureeli, khulwekhuuba Yolamu aaba ibweene iyo. Waanyoola nga Ahaziya umuyiinga uwa Yuda, waatsiileyo khuubona Yolamu.

¹⁷Ne umusilikhale we Yezureeli, abe uwiimikhile khu munaala kweesi beemakho bebuulila baasiku, waabona Yehu ni babaandu beewe nga balikho beetsa. Kila akuukuula nga aloma ari, “Ise naboone lituuli lye babaandu nga lilikho liitsa ino.” Kila umuyiinga Yolamu aloma ari, “Ni musiindikheyo umuundu abareebe oba khukhwiitsa khwaabwe khuli khwe lukoosi.”

¹⁸Kila barumanisa umusilikhale mutweela atsya nga atimila khu ŋwaaŋwa. Nga woolileyo kila abareeba ari, “Umuyiinga Yolamu ali khuukana khuumanya oba khukhwiitsa khweenywe khuli khwe lukoosi.” Kila Yehu waamureeba ari, “Iwe shikhuwaambakho shiina? Tsya inyuma wase witubaase khu basilikhale baase babaandi!” Nga abirirewo imbuka, umusilikhale tsana uwibuula khu shisiindi waakobosa buurume ari, “Umusilikhale utsiile atabuule isi bali, ne ise sinaamuboone n'akobola ta.”

¹⁹Kila umuyiinga Yolamu arumana umusilikhale ukuundi naye atsiila khu ŋwaaŋwa. Nga woolileyo waabaloma ari, “Umuyiinga ali khuureeba ari khukhwiitsa khweenywe khuli khwe lukoosi?” Naye Yehu waamukobolamo ari, “Iwe shikhuwaambakho shiina? Tsya inyuma wase, witubaase khu basilikhale baase babaandi!”

²⁰Nga abirirewo imbuka, umusilikhale tsana uwibuula khu shisiindi waakobosa buurume ari, “Umusilikhale utsiile atabuule isi bali, ne ise sinaamuboone n'akobola ta. Ne musaambo isi kamakaali ako kalikho keetsa nga kasuna busa, uyo ali ni khuuba Yehu umwaana wa Nimushi; niye usunisa kamakaali aryo.”

²¹Yolamu waaloma ari, “Ni mundeerere ano likaari lyase.” Kila nga baalireerire, niye ni Ahaziya, buli mutweela wekhala mu likaari lilyeewe, baatimisa khuutsya khukhwakaanana Yehu. Baamwakaanana mu liswa lilyabaatsaka lya Nabosi.

²²Nga Yolamu wakaanaane Yehu, kila amureeba ari, “Yehu, manya khukhwiitsa khuno khuli khwe lukoosi?” Yehu waamukobolamo ari, “Lukoosi shiina lulunyala khuubawo? Khulwekhuuba maayi woowo Yesebeli, wakilile babaandu boosi ari besaaya bifwaani naluundi boosi balakula.”

²³Kila Yolamu akhupa liyoombo nga alomela Ahaziya ari, “Luno luli luwomelo! Ahaziya khayo khurure ano khutsye!” Ne Yolamu n'ashuukha ari atima atsya,

²⁴Yehu waalasa luyiingo lwaamuwunila akari mu mabeka, lwaabirira mu mwoyo, lwaatsya lwaarurira mu shifuba. Waakwa mu shikaari sheewe waafwiila ni mu bweene.

²⁵Yehu waalakila Bidika uwaba mutweela khu basilikhale beewe ari, “Tsya ubukule kumulaambo kweewe ukutuume khu liswa lilyaba lya Nabosi uwe Yezureeli. Ushebulila isi iwe ni nase khwabeela baaliindi ba Ahabu, paapa wa Yolamu? Mu mbuka iyo Umukasya akhola buŋoosi nga aloma ari,

²⁶‘Ilala, ise ni naboone kamafuki ka Nabosi ni ke babaana beewe ingoloobe, nawe ukhaakwe khu liswa lyeene lino.’ Ni nashiryo yila kumulaambo kweewe mukutuume khu liswa ni lilyeene nga Umukasya n'aloma.”

²⁷Nga Ahaziya umuyiinga wa Yuda waaboone bino, waakhakakho khukhwilukhila mu shiriimba she Besi Hagani. Ne Yehu waamuloondakho nga akuukuula ari, “Ikhaba naye mwiire.” Nashiryo naye kamaye ka Yehu kaamulasa buyiingo, nga ali khu musiila kukuutsya i Guri, aambi ni Ibilemu. Ne waatsiila ilala khukhwoolisa i Megido, niyo isi afwiila.

²⁸Basilikhale ba Ahaziya baara kumulaambo kweewe mu likaari, baakuyila i Yerusalemu, baamusiikha atweela ni bakuuka beewe.

²⁹Makiboole, Ahaziya ekyela umuyiinga uwa Yuda nga Yolamu umusooleli uwa Ahabu, waamala mu buwuli kimiiko likhumi na mutweela.

³⁰Yehu wawaamba intsila, waatsya i Yezureeli. Ne Yesebeli uwaba ali i Yezureeli iyo n'awulila shino, weronaka mu moni mweewe, ni litsuune lyeewe, kila esheengela mu lidirisa.

³¹Yehu n'aba nga engila mu shilibwa she shiriimba, Yesebeli waamureeba ari, “Iwe uli umwiiri nga Zimuri![6] Unyala uryeena weera umuyiinga woowo? Ulikho ukana shiina ano?”

³²Kila Yehu enyusa tsimoni alola she dirisa tsana, waareeba ari, “Naanu khus'inywe uli khu luwaande lwase?” Basaani babomole babili namwe bataru benyusa kimirwe kyaabwe angaaki baamulolayo.

³³Kila Yehu abalomela ari, “Mukholowele mu lidirisa akwe antsye aasi ano!” Baryo bamukholowa waakwa aasi, ni kamafuki keewe kamalala kaasalanila khu litikiiyi ni khu ŋwaaŋwa, tsitsaba tsili khuukhaandakilila kumulaambo kweewe.

³⁴Lwanyuma Yehu waatsya mu ntsu baamuwa biilyo ni she khuunywa. Kila alomela baraambi ari, “Ikhaba nga abe umukhasi yuno ali umubi naabi, ne abe ali umukhaana w'omuyiinga. Nashiryo muli ni khuumusiikha ni lukoosi.”

³⁵Ne ni baatsya bari bayile kumulaambo basiikhe, baanyoola shihaanga, ni kamakhono, ni bikele byonyene.

³⁶Ni beelayo khuuboolela Yehu bino, kila aloma ari, “Shino shaakholikhile nga Umukasya n'akanikha khuubirira mu muŋoosi Eliya, nga aloma ari, ‘Kumulaambo kwa Yesebeli, tsiimbwa tsikhaakuliile ano mu Yezureeli mu bweene.

³⁷Ni kamakuumba keewe kalisalanila busa, kabe nga mboleha, khaba ilekhe khubawo umanya kumulaambo kweewe ta.’ ”