Read lumasaaba 1 Bye Kimiboolo 10 Bible Online

1 Bye Kimiboolo 10 - lumasaaba bible

1 Bye Kimiboolo 10

¹Ba Filisitiya baasoolana ni ba Isiraeli, ne ba Isiraeli baatima baarura mu busoolo, shaakila ba Isiraeli baakali beeribwira khu lukiingi lwe Gilubowa.

²Ba Filisitiya baafuura Saulo ni babaana beewe. Kila beera Yonasani, Abinadabu, ni Malikisuwa, nga boosi bali babaana ba Saulo.

³Buusoolo bweengilila naabi Saulo, kila babaalasa buyiingo baamubona, baamulasa buyiingo, waatsiinisibwa naabi.

⁴Kila Saulo alomela uyo abe umusutila bye busoolo ari, “Bukula lurima lwoowo untsikube, untsire. Khulwekhuuba singana babaakheengila imbalu abo khukhwiitsa ano baswaatse ise ta.” Ne uyo uwasutatsaka bye busoolo bya Saulo walekha khushikhola ta, nga wariire naabi. Nashiryo Saulo umweene waabukula lurima lweewe waalwisikikhakho.

⁵Uyo uwasutatsaka bye busoolo n'abona nga Saulo waafwiile, naye weesikikha khu lurima lweewe, naye waafwa.

⁶Nashiryo Saulo waafwa, atweela ni babaana beewe bataru, ni be muungo mweewe boosi.

⁷Basilikhale be ba Isiraeli babaaba mu litila ni baabona bari liiye lyaabwe lyaatitukhile, naluundi bari Saulo ni babaana beewe baafwiile, baryo baantsukha biriimba byaabwe, baatitukha baatsya. Lwanyuma ba Filisitiya baatsya baabimenyamo.

⁸Khu shifukhu shisheelakho, ba Filisitiya ni baatsya khufuula kimilaambo kye babeeriibwile, baanyoola kumulaambo kwa Saulo ni kye babaana beewe nga kyaakwiile khu lukiingi Gilubowa.

⁹Kila bafuula Saulo, baamuremakho ni kumurwe baakuyila, atweela ni bye busoolo byeewe. Kila basiindikha baarume mu Filisitiya mwoosi khuuyila kamakhuuwa ako isi babaandu boosi, ni isi ba wele abe beesi besaaya.

¹⁰Kila bawaamba bye busoolo byeewe, baabira mu namwiima uwa wele waabwe, baasuunga kumurwe kweewe mu namwiima uwa Dagoni, wele waabwe.

¹¹Babekhali be mu Yabeshi Gileyadi ni baawulila sheesi ba Filisitiya baakhola khu Saulo,

¹²basaani baanyindaalifu boosi benyukha aasi, baatsya baabukula kumulaambo kwa Saulo ni kye babaana beewe, baakiyila mu Yabeshi. Kila bakisiikha mu Yabeshi aasi we kuusaala kumuruumba, lwanyuma baabuya intsala khuumala biifukhu musaafu.

¹³Nashiryo Saulo waafwa khulwekhuulekha khuuba umwiyikinwa ta; s'aba umwiyikinwa isi Umukasya mu khuuloondelela kamakaambila keewe ta. Naluundi aatsya wereeba khu muundu ulakula, nga aweentsa kamakhula,

¹⁴mushifwo she khukhwireeba isi Umukasya. Ni nashiryo Umukasya waakila Saulo waafwa, waabukula buyiinga waabuwa Dawudi, umwaana uwa Yese.