Read lumasaaba 1 Bye Kimiboolo 11 Bible Online

1 Bye Kimiboolo 11 - lumasaaba bible

1 Bye Kimiboolo 11

¹Lwanyuma ba Isiraeli boosi baabuusana, baatsya i Heburoni isi Dawudi, baamuloma bari, “Bona, ifwe khuli baalebe boowo babeene.

²Amataayiko nga Saulo ashiili umuyiinga, abe iwe niye uraangilila ba Isiraeli khuutsya mu busoolo. Umukasya Wele woowo waakhulomela iwe ari, ‘Iwe niye ukhaaraangirire babaandu baase naluundi iwe niye uliba umuwuli waabwe.’ ”

³Nashiryo baaraangilisi be ba Isiraeli boosi baatsya i Heburoni isi umuyiinga Dawudi. Dawudi waakhola ni nabo indakaano mu moni tsy'Omukasya. Kila bamuwakha kamafura kakaamubiita waaba umuyiinga uwa Isiraeli, shaba nga Umukasya n'ashiloma nga abirira mu muŋoosi Samweli.

⁴Dawudi waaraangilila ba Isiraeli boosi baatsya bebwaakala shiriimba Yerusalemu. Mu mbuka iyo abe bashilaanga bari Yebusi, nga ba Yebusi, abe nibo babaamenya mu liloba ilyo, nibo abe babaashimenyamo.

⁵Kila babekhali be mu Yebusi balomela Dawudi bari, “S'ukane wingile mu shiriimba muno ta.” Ne shitweela busa Dawudi wawaamba shiriimba sha Sayuuni, sheesi baaba batseeta ni kamaani, shekela Shiriimba sha Dawudi.

⁶Dawudi waaloma ari, “Umusilikhale ukane anyoowe khukhwiira ba Yebusi, kane abe niye umukhulu naluundi umuraangilisi uwe liiye lyase.” Kila Yowabu umusooleli uwa Zeruya waaba niye uwanyoowa khukhwibwaakala, niye wekela umuraangilisi uwe liiye.

⁷Dawudi waatsya waamenya mu lumako ulwo; nashiryo shalaangibwa shiri shiriimba sha Dawudi.

⁸Wombakha shiriimba isho bushaakha khu mbeka tsyoosi, khuurakikhila mu shifwo shishibamo liloba khulwe khukhwiliinda, nga shilaangibwa shiri Milo. Yowabu wombekha bushaakha bisiintsa bibiramire bye shiriimba.

⁹Dawudi waatsya nga eloosela busa kamaani, khulwekhuuba Umukasya uwe kamaani, abe ali ni naye.

¹⁰Bano nibo babaaba basaani baakhulu, be kamaani, baanyiindalifu beesi Dawudi aaba ni nabo. Bano nibo babaamuwa kamaani mu buyiinga bweewe, atweela ni ba Isiraeli boosi, waakila baamwikesa niye khuuba umuyiinga, khuuloondekhana ni lomo y'Omukasya iwaamba khu Isiraeli.

¹¹Basaani be kamaani beesi Dawudi aaba ni nabo nibo bano: Yesobeyamu, nga ali Umuhakimoni, niye uwaba umuraangilisi we Baataru. Shifukhu shitweela waabukula lifumo lyeewe waasoolanisa basaani bitoondo bitaru, waabeera boosi.

¹²Mu Bataru bano be kamaani, umuloondelakho abe bari Eliyazari, umusooleli uwa Dodo, uwaba umu Ahohi.

¹³Oyuno aaba ni Dawudi i Pasidamimu, lweesi ba Filisitiya baabuusanila khuubebwakala. Yaba baakholile luwomelo baabebuliile mu mikuunda kya sayiri, kila ba Isiraeli batitukha beelayo iwaabwe.

¹⁴Ne Eliyazari ni basoolani beewe beema mu mukuunda akari, baakutseeta, kila beera ba Filisitiya. Khu shifukhu isho Umukasya waabayeeta baafuura busoolo bwe kamaani.

¹⁵Lutweela Baataru tsana nga nibo baaraangilisi be kamakhumi kataru beekha, baatsya mu lifuluma lye Adulamu, isi abe Dawudi ali. Abe liiye lye ba Filisitiya lyaabuusaniile mu Litila lye Refayimu.

¹⁶Mu mbuka iyo Dawudi aaba nga ali mu kumako kwe kamaani, ne nga ba Filisitiya kamaye bakabuusiile i Beselehemu.

¹⁷Kila Dawudi aloma ni khukhwikoomba khuukali ari, “Abe uri ikhabawo umuundu ukhureerera kameetsi ke khuunywa khukhwaama mu luutsi lwe Beselehemu, luluuli aambi ni shilibwa ku!”

¹⁸Kila baselikhale baanyindalifu tsana Bataru baahatuna khuubirira mu kaambi iye ba Filisitiya, baataha kameetsi khukhwaama mu sebele iye Beselehemu abe iili aambi ni shilibwa, baakayilila Dawudi. Ne Dawudi waalekha khukanywa ta, waakatsukha aasi nga shishiwaanibwayo isi Umukasya.

¹⁹Kila aloma ari, “Wele wase khali s'afukiilisile ise inywa kameetsi kano ta, khulwekhuuba shili busa nga khuunywa kamafuki ke basaani bano babewaanileyo buulamu bwaabwe khuutsya khuukareera.” Ni nashiryo waalekha khukanywa ta. Bino nibyo bibiindu bye bunyindaalifu byeesi basaani Bataru bano be kamaani baakhola.

²⁰Ari, Abishayi waandaaye uwa Yowabu abe niye umuraangilisi we “Kamakhumi Kataru babaafumisibwa naabi.” Lutweela aawaamba lifumo lyeewe waasoolanisa naluundi weera basaani bitoondo bitaru (300), kila khu Makhumi Kataru niye aafumisibwa naabi.

²¹Khu Makhumi Kataru abo, abe niye ali uwaamanyikhana naabi, khuuminyisa babaaramire boosi. Niye wekela umuraangilisi waabwe, ne waalekha khumanyikhana naabi khufuura Bataru babanyoowa ta.

²²Benaaya umwaana uwa Yehoyada uwe Kabuzeli, abe naye ali umusaani umunyindaalifu, nga akhola bikholwa bye kamaani. Lutweela weera ba Mowabu be kamaani babili. Luluundi mu biseela bye bunyifu, ekha aasi mu lilowo weera italanyi.

²³Naluundi weera umu Misiri, nga ali umusaani umuleeyi, nga buuleeyi olesa tsifuuti musaafu. Umu Misiri abe wawaambile ingabo mu mukhono kweewe, ne Benaaya waamutsya n'imiimbo yonyene, waayuula lifumo khukhwaama mu mukhono kw'Omumisiri, waamuwunila lilyeene, waamwiira.

²⁴Bino nibyo byeesi Benaaya umwaana uwa Yehoyada aakhola, waakila byaamufunila lubuuyi mu be kamaani Baataru tsana.

²⁵Waaba nga ali uwe shiriifwa naabi mu basaani bano kamakhumi kataru, ne shitweela busa waalekha khukhwoolelela Baataru abo ta. Dawudi waamwikesa khuuba umuraangilisi uwe baaliindi beewe.

²⁶Basaani be mu maye babaaba be kamaani nibo bano: Asaheli wandaaye uwa Yowabu, Elihanani umwaana uwa Dodo uwe Beselehemu.

²⁷Shamoti uwe Harodi, ni Helesi uwe Peloni,

²⁸Ira umwaana uwa Ikeshi uwe Tekowa, Abiyezeri uwe Anasosi,

²⁹Sibekayi umu Husha, Alayi uwaama i Ahohi,

³⁰Maharayi uwe Netofa, Heledi umwaana uwa Baana uwe Netofa.

³¹Isayi umwaana uwa Ribayi uwe Gibeya uwe shikuuka sha Benyamini, Benaaya uwe Pirasoni,

³²Hurayi uwe khuntsitsi tsye Gaasi, Abiyeli umu Arabasi,

³³Azimavesi uwe Baharumu, Eliyaba uwe Shaliboni,

³⁴Hashemu umu Gizoni, Yonasani umusoleeli uwa Shage umu Harari,

³⁵Ahiyamu umusoleeli uwa Sakari umu Harari, Elifali umwaana uwa Uri.

³⁶Heferi umu Mekerasi, Ahiya umu Peloni,

³⁷Heziro umu Karumeli, Narayi umwaana uwa Ezibayi,

³⁸Yoweli wandaaye uwa Nasani, Mibihari umusoleeli uwa Hagiri,

³⁹Zeleki umu Amoni, Naharayi uwe Berosi, nga niye uwasutatsaka bye busoolo bya Yowabu, umusoleeli uwa Zeruya,

⁴⁰Ira umu Isiri, Garebu umu Isiri,

⁴¹Uriya umu Hiti, Zabadi umusoleeli uwa Ahilayi,

⁴²Adina umusoleeli uwa Shiza uwe mu shikuuka sha Rewubeni, atweela ni babaandi kamakhumi kataru.

⁴³Hanani umusoleeli uwa Maka, ni Yosefati umu Misi,

⁴⁴Uziya umu Ashitarosi, Shama ni Yeyile basoleeli ba Hosamu umu Aroweri,

⁴⁵Yediyayeli umusoleeli uwa Shimuri, ni wandaaye weewe Yoha, nga bali ba Tizi.

⁴⁶Eliyeli umu Mahavi, ni Yeribayi, ni Yoshaviya, basoleeli ba Elinamu, ni Isuma umu Mowabu,

⁴⁷Eliyeli, ni Obedi, ni Yayaseli umu Mezoba.