Read lumasaaba 1 Bye Kimiboolo 16 Bible Online

1 Bye Kimiboolo 16 - lumasaaba bible

1 Bye Kimiboolo 16

¹Baayila isaanduuku iya Wele, baakira mukari mwe iweema abe isi Dawudi amalile khaale khuukiŋoonaŋoonela. Bakaanisayo isi Wele biwaanwa bibyooshebwa ni bibireera lukoosi.

²Nga Dawudi waamalile khuuwaanayo biwaanwa ibyo, waawa babaandu ikhabi mu lisiina ly'Omukasya,

³kila akabila ba Isiraeli boosi, basaani ni bakhasi, buli mutweela kumukaati, ni khuumuremerakho inyama, ni bikala bye kimizabibu kimyoomu.

⁴Dawudi waaroborayo batweela khu ba Levi ari baraambatsake mu moni tsye Saanduuku y'Omukasya, nga bakuukuula lisiina lyeewe, nga bamusiima, naluundi nga baruuya Umukasya Wele uwa Isiraeli.

⁵Asafu waaroborebwa khuuba niye umuraangilisi, nga Zekariya niye umwiilakho. Yeyeli, Shemiramosi, Yehiyeli, Matisaya, Eliyabu, Benaaya, Obedi-Edomu, ni Yeyeli, abe nibo babaakhupa kamatuungu ni biyilili. Asafu abe niye uwuutsa bye khuusakayisa.

⁶Basaayi Benaaya ni Yahaziyeli abe bali ni khuufuurira tsikhoombi ibweeni we isaanduuku iye Indakaano iya Wele, akhali khukhwakama ta.

⁷Khu shifukhu isho shisheene, Dawudi waanyoowa khuukhalawo ari Asafu ni baalebe beewe bali ni khukhwiimba kimyeenya nga basiima Umukasya. Kila beemba kumweenya kuno, nga baruuya Umukasya:

⁸Siima Umukasya naabi, nga mukuukuula lisiina lyeewe ni muboolele kamanaambo koosi byeesi niye amala khaale khuukhola!

⁹Ni mumwiimbile kimyeenya, yiimba nga mumuruuya, ni mukanikhe khu bye kamakaanga byoosi byeesi niye amala khaale khuukhola.

¹⁰Ni muwe lisiina lyeewe likhosefu shiriifwa, khayo abo boosi babesaaya Umukasya babe ni kumwikhoyo!

¹¹Ni mwiyikine Umukasya ni kamaani keewe, ni mumwiyikinatsake busheele.

¹²Ni mushebulile bye kamakaanga byeesi niye aamala khaale khuukhola, bibiiyangisa byeesi aamala khaale khuukhola, ni kimisaango kyeesi aamala khaale khuukhala.

¹³Inywe lisaaye lya Iburayimu umwakaanisi weewe, inywe babetsukhulu ba Yakobo, mumuuli baarobore beewe.

¹⁴Niye ali Umukasya Wele weefwe; niye ukhalawo bibiwaamba khu manaambo koosi.

¹⁵Khuumala biilo ni biilo, niye s'ebilila indakaano isi aamala khuukhola ta, byeesi aamala khaale khuulakila ari bikholikhe, khuumala kimiboolo bikana.

¹⁶Indakaano isi niye aamala khaale khuukhola ni Iburayimu, byeesi niye aamala khaale khuuloma ari akhaakholele Isaaka.

¹⁷Indakaano isi Umukasya aamala khaale khuukhola ni Yakobo, yaaba iye biilo ni biilo ni Isiraeli.

¹⁸Aakikhola khaale akho nga aloma ari, “Ise ikhaabawe inywe shibala sha Kanani, shibe kumukabo kwe buusikha bweenywe.”

¹⁹Nga bashiili khuuba baakali naabi ta, nga bashiili khumanyikhana ta, naluundi nga bali bakeendani busa,

²⁰nga bayiiya busa khukhwaama mu linaambo litweela khuutsya mu liindi, khukhwaama mu buyiinga butweela khuutsya mu buundi,

²¹Umukasya s'afukiilisakho umuundu yeesi khuubaminikhilisa ta; wareewura bayiinga nga aloma ari,

²²“Mbaawo khuwaamba khu babiite baase ta, mbaawo khuukhola buubi bwoosi khu baŋoosi baase ta!”

²³Shibala shoosi, ni mwiimbile Umukasya! Buli shifukhu mufumise nga n'akhuwonesa ifwe.

²⁴Kuukuula shiriifwa sheewe isi kamanaambo koosi, babaandu boosi bamanye bye kamakaanga byeesi niye akhola!

²⁵Khulwekhuuba Umukasya ali uwe angaaki, naluundi akhiile aruuyibwe naabi, ni khukhwisibwamo shiriifwa khuuminyisa ba wele boosi.

²⁶Khulwekhuuba ba wele be kamanaambo kakaandi boosi bali busa bifwaani, ne Umukasya niye uwabuumba likulu.

²⁷Shiriifwa ni buukhulu bili bibyeewe; kamaani ni kumwikhoyo bili isi niye ali.

²⁸Ruuya Umukasya babaandu mweesi babaali khu shibala, Ruuya shiriifwa sheewe ni kamaani keewe!

²⁹Ruuya Umukasya nga mumwiisamo shiriifwa shishimwaakhila; ni musuute biwaanwa, mwiitse mu moni tsyeewe! Yisaaya Umukasya mu shifwo sheewe shikhosefu.

³⁰Babaandu mweesi, ni munikine nga muli mu moni tsy'Omukasya. Shibala shaakhwiikhibwa, seshinyala shaatengaala ta.

³¹Khayo likulu lisangaale, ni shibala shiikhoye, bilomele kamanaambo biri, “Umukasya ali Umuyiinga!”

³²Khayo inyaantsa ni bibikilimo byoosi biwoloole, khayo shibala ni bibishilimo byoosi bisangaale.

³³Nio kimisaala kyoosi kye mu shisaali kikhupe liyoombo khulwe kumwikhoyo, ibweeni w'Omukasya, khulwekhuuba etsa khukhalila shibala kimisaango.

³⁴Bebulebe, ni musiime Umukasya khulwekhuuba ali umulayi, khulwekhuuba khuukana khweewe khuli khwe biilo ni biilo!

³⁵Naluundi mulome muri, “Wele ureera buwonesi, n'ukhuwonese ifwe, ukhubusaase, ukhuruse mu manaambo kakaandi, nio khunyalisatsake khukhusiima iwe uli umukhosefu, nio khwikhoyele mu khukhuruuya iwe.

³⁶Umukasya Wele uwa Isiraeli aruuyibwe naabi, biilo ni biilo!” Kila babaandu boosi baloma bari, “Amiina!” Baruuya Umukasya.

³⁷Nashiryo umuyiinga Dawudi walekha Asafu ni baalebe beewe isi isanduuku iye Indakaano y'Omukasya yaba, nga beloosela ni khuuba babaakaanisi buli shifukhu, nga abe ni shikanibwa.

³⁸Waalekhawo ni Obedi-Edomu, umusoleeli uwa Yedusuni, ni Hosa, atweela ni baalebe beewe kamakhumi kasesaba na shinaane, nga bano bali babaliinda khu shilibwa.

³⁹Dawudi waarawo Zadoki umusaayi ni baalebe beewe basaayi, khuliinda iweema y'Omukasya iye Gibiyoni, abe babaandu isi besaayilamo,

⁴⁰isi kumuusi ni angoloobe, abe bawaanayo isi Umukasya biwaanwa bibyooshe, khuuloondekhana ni n'ebyo bibyaronebwa mu makaambila k'Omukasya, keesi awa Isiraeli.

⁴¹Baaba atweela ni Hemani ni Yedusuni, ni naabo boosi beesi baarobora baarebwawo khuusiima Umukasya, khulwekhuuba khuukana khweewe khuliwo biilo ni biilo.

⁴²Hemani ni Yedusuni baaba ni tsifulumbeti, ni bye khuusakayisila khu myeenya, ni bibiindi bye kimyeenya kimikhosefu. Basoleeli ba Yedusuni nibo babaaroborebwa khuuba babaaliinda khu shilibwa.

⁴³Lwanyuma babaandu boosi baatsya, nga buli mutweela atsya ingo weewe. Dawudi welayo ingo weewe khuuwa be muungo mweewe tsikhabi.