Read lumasaaba 1 Bye Kimiboolo 20 Bible Online

1 Bye Kimiboolo 20 - lumasaaba bible

1 Bye Kimiboolo 20

¹Mu mwiiko ukwo imbuka iye bunyifu ni yawakho, nga yino niyo imbuka yeesi bayiinga bebwakalilamo bashaabwe, Yowabu waraangilila liiye waatsya mu busoolo, webwaakala naluundi wafuuntsakilila ba Amoni. Khukhwaama awo waatsya webwaakala Raba, nasho washifuuntsakilila, washiwaamba. Ne Dawudi waarama nga ali mu Yerusalemu.

²Dawudi waabukula ikuutwa iya Milikomu umuyiinga waabwe, nga busiro yoolisa tsikilo 34, nga ilimo kamabaale ke buukusi bwe angaaki naabi. Baabukula kamabaale kano, baakara mu kuutwa iya Dawudi. Dawudi waayaaya ni bibiindu bibiindi biikali busa bye mu shiriimba isho.

³Waayila babaandu baamwo, waabarawo khuukhola kimilimo kye kamaani, nga baraambisa kimisumeeno, tsisuluulu, ni tsiyaywa. Ni musaambo niyo indweela isi Dawudi aakhola babaandu be mu biriimba bye ba Amoni. Lwanyuma Dawudi ni babaandu boosi beelayo i Yerusalemu.

⁴Lwanyuma lwa bino, busoolo bwaabalukhawo akari e ba Isiraeli ni ba Filisitiya i Gezeri. Sibekaayi umu Husha weera Sipayi, uwaba mutweela khu be lisaaye lye kimisaani kikyatsowa nga kimiboofu naluundi kimileeyi naabi. Ba Filisitiya busoolo bwaabakonela.

⁵Aabawo busoolo bubuundi ni ba Filisitiya. Eluhanani umusoleeli uwa Yayiri weera Lahimi, wandaaye uwa Goliyasi umu Giti. Abe ingeyo iye lifumo lyeewe ili indeeyi naabi, abe yoola nga kuusaala kweesi barukhirakho tsingubo.

⁶Ndi aabawo busoolo luundi i Gaasi, nga bulimo umusaani umuboofu naluundi umuleeyi naabi, nga ali ni tsintsala tsisesaba khu buli kumukhono, ni khu buli shikele, nga atweela tsili kamakhumi kabili na tsine. Naye abe aama mu lisaaye lye kimisaani kimiboofu naluundi kimileeyi naabi.

⁷N'alekelesaka Isiraeli, Yonasani umusoleeli wa Shimeya nga ali wandaaye uwa Dawudi, waamwiira.

⁸Bano baaba abe baama mu lisaaye lye kimisaani kimiboofu naluundi kimileeyi naabi, kye i Gaasi, nga beeribwa ni Dawudi ni baselikhale beewe.